The Entitled (2011) | සෙල්ලමක් නෙවේ…

කවදමහරි කාටමහරි හිතුණොත් මේ සමාජ ක්‍රමය මහා අසාධාරණයි කියලා; ඒ කෙනා මොනවනම් කරන්නද? විප්ලවයක් කරන්න, රොබින්හුඩ් වගේ පෝසතුන්ගෙන් අරන් දුප්පතුන්ට දෙන්න, අඟේ ඉඳන් කන කන්න. මේ වගේ විකල්ප අවස්ථා රාශියකින් තම ‍තෝරාගැනීම කුමක්ද කියන එක ගැන තීරණය කරන්නේ කොහොමද? එක එක්කෙනා තම තමන්ගේ තීරණය ගැන නිගමනයට එන්නේ එකම හේතු සාධක මුල් කරගෙන නෙමේනේ.

කෙනෙක් විප්ලවයක් කරන්න තීරණය කරන්නේ දීර්ඝ කාලීන බලපෑමක් ගැන හිතලා වගේම ඒකට අවශ්‍ය පසුබිම ගැන සෑහීමකට පත්වුණායින් අනතුරුවයි. රොබින්හුඩ් වගේ වෙන්නේ සෑහෙන තරම් පිරිස් බලයක් නැතිව වුණත් සමාජ අසාධාරණය ගැන මනා අවබෝධයක් සහ කැක්කුමක් ඇති වුණොත් තමයි. අඟේ ඉඳන් කන කන්නේ හීන් නූලෙන් තමන්ගේ වැඩේ කරගන්න අරමුණින්. එහෙමත් නැතිනම් තියෙන්නේ කප්පම් අරගන්න. කප්පම් ගන්නව කිව්වට ඒකත් ඒ හැටි ලේසි පාසු වැඩක් නෙමේනේ. සල්ලි වැඩි කට්ටියගෙන් සල්ලි ටිකක් උදුර ගන්න හොඳම ක්‍රමේ මොකද්ද කියලා ඉස්සෙල්ලම ‍තෝරගන්න වෙනවා. ඒ කිව්වේ නිකම්ම සල්ලි ඉල්ලුවට දෙන්නේ නෑනේ; මොකක්හරි ඇපයක් තියාගන්න එපැයි. ඊටපස්සේ පොලිසියෙන් ගැළවීගෙන, හෝඩුවාවක් කාරිය තියන්නේ නැතිව, හොඳ නමත් ‍රැකගෙන, අහු නොවී සල්ලි ටිකත් අරන් පැනගන්නත් එපායෑ.

හොඳයි ඕන්න යාළුවෝ දෙන්නෙකුත් ලෑස්ති කරගෙන පෝසතුන් තුන්දෙනෙකුගේ ළමයි තුන්දෙනෙක් පැහැරගෙන ගියා කියමුකෝ. ඊට පස්සේ ඕන්න කප්පම ඉල්ලුවා කියමුකෝ තුන්දෙනාට සමසේ බෙදාගන්න හිතාගෙන. හැබැයි එහෙම නොවී මෙහෙම වුණොත්. ඒ කියන්නේ මේ වැඩේට ගාවගන්න යාළුවෝ දෙන්නටත් කීයක්වත් නොදී, පොලිසියත් නොමග යවන විදිහේ හෝඩුවා සපයලා, කප්පම දුන්නු කෙනාගෙත් හොඳහිත පළුදු කර නොගෙන, ඇපකාරයන් තමන්ව හඳුනා ගනී කියලා කිසි බයකුත් නැතිව ඒ අයගේ ගෙදරටම යන්නත් ඒ අයගේ නිවාඩු නිවස බලා කියාගන්න කෙනාව සැකයකට ලක් නොකර ඉන්නත් ඕනි වුණොත්. සෑහෙන ගේමක් දෙන්න වෙනවා ඒ වැඩේටනම්. එහෙම දෙයක් කරනවනම් නිකාම්ම නිකම් හිතුවකට මේ වැඩේ කොරල බෑනේ. මුල ඉඳලම හෙණ ප්ලෑනකුත් එක්ක, අතීශය රහසිගත විදිහේ වැඩ පිළිවෙළක් අවශ්‍ය වෙනවා.

එහෙම වැඩ ගැන ඔය අහන්න දකින්න ලැබෙන්නේ අපටත්. අහන්න දකින්න ලැබෙන්නේ ඒක එළිවුණොත්නේ, කාටවත් එළි නොවෙන ලෙස සිදුවෙන ඒවාත් ඇති ඉතිං ඔය අස්සේ. කෝක කොහොම වෙතත් මේ කතාව ඒ වගේ එකක්. හැබැයි කාටවත් එළිවෙන්නේ නෑම කියන්නත් බෑ. මොකෝ මේක බලන අය ඔක්කොම විස්තරේ දැනගන්න නිසා. හැබැයි හොඳ සූක්ෂම හැකියාවක් ඕනෙ වෙනවා මේ වගේ වැඩකට අවශ්‍ය ‍තෝරාගැනීම් සිදුකරන්න. මෙයා ඒ වැඩේ කරන හැටි දැනගන්න මේක බලමුකෝ.

ලිපියේ – උදා