The Goonies (1985) | අනුවණයෝ!

මට අපේ බයිස්කෝප් යාළුවන්ගෙන් පොඩි ප්‍රශ්නයක් අහන්න තියෙනවා. Steven Spielbergව අඳුනන්නේ කවුද? හපෝ…යි මොන මෝඩ ප්‍රශ්නයක්ද නේ? අද කාලේ අතදරුවෙකුගෙන් ඇහුවත් කියයිනේ Spielberg කියන්නේ කවුද කියලා.

හරි හරි ඒකෙන් කමක් නෑ. ඒක නෙමෙයි මම මේ කියන්න යන්නේ; Spielberg අද වනවිට Hollywood පුරවරයේ විතරක් නෙවෙයි, මුළු ලෝකයේම මහා දැවැන්ත චිත්‍රපට අධ්‍යක්ෂකවරයෙක්! ඒ වුණත් ඔහුත් මේ ක්ෂේත්‍රයේ හිමි හිමිහිට දුර ගමනක් ආපු කෙනෙක්, ඉස්-ඉස්සෙල්ලාම ඔහු මේ ගමන පටන්ගත්තේ තිරපිටපත් රචකයෙක් සහ සහය අධ්‍යක්ෂකවරයෙක් හැටියට. ඉතින් ඔහු මුල් කාලේ කරපු නිර්මාණ පසුකාලීන ඒවා තරම් ජනප්‍රියත්වයක් හෝ ආකර්ෂණයක් අද වනවිට හිමිකරගෙන නොතිබුණත් ඔහුගේ මුල් කාලීන නිර්මාණ අතරත් බොහොම ලස්සන කතා ‍රැගත් සිනමාපට තිබෙනවා.

ඕං මම දැං මේ කියන්න යන්නේත් ආං ඒ වගේ නිර්මාණයක් ගැන. මේකේ නම The Goonies. ඒ කියන්නේ අනුවණයෝ. දැං ඔයාලට තේරෙනව ඇති මම මුලින් අර වගේ ප්‍රශ්නයක් ඇහුවේ ඇයි කියලා. මේක එක අනුවණයෙක් ගැන කතාවක් නෙමේ අනුවණ-පුරයක් ගැන කතාවක්! ඒ කියන්නේ මේ නගරෙ නම තමයි Goonies. ඉතිං මේ නගරයේ ඉන්නව මහ එපාකරපු, එක-එක විදිහේ, පොඩි එවුන් රංචුවක්. දවසක් දා එයාලට එක් කෙනෙකුගේ නිවසේ තිබිලා පරණ සිතියමක් හම්බෙනවා, මේක මුහුදු-කොල්ලකාර වස්තුවක් ගැන සඳහන් වෙන සිතියමක්. මේ වෙනකොට ඔවුන්ගේ නගර භූමිය මත නිවාස සංකීර්ණයක් හදන්න කටයුතු සිද්ධවෙලා හමාරයි. ඉතිං මේ දඟකාරයෝ ‍රැළ තමන්ගේ උපන්ගම දාලා යන්න තියෙන අමනාපය කොයිතරම්ද කියනවනම් ඔවුන් තීරණය කරනවා මේ නිධානය සොයා යන ගමන අරඹන්න. මේ අතරේ ඔවුන් තක්කඩි පවුලකට මැදිවෙනවා. නීතිවිරෝධී වැඩකරන මේගොල්ලන්ගේ රහස් තිප්පොළ හරහා තමයි මේ නිධානයට මග වැටිල තියෙන්නේ. ඉතිං මේ අයත් එක්ක හැප්පෙන්න මේ කට්ටියට පුලුවන් වෙයිද? නිධානය කාට අයිති වෙයිද? කොල්ලකාරයෝ තමන්ගේ මහන්සිය ආරක්ෂා කරගන්න යොදපු ‘ගැටවලින්’ මේ අය කොහොම බේරී ගනීද?

හැබැයි මට එක දෙයක් සහතික කරලා කියන්න පුලුවනි. ඒ තමයි මේ කතාව මුල ඉඳං අගට යනකං කිසි කම්මැලිකමක් නැතිව බලන්න පුලුවන් කියන එක. බොහොම ආකර්ෂණීය, කුතුහලයෙන් පිරුණු කතාවක් බවනම් මම වගකීමෙන්ම කියනවා.මේක බොහොම ලස්සන කතාවක් පොඩි අයට බොහොම විනෝදයක් ගෙනදේවි. සිනහව, ත්‍රාසය, කුතුහලය, මෝඩකම් පිරිලා. ඉතිං බලලම කියමු මේකේ හොඳ නරක.

තව පොඩිදෙයක් මේක 1985 තිරගත වුණු චිත්‍රපටයක්, මේකේ ඉන්න නළු නිළියෝ ගැන කිව්වොත් එහෙම Sean Astin ප්‍රධාන රංගනයෙන් සහ Josh Brolin, Jeff Cohen, Kerri Green වැනි අය අවශේෂ රංගනයෙන්ගෙනුත් දායකවෙලා තියෙනවා. IMDB-වල මනාප 62,493ක් සමගින් 7.5ක අගයක් හිමි කරගෙන තියෙනවා. අපි බලමු මුල් කාලීන Steven Spielbergට ඔබව කොයි-අයුරින් ග්‍රහණය කරගන්න හැකි වේවිද කියලා….

ලිපිය – උදා