Aarkkariyam (2021) Sinhala Subtitles | කවුද දන්නේ? [සිංහල උපසිරසි]

සුබ දවසක් වේවා බයිස්කෝප් සිංහලෙන් වෙබ් අඩවිය එක්ක එකතු වෙලා ඉන්න හැමෝටම. 2021 අවුරුද්දේ අප්‍රෙල් මස 01 වෙනිදා නිකුත්වුණ Aakkariyam (2021) මලයාලම් සිනමා නිර්මාණය වෙනුවෙන් සිංහල උපසිරැසි අරගෙනයි අද ආවේ.

කොවිඩ් 19 වසංගතය කියන්නේ අද වෙද්දි මුළු ලෝකෙම කටයුතු අඩපණ කරලා මුළු ලෝකයම විනාශ මුඛයට ඇදලා දාපු බොහොම අකාරුණික වෛරසයක්. මේ හින්දා ලෝකයේ සෑම කර්මාන්තයකටම අත් වෙලා තියෙන්නේ බොහෝම අවාසනාවන්ත ඉරණමක්. චිත්‍රපටි කර්මාන්තය කියන්නෙත් මේ හේතුවෙන් අඩපණ උන තවත් කර්මාන්ත ක්ෂේත්‍රයක්‍. ඒත් මේ ‌වසංගතයත් ආශිර්වාදයක් කර ගත්තු නිර්මාණකරුවන් බොහෝ දෙනෙක් මේ වෙද්දි තමන්ගේ නිර්මාණ සාර්ථක ලෙස එළි දක්වලා තියෙනවා. මලයාලම් සිනමා නිර්මාණකරුවන්ට මේ අතරේ සුවිශේෂි තැනක් හිමිවෙනවා. මේ වසංගත කාලය හා බැදුණු, මේ කාලයට අනුගත වන ආකාරයට සිදු කරන ලද නිර්මාණ කිහිපයක්ම පහුගිය කාලයේ අපිට දකින්නට ලැබුණා. මේ Aakkariyam කියන්නෙත් කොරෝනා වසංගතය මුල් කරගෙන සිදු කරපු නිර්මාණ කාර්යයක්.

අද වෙද්දි 7/10 IMDb අගයක්, 85% ගූගල් පරිශීලක අගයක් හිමිකර ගත්ත මේ චිත්‍රපටිය Sanu John Varghese අධ්‍යක්ෂණයක් වගේම Sanu John Varghese, Arun Janardanan, Rajesh Ravi ගේ තිර රචනයක්.

මේ කතාව ගැන කිව්වොත්, ෂර්ලි (Parvathy Thiruvothu) හා රෝයි (Sharaf U Dheen) කියන්නේ ‌එකිනෙකා තේරුම් අරන් බොහොම ආදරෙන් ඉන්න විවාහක යුවලක්. හැබැයි මේ දෙන්නම කලින් විවාහ වෙලා හිටපු දෙන්නෙක්. ෂර්ලිට පළමු විවාහයෙන් අවුරුදු 12ක විතර දුවෙක් ඉන්නවා. ඇගේ දුව සෝෆි තමිල්නාඩු කන්‍යාරාමයක ඉගෙන ගන්නවා. ෂර්ලි හා රෝයි දෙන්නා ජීවත් වෙන්නේ මුම්බායි වල. රෝයි ව්‍යාපාරිකයෙක්. ‌2020 අවුරුද්දේ කොරෝනා වසංගතය හිස ඔසවමින් ඉන්න වෙලාවක රෝයි හා ෂර්ලි, කේරළේ පදිංචි විශ්‍රාමික ගණිත ගුරුවරයෙක් වන ෂර්ලිගේ තාත්තා ඉට්ටියිවාරා (Biju Menon) තනියම වාසය කරන මහ ගෙදරට නිවාඩුවක් ගත කරන්න එනවා.

ෂර්ලි සහ රෝයි මහ ගෙදර ඇවිත් ඉන්න වෙලාවේ ‌කොරෝනා වසංගතය හේතුවෙන් ඉන්දියාව තුළ පළමු ලොක්ඩවුන් කිරීම සිද්ධ වෙනවා. ඒ අතරෙදි රෝයිගේ ව්‍යාපාරික කටයුත්තකට යාලුවෙක් ලබා දුන්න ණය මුදලක් නැවත යාළුවා රෝයිගෙන් ඉල්ලනවා. මේ හේතුව හින්දා රෝයි ලොකු මූල්‍යමය ගැටළුවකට මූණ දෙනවා. මේ වෙලාවේ රෝයිගේ මාමාණ්ඩි, තමන්ගේ ‌ගෙදර සහ ඉඩම් විකුණලා ණය මුදල පියවමු කියලා යෝජනා කරත් රෝයි ‌ඒ යෝජනාවට කැමැත්ත පල කරන්නේ නෑ. ඒත් වෙන විකල්පයක් නැති හින්දා අවසානෙදි රෝයි මේ වැඩේට කැමති වෙනවා. ‌මේ අතරෙදි බොහොම නිවිච්ච මනුස්සයෙක් වෙච්ච ඉට්ටියවාරා මහත්තයා ගෙදර සම්බන්ධයෙන් ලොකු රහසක් රෝයිට හෙලිකරනවා. ඇත්තම කිව්වොත් රෝයිගේ ඇස් උඩ යන රහසක්. ඊට පස්සේ මොනවා වෙයිද? රෝයිගේ ප්‍රශ්න විසදෙයිද? දෙවියන්ගේ කැමැත්තට හැමදේම සිද්ධ වෙයිද? කවුද දන්නේ?

Drama – Mystery – Thriller කාණ්ඩ යටතේ නිර්මාණය වෙලා තියෙන මේ නිර්මාණය, ඔබ බලාපොරොත්තු වෙන සම්ප්‍රදායික අභිරහස්, ත්‍රාසජනක කුතුහලයෙන් පිරුණු චිත්‍රපටියක් නෙමෙයි. බොහොම හිමින්, වැඩි කලබලයක් නැතිව ගලාගෙන යන කතාවක් කියලා කියන්න ඕනේ. ප්‍රධාන චරිත ගැන විශේෂයෙන් ‌කියන්න අවශ්‍ය ‌නොවුනත්, විශේෂයෙන්ම මේ චිත්‍රපටියේ සුළු චරිත නිරූපණය කරන රංගන ශිල්පීන්‌ගේ රංගනය පවා විශිෂ්ඨ මට්ටමක තියෙනවා. මලයාලම් සිනමාවට ආදරේ කරන රසිකයින්ට මේ සිනමා නිර්මාණය අනිවාර්යෙන්ම රස විඳින්න කියලා ආරාධනා කරනවා. මේක වෙනස්ම අත්දැකීමක් වෙයි.

තවත් සිංහල උපසිරැසියකින් මුණ ගැහෙමු. සුබ දවසක් වේවා.

 

 

 

 

 

 

Due to copyright issues, we do not provide any torrent links.

මෙම ලබා දී ඇති උපසිරසි HDRip පිටපත් සඳහා අදාළ වේ.

4,392 downloadsDownload AKM-2021.zip51 KB

මේ ලබා දී ඇති සිංහල උපසිරැසි පිළිබද “රේණුකා සුභාෂිණි” සොයුරියට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඇයගේ අවසරය මතම සිදුවිය යුතුය.

 

Subtitle Contributor Rank

SILVER MEMBER
JOINING DATE – 2020-02-12
SUB-MAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.