Bad Boys for Life (2020) Sinhala Subtitles | එක්ව පැදයන්න, එක්ව මියයන්න [සිංහල උපසිරසි සමඟ] (100)

ඔන්න එහෙනම් අද මං අරගෙන එන්නේ හැමෝම මගබලාගෙන හිටිය චිත්‍රපටියක්. හැමෝම කියන්නේ මාත් ඇතුලුව. මොකද මගෙ උපසිරැසි ජීවිතයේ දෙවෙනි කඩයිම පසුකරන්නයි මේ සූදානම. ඒ කියන්නේ 100 වෙනි උපසිරැසි නිර්මානය. මං මේකට එකතුවුන හැටි කියලම කතාව පටන්ගන්නම් එහෙනම්. (කියවන්න අපහසු කෙනෙක් ඉන්නවනම් කෙලින්ම උපසිරැසිය ගන්න පුලුවන්, මගේ කිසිම අකමැත්තක් නෑ) ඔන්න එහෙනම් ඉදිරියට යන්නයි හදන්නේ, මට ලිපියක් ලියාගන්නවත් නොතේරෙන හින්දා අතරමග අඩුපාඩු එහෙම තිබුනොත් වැඩිය ගනන් ගන්න එපා…

මගෙ පලවෙනි උපසිරැසිය බයිස්කෝප් අඩවියේ පල උනේ 2013 මැයි 31 වෙනිදා. හප්පච්චියේ… සෑහෙන කල්නේ… ඔව්. දැනට අවුරුදු 7කට කලින්. එහෙනම් මෙච්චර කල් ගියේ මොකද කියලා ඔයාලා හිතනවා ඇති. මේකයි කතාව. මගෙ පලවෙනි උපසිරැසිය නිර්මානය කලේ මං 10 වසරේ ඉන්නකොට. ඒ දවස් වල නිකන් ආසාවට එකක් දෙකක් කරලා වැඩේ නැවැත්තුවා සාමාන්‍ය පෙල විභාගය නිසා. ඔහොම ඉඳලා විභාගෙ ඉවර උනාම ආයෙ නිකන් තුන හතරක් කරන්න පටන් ගත්තා… නිකන් කහනවට වගේ… වැඩිය උනන්දුවක් තිබුනෙත් නෑ මේ ගැන. නමුත් අර අනිත් අය කඩයිම් පසුකරද්දී ඇතිවුන උනන්දුව නිසාද මන්දා කොහොමහරි ආයෙත් ටිකක් ට්‍රැක් එකට වැටුනා. ඔහොම ඉද්දී උසස් පෙල කරන්න පටන්ගත්තා. හැබැයි වැඩේ අතාරින්නෙ නැතුව මාස තුන හතරකට එකක් හරි කරලා දැම්මා. ඉතින් ඔය ටික එකතුවෙලා කොහොමහරි පල්වෙනි කඩයිම, ඒ කියන්නේ උපසිරැසි 50 පසුකරන්න ලැබුනා 2017 නොවැම්බර් 22 වෙනිදා… ඔන්න එදා ඉඳන් තව අවුරුදු දෙකහමාරක් වගේ ගෙවිලා තමයි අද මේ 100 වෙනි උපසිරැසිය දක්වා ආවේ… 2017 න් පස්සේ රස්සාව කරන්න පටන්ගත්තු නිසා මේ තාක් කල් ගියා මේ කඩයිම දක්වා එන්න. හැබැයි ඉස්සරට වඩා දැන් උනන්දුවෙන් කරනවද මංදා කියලා මටත් සමහරවෙලාවට හිතෙනවා.

ඉතින් හත් වසරක් තිස්සේ මෙ අඩවියත් එක්ක එකතුවෙලා ඉන්නැද්දී හඳුනාගත්තු අයනම් බොහොමයි. මුලින්ම සාමාජිකයෙක් වශයෙන් අඳුරගන්න ලැබුනේ <විමා> අයියවයි. ඉතින් ඒ ඇරෙන්න අනිත් හැමෝවමත් මේ වෙලාවේ ඉතා ආදරයෙන් මතක් කරනවා. මොකද නම් වශයෙන් කියන්න ගියොත් සෑහෙන පිරිසක් ඉන්න නිසා. ඒවගේම බයිස්කෝප් අඩවියේ සාමාජිකයින් වශයෙන් සිටින, සිටිය හැම කෙනෙක්වමත් ඉතා ආදරයෙන් මතක් කරනවා. මොකද එක එක්කෙනාගානෙ කියන්න ගියොත් කාගෙ හරි නමක් අමතක වෙනවා, ඒක එච්චර හොඳ නෑනෙ. ඉතින් අවසාන වශයෙන් අනිත් උපසිරැසිකරුවන් කියනවා වගේම අපේ ප්‍රධාන පුරුක, ඒ කියන්නේ ප්‍රේක්ශක ඔබලාවත් මං ඉතා ආදරයෙ න් මේ වෙලාවෙ මතක් කරනවා. මොකද ඔයාලා දාලා යන එක කමෙන්ට් එකකින් පවා මේ උපසිරැසි කරන අයව දිරිමත් කරන්න පුලුවන්. ඒ අපි හැමෝම එහෙම දෙයක් යටිහිතින් හරි බලාපොරොත්තු වෙන නිසා. ඉතින් හැමෝම නැතත් හැමදාම පුංචි කමෙන්ට් එකකින් පවා අපිව දිරිමත් කරන අපේ ප්‍රේක්ශකයින්ට මං ආයෙත් සැරයක් ස්තූති කරනවා. අවසාන වශයෙන් මේ කඩයිම වෙනුවෙන් චිත්‍රපටය වෙන්කරලා දුන්නු ” සිසිල” අයියට මං ස්තූති කරන ගමන් කතාව පැත්තට හැරෙනව.

