A Knight of the Seven Kingdoms [S01: E02] Sinhala Subtitles | අන්තේවාසික එග් [සිංහල උපසිරැසි] 18+

අද ගෙනාවේ කතාමාලාවේ දෙවැනි කොටසයි. කතාවේ කුතුහලය තියෙන්න ඕනි නිසා කතාවක උන සිදුවීම් ඊළඟ කතාවේ ලිපියෙන් සටන් කරන්න තීරණය කලා. පලවෙනි කතාවේ සාරංශයක් අවශ්‍ය නැති අය කෙලින්ම සබ්ටයිටල් ෆයිල් එක ඩවුන්ලෝඩ් කරගන්න. පළමු කොටසේ නම උ​නේ “The Hedge Knight”. මේ නම යොදාගෙන තියෙන්නේ ජෝර්ජ් ආර්. ආර්. මාටින්ගේ “Tales of Dunk and Egg” කතා මාලාවේ එන පළමු කෙටි නවකතාවේ නම ඇසුරෙන්. මේ මුළු කතා මාලාවම නිර්මාණය වෙන්නේ මාටින්ගේ ඩන්ක් සහ එග් කතාන්දර පදනම් කරගෙනයි. මේ කතා එකතුව පොදුවේ හඳුන්වන්නේ “A Knight of the Seven Kingdoms” කියලා. ඒ නම තමයි මේ ටීවී සිරිස් එකේ නම විදිහටත් පාවිච්චි කරන්නේ. හැබැයි සැබෑ කතාව ඇතුළේ පළමු පොතේ නම වෙන්නේ “The Hedge Knight”.

කතාව ඇතුළේ මේ නම පාවිච්චි වෙන්නේ අපේ වීරයා වන “සර් ඩන්කන් ද ටෝල්” (Ser Duncan the Tall) සහ එයාගේ මුල් ස්වාමියා වෙච්ච “සර් ආර්ලන්” (Ser Arlan of Pennytree) කියන දෙන්නටමයි. වෙස්ටරෝස් සහ Game of Thrones ලෝකයේ “Hedge Knight” කෙනෙක් කියන්නේ ස්වාමියෙක් නැති, තැනින් තැන යන (wandering) නයිට්වරයෙක්ට. සාමාන්‍යයෙන් ඉඩම් හිමි නයිට්වරු (Landed Knights) ඉන්නේ මාළිගාවල ස්වාමිවරු යටතේ සේවය කරමින්. හැබැයි ඊට හාත්පසින්ම වෙනස්ව, මේ හෙජ් නයිට්වරු රාජධානි හත පුරාම ඇවිදිනවා රස්සාවක් හොයාගෙන. කෙටියෙන්ම කිව්වොත්, එක් ස්වාමියෙක්ගෙන් තව ස්වාමියෙක් ළඟට ගිහින්, තාවකාලිකව වැඩ කරලා, ආයේ තව තැනකට යන නයිට්වරු ජාතියක් තමයි මේ. කොහොම වුණත් ඩන්ක් කියන්නේ ඒ වගේ කෙනෙක් නෙවෙයි. එයා අන්ත දුප්පත්. මේ කතා මාලාවේ වැඩි හරියක් ගෙවෙන්නේ එයා තමන්ගේ ඒ දුප්පත්කම එක්ක පොරබදන ගමන්, කොහොම හරි තමන්ගේ ඉලක්ක ජයගන්න දරන උත්සාහය ගැනයි.

ඔයාලා මතක තියාගන්න ඕන දෙයක් තමයි, මේ වෙලාවේ රාජධානියේ සාමාන්‍ය ජනතාව ඉන්නේ ටාගේරියන් පවුලේ ප්‍රශ්න නිසා ඇති වුණු දරුණු සිවිල් යුද්ධ දෙකකින් හොඳටම හෙම්බත් වෙලා. හැබැයි මේ මොහොතේ රජකරන්නේ II වන ඩේරොන් රජතුමා. ඔහු සාපේක්ෂව ජනප්‍රිය රජ කෙනෙක්. ඒ වුණාට House of the Dragon කාලෙන් පස්සේ වෙස්ටරෝස් වල බලය රැකගන්න ටාගේරියන් පවුල ඇතුලේ ගොඩක් වෙනස්කම් වෙලා තියෙනවා. මොකද මේ කාලය වෙද්දී රාජධානියේ හිටපු අන්තිම මකරා මැරිලා ගොඩක් කල් ගත වෙලා ඉවරයි.

පළවෙනි එපිසෝඩ් එක පටන් ගත්​තේ එයා පොඩි කාලේ ඉඳන් සේවය කරපු (Squire කෙනෙක් විදිහට හිටපු) ‘සර් ආර්ලන්’ව (Sir Arlan of Pennytree) භූමදාන කරන තැනින්. සරලවම කිව්වොත් ආර්ලන් එයාව හදා වඩා ගත්තේ කවදා හරි නයිට්වරයෙක් කරන්න බලාපොරොත්තුවෙන්. හැබැයි කතාව අන්තිමට මේ ගැන පොඩි විහිලු සහගත ඉඟි කිහිපයක් දකින්න ලැබෙනවා. ඒ කියන්නේ ඇත්තටම ආර්ලන් මැරෙන්න කලින් ඩන්ක්ව නයිට් කෙනෙක් කළාද? එහෙම නැත්නම් ඩන්ක් බොරු කියලා මේ තරඟෙට (Tourney) රිංගන්න හදනවද? කියන එක ගැන. තමන්ගේ ස්වාමියාගේ සොහොනින් සමුගෙන ‘ද රීච්’ (The Reach) හි පිහිටි ඇෂ්ෆර්ඩ් පිටිය බලා පිටත් වෙනවා. මේ ප්‍රදේශය පාලනය කරන්නේ හයිගාඩ්න් හි ටයිරෙල් (Tyrell) පවුල විසිනුයි. අපේ ඩන්ක්ගේ දැන් අරමුණ තමයි ඇශ්ෆර්ඩ් පිටියේ තියෙන තරඟාවලියට සහභාගී වෙන එක. තරඟාවලියට යන අතරමගදී තානායමක නවතින ඩන්ක්ට, පුදුම හිතෙන විදිහට ඔලුව බූ ගාපු පොඩි පිරිමි ළමයෙක්ව මුණගැහෙනවා. ඩෙක්ස්ටර් සොල් ඇන්සෙල් (Dexter Sol Ansell) රඟපාන මේ ළමයා තමයි එග් (Egg).

ඕනෑම නයිට්වරයෙකුට සේවකයෙක් (Squire) ඕන නිසා, එයා අහනවා ඩන්ක්ගේ සහායකයා විදිහට මේ ත්‍රාසජනක ගමනට එකතු වෙන්නද කියලා. එග් කියන්නේ එයා King’s Landing වල ඉඳන් ආපු කෙනෙක් කියලා. ඉතින් ඩන්ක් හිතාගන්නේ මෙයත් තමන් වගේම Flea Bottom වල ඉන්න අනාථ දරුවෙක් කියලා. හැබැයි එයා හිතාගෙන ඉන්න විදිහ වැරදියි (ඒ වුණාට ඉස්සරහට වෙන්න තියෙන දේවල් ගැන කියලා මම කතාවේ කුතුහලය නැති කරන්න යන්නේ නෑ). තමන්ට සහායකයෙක් ඕන නෑ කියලා ඩන්ක් මේ ළමයාට ටිකක් සැර කරලා කියනවා. ඊට පස්සේ එයා තනියම ඇෂ්ෆර්ඩ් පිටිය (Ashford Meadow) බලා පිටත් වෙනