Taramani (2017) with Sinhala Subtitles | සමනළියකගෙන් පාර ඇසූවෙමි… [සිංහල උපසිරසි සමඟ] (18+)

 

ඔයාලා දකින මේ පාර, කොයි ගමේද කියලා අඳුනගන්න පුළුවන්ද?
දෙපැත්තෙන්ම වතුරෙන් වටවුණ, මැදින් යන මේ පාර..චෙන්නයි වල තමා තියෙන්නේ. මද්දහනේ තුනට වැටෙන අවුව ඔළුව පුපුරවන මේ පාරේ.. දැන් වැස්සක් වහින්න ඕන කියලා, රාමේෂ්වර් වල කිහිප දෙනෙක් දෙයියන්ට පූජා තියමින් ඉන්නවා. අද මැච් එකෙන් ඉන්දියානු කණ්ඩායම පරදින්න ඕන කියලා. අද දවසේ ක්‍රිකට් වලින් ඉන්දියාව පරදින්න ඕන කියලා හිතුවත්, ඒක ලොකු දේශ ද්‍රෝහිකමක්. එහෙම තියෙද්දි..මේ සාමාන්‍ය මාළුකාරියන් හයදෙනා ඇයි දේශ ද්‍රෝහියන් වුණේ කියලා කියනවා නම්..
මෙයාලගේ නෑදෑයෝ කට්ටිය රාමේෂ්වර් මුහුදට තමයි මාළු අල්ලන්න ගිහින් ඉන්නේ. දැන් ඉන්දියාව චෙන්නායි වල මැච් එක ගගහා ඉන්නේ මුහුදෙන් එහා පැත්තේ රටත් (ශ්‍රී ලංකාවත්) එක්ක.
බැරිවෙලාවත් මේ තරඟයෙන් ඉන්දියාව දිනුවොත්..
මාළු අල්ලන්න ගිය ධීවරයෝ..ඒ රටේ හමුදාව විසින් අල්ලගන්න පුළුවන්.
මාළුන්ව පැහැර ගන්න පුළුවන්. වෙඩි තියලා මරලා දාන්නත් පුළුවන්.
ඒකයි මේ තරඟයේදී ඉන්දියාව පරදින්න ඕනේ,
වැස්සක් ඇවිල්ල හරි තරඟය නවතින්න ඕනේ කියලා
මෙයාලා යාඥා කර කර ඉන්නේ.
බුද්ධං සරණං ගච්ඡාමි !
(වැස්සක් වහී)
මෙයාලා යාඥා කළ නිසා වැස්ස ආවාද නැත්තම්.. ඉබේම වැස්සක් ආවද කියලා අපි දන්නෑ.
අර ධීවරයින්ට මොනවද වෙන්න යන්නේ කියලත් අපි දන්නෑ.
මැච් එකට මොකද වුණේ කියලත් අපි දන්නෑ. මොකද්ද යකෝ මේ ගොනයි මීමයි වගේ කියන කතාව කියලා ඔයාලට හිතෙනවා නම්..මේ කතාවම ගොනාගෙයි මීමාගෙයි කතාවක් තමා.
කතාව අවසානයේ ඔයාලට ගොනාව හිතට ඇල්ලුවොත් ගොනා.. මීමාව හිතට ඇල්ලුවොත් මීමා.

තරමනි..උපසිරසි කිරීමෙන් ටිකක් ඈත්වෙන්න තීරණය කරපු මාව, ආයෙත් උපසිරසිකරණයට ඇදලා දාපු අමුතුම කතාවක්. අධ්‍යක්ෂක රාම් ගේ නවතම එළිදැක්ම. මේ චිත්‍ර‍පටයේ කතාව දිහා ටිකක් බැලුවොත් මේක හුඟක්ම හුඟක් වෙනස්, වයසෙන් මුහුකුරා ගිය අයට විතරක් සුදුසු වැඩිහිටි ගණයේ චිත්‍ර‍පටියක්. මේ කතාව වාණිජ අරමුණු වෙනුවෙන් ටිකක් අඩු වැඩි කරලා ගන්න ඕන කියලා පොඩ්ඩක් වත් හිතන් නැතුව.. මෙවැනි සිද්ධියක් සිනමාවට ඇරන් ඇවිත් සිනමාව කිළුටු කළා..සමාජයට නිග්‍ර‍හ කළා කියලා මිනිස්සු කෑ ගහයිදෝ කියන කාරණේවත් හිතන් නැතුව..හිතපු දේ හිතපු විදියටම සිනමාවට නගපු එක ගැන අපි අධ්‍යක්ෂක රාම්ව ප්‍ර‍ශංසාවට ලක් කළ යුතුයි.

අනිත් පැත්තෙන් මේ ලෝකේ තනිවුණු කාන්තාවක් මොන මොන ප්‍ර‍ශ්ණ වලට මුහුණ දෙයිද..ඒ ප්‍ර‍ශ්ණ කොයි විදියට නිරාකරණය කර ගනියිද කියන ඉතා තීව්‍ර‍ චරිතයක් තමයි ඇන්ඩ්‍රියා රඟපාන්නේ. ඒ චරිතය හරියටම අඳුනාගෙන සුපිරි රඟපෑමක් කරනවා ඇන්ඩ්‍රියා. ඒ වගේම ප්‍ර‍ධාන නළුවා වසන්ත් රවී කියලා අළුත් කොල්ලෙක්. තමුන්ගේ චරිතය හොඳට රඟපෑවා. චිත්‍ර‍පටියේ ඉන්ටවල් එක හරියෙදි වසන්ත්ගෙයි ඇන්ඩ්‍රියාගෙයි සීන් එකක් තියනවා. හුඟක් දිගට යන ඒ සීන් එක සින්ගල් ෂොට් එක්කින් තමයි ඇරන් තියෙන්නේ. ඒ සිදුවීමේ රඟපෑම වේවා..දෙබස් වේවා..රූගත කරපු විදිය වේවා සුපිරියටම ඇරගෙන තියෙනවා. ඔය වගේ හුඟක් සීන් චිත්‍ර‍පටය පුරාවටම තියෙනවා. ඒ වගේම මේ චිත්‍ර‍පටය ගොනාගෙයි මීමාගෙයි කතාවක් කිය කිය පසුබිමින් අධ්‍යක්ෂක රාම් විටින් විට පසුබිම් කථනයක් සිදු කරනවා. ඒක චිත්‍ර‍පටියට අදාළ වුණත් නැතත්..බලන් ඉන්න අපිට නම් හොඳ ආස්වාදයක් ලබා දෙනවා. ඒ දෙබස් හිංදා සිනමා ශාලාව ඇතුලේ විසිල් සද්ද එහෙමත් ඇහුණා කියලා මට බලපු කෙනෙක් කිවුවා. ඔයාලා මේ චිත්‍ර‍පටය බැලුවොත් ඔයාලටත් ඒක දැනෙයි කියලා හිතෙනවා.ෆිලුමට සංගීතය සපයලා තියෙන්නේ යුවන් ෂංකර් රාජා.

චිත්‍ර‍පටයේ අඩුපාඩුවක් කියලා කිවුවොත්..චිත්‍ර‍පටයේ ප්‍ර‍ධාන නිළියගේ මට්ටමටම නළුවා හිටියාද කියලත් මට හිතුණා. දෙවෙනි භාගයේ නළුවා ෆෝන් එකක් ඇරන් අරයාට මෙයාට කතා කර කර ඉන්නවා, පොලිසිය එයාව ෆලෝ කරනවා වගේ සීන් ටිකක් හින්දා කතාවෙන් පිට පැන්නා වගෙත් දැනුණා. නමුත් සාරාංශයක් විදියට මේ චිත්‍ර‍පටය කොහොමද කියලා ඔයාලා ඇහුවොත්.. මේ චිත්‍ර‍පටයට බලන කෙනාගේ මානසිකත්වය අනුව විවිධ අර්ථකතන දිය හැකියි. හැබැයි ඒ කිසි කෙනෙක් මේ චිත්‍ර‍පටය හොඳ නෑ කියලා නම් කියන එකක් නෑ. මේක හුඟක් වෙනස් කතාවක්..සහ මේ වගේ කතා ඉදිරියටත් ගෙන ආ යුතුයි. ඔබට මම අනිවාර්යෙන්ම මේ කතාව බලන්න කියලා ආරාධනා කරනවා..ස්ත්‍රී පුරුෂ දෙපාර්ශවයටම ආරාධනා කරනවා. නිසැකවම ඔබට අමුතුම අත්දැකීමක් ලබා දෙනවා ඇති.

මට නම්..මගේ ජීවිතේ මම ආදරය කරන කාලයේ කරපු කියපු යම් යම් දේවල්..වෙනත් තැනක ඉඳන් මං දිහාම බලාගෙන ඉන්නවා වගෙත් දැණුනා. මගේ අඩුපාඩු හුඟක් මම මේ චිත්‍ර‍පටිය බලලා තේරුම් ගත්තා. ඒ වගේම මේ චිත්‍ර‍පටිය බලද්දි කාන්තාවන්ට අපි මෙයිට වඩා ගරු කළ යුතුයි, ඔවුන්ව හොඳින් තේරුම් ගත යුතුයි කිය හැඟීමක් ඇතිවුණා. ඒකයි මම වැඩ රාජකාරි අතරේ වුණත් මේ ෆිලුමට උපසිරසිය දාන්න බාර ගත්තේ.

ස්තුතියි !

 

 

 

 

Due to copyright issues, we do not provide any torrent links.

මෙම ලබා දී ඇති උපසිරසි HD පිටපත් සඳහා වලංගු වේ.

10,765 downloadsDownload Taramani-2017_2.zip66 KB

 

https://d36zzuvfojr38z.cloudfront.net/wp_content/uploads/2014/01/Indrajith-Udayakumara.jpg මේ ලබා දී ඇති සිංහල උපසිරැසි පිළිබද “ඉන්ද්‍රජිත් උදය කුමාර” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

Subtitle Contributor Rank

SILVER MEMBER
JOINING DATE – 2013-10-29
SUB MAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.