පැරණි චිත්‍රපට රසිකයෙක්නම්, එහෙමත් නැත්නම් Will Smith, Martin Lawrance ගෙ රසිකයෙක්නම් ඔයාල අනිවාරෙන්ම මීට කලින් නිකුත්වූ Bad Boys චිත්‍රපට ද්විත්වය නරඹලා ඇති. දෙවෙනි එක නිකුත්වෙලා අවුරුදු 17 කට පස්සේ උනත් තුන්වැන්නක් නිර්මානය කරන්න උත්සුක වෙලා තියෙන්නේ මේ ප්‍රධාන නලුවන් දෙදෙනාගේ ජනප්‍රියත්වය සහ මේ කතා තේමාවට ප්‍රේක්ශකයින්ගෙ තියෙන දැඩි ඇල්මයි. දෙවෙනි චිත්‍රපටිය අවසානයේ නීතිවිරෝදී මත්ද්‍රව්‍ය ජාවාරමක් අහවර කිසීමෙන් පසුව නැවතත් තුන්වෙනි කොටසක් ගැන කිසිදු කසුකුසුවක් තිබුනේ නෑ. නමුත් 2008 න් පසුව Will Smith කියලා තිබුනා තුන්වෙනි කොටසක් නිර්මානය කරන්න උවමනාවක් තියෙනවා, නමුත් එකල ඔහුට තිබූ දැඩි ඉල්ලීම මත ඔහුගේ ගනන් හිලව් ඉතාමත් ඉහල මට්ටමක තිබුනු නිසා වැඩේ ටිකක් කල් ගියා. පසුව ගැලපෙන පිටපතක් නොමැතිකමින් නිෂ්පාදන කටයුතු පස්සට ගිහින් තියෙන්නේ කියලා. අවසානයේ සියල්ලන්ගේම මැදිහත්වීම මගින් කාලයට තාලයට ගැලපෙන පිටපතක් නිර්මානය කරගන්න නිශ්පාදක වරුන්ට හැකිවුනා. මේ චිත්‍රපටිය තිරගත වීම ආරම්භ කලේ ජනවාරි 17 ත් වෙනිදා. ඒ Dr.Dolittle කියන චිත්‍රපටියත් සමගමයි. අවුරුද්ද පටන්ගද්දිම මේ චිත්‍රපටි දෙක තිරගත උන නිසා හැමෝම හිතුවේ Dolittle හොඳ ආදායමක් ලබාගනියි කියලයි. නමුත් කවුරුවත් බලාපොරොත්තු නොවුනු ආකාරයෙන් Dolittle අසාර්ථක වෙද්දී Bad Boys හිතුවෙවත් නැති දුරකට ගියා…

ඉතින් සුපුරුදු පරිදි Bad Boysරසිකයින්ව කලකිරවන්නේ නැතිව සුපිරිම සුපිරි කොමඩි, ඇක්ශන් චිත්‍රපටියක් බලාගන්න අපිට පුලුවන් උනා. අපි හිතුවෙවත් නැති පැත්තකට චිත්‍රපටිය ගලාගෙන ගියා. ඒවගේම ආරම්භයේ සිටම පුරුදු පරිදි මාර්කස්ගේ ඉල ඇට ඇදෙන විහිලු වලින්නම් ඉවරයක් නැති වෙලා තියෙනවා. මිනිහගෙ කතාවිලාශය, හැසිරීම් පවා සිනාව දනවන සුලුයි. මියාමි නගරයේ පොලිස් නිලධාරින් දෙනෙනෙක් ලෙස එදා ඉඳන් මෙ දෙන්නට සිද්ධවෙන කරදර වලනම් නිමක් නෑ. ඉතින් මිලියන 90 ක නිශ්පාදන පිරිවැයක් ගත්තු මේ චිත්‍රපටය දැනට මිලියන 408 ක ආදායමක් ලබාගෙන තියෙනවා. Columbia Pictures මගින් නිකුත් කරපු Bad Boys පසුගිය ජනවාරි මාසයෙ වැඩිය ආදායම ලබාගත්තු චිත්‍රපටය බවට පත්වුනා. ඒවගේම IMDb දර්ශකයේ 7.2 ක අගයකුත් Rotten Tomatoes හි 77% ක මනාපයකුත් Google පරිශීලකයින්ගෙ 99% මනාපයකුත් ලබාගෙන ඉතා ඉහලින් වැජබෙමින් ඉන්නවා. කලින් කතාවලට ලොකු සම්බන්ධයක් නැතිව වගේ පෙනුනට සෑහෙන ලොකු සම්බන්ධය තියෙනවා කියලා මං කියන්නම්. එහෙනම් මං කතාව ගැන පොඩි හැඳින්වීමක් කරන්නම්.

ඉසබෙල් අරේටස් කියන කනවැන්දුම් කාන්තාව ආර්මන්ඩෝ කියන තමන්ගේ පුතාගේ උදවුවෙන් මෙක්සිකෝවේ හිරගෙදරකින් පැනලා යනව. පස්සේ ඔහුව මියාමි වලට යවනවා ඔවුන්ගේ පියාගේ උරුමයක් වන සඟවලා තියෙන මුදල් ප්‍රමාණයක් හොයාගන්න, ඒ වෙන මොකකටවත් නෙමෙයි, ඉසබෙල්ගේ ස්වාමියා වන බෙනීටෝව සිරගත කිරීම සහ ඒ අතරතුර මියයෑමේ වේදනාවට පළිගැනීම උදෙසා. ඒ අතරේ මියාමි වල මාර්කස්ගේ දියණියගේ පලමු දරු උපතේ සතුට සමරමින් සිටිනා අතරතුර යම් හඳුනානොගත් පුද්ගලයෙක් විසින් මයික්ට වෙඩි තබනවා. ඔහු ජිවිතයත් මරණයත් අතර විශාල සටනක නිරතවෙනවා. ඉතින් කොහොමහරි අවසානයේ ඔහුගේ ජිවීතය රැකුනත් මේ ගැන වැඩිදුර සොයන්න වෙහෙසෙනවා. නමුත් ඒක ඉතා ලේසිපහසු කාර්‍යයික් නෙමෙයි, මොකද මෙවර තමන්ට ලැබිලා තියෙන දුෂ්ඨයා එසේ මෙසේ කෙනෙක් නෙමෙයි. හසුරවන්න ඉතා අපහසුයි වගේම ඔහු මිනීමරන යන්ත්‍රයක් මෙන් ක්‍රියාත්මක වෙන පුද්ගලයෙක්..

ඉතින් ඇඟ කිලිපොලා යන දර්ශන මෙන්ම ඉවරයක් නොවන වෙඩි වරුසා මැදින් ගලාගෙන යන මේ චිත්‍රපටියේ ආස්වාදය මං ඔයාලගෙන් උදුරගන්නේ නෑ. මීට වැඩිය කතාව ගැන කියන්න යන්නෙත් නෑ, පුරා පැය දෙකකට ආසන්න කාලයක් ප්‍රේක්ශකයින්ව ඇඳ බැඳ තබාගන්න තරම් විශිෂ්ට ලෙස නිර්මාණය කර ඇති මේ සිත්තම් නරඹන්න ඔයාලට ආරාධනා කරන ගමන් මං මේ ලිපිය අවසන් කරනවා. අවසානයේ කියන්න තියෙන්නේ, අපි හිතුවෙවත් නැති තරම් සාධාරණයක් සිදුකරමින් අවසන් උන Bad Boys කතාමාලාවා අවසානයක් නොලබා තවත් කොටසක් දක්වා දිගු කර ඇති බවයි. එහෙනම් ඒකත් මතකයේ තියාගෙනම උපසිරැසිය ලබාගන්න. නැවත උපසිරැසියකින් හමුවෙන තුරු ඔබ සැමට සුභ රසවින්දනයක් ප්‍රාර්ථනා කරනවා. බයිස්කෝප් අඩවියට ජය!

-එක්ව පැදයන්න , එක්ව මියයන්න-
-සදාතනික නරකයෝ-

 

 

 

 

Due to copyright issues, we do not provide any torrent links. 

මෙම ලබා දී ඇති උපසිරසි WEB / HD / Blu-Ray පිටපත් සඳහා වලංගු වේ.

55,689 downloadsDownload Bad-Boys-for-Life-2020-Blu-Ray.zip236 KB

මේ ලබා දී ඇති සිංහල උපසිරැසි පිළිබද “රඛිත රණතුංග” සොහොයුරාට සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

 

Subtitle Contributor Rank

GOLD MEMBER
JOINING DATE – 2013-05-21
SUBMAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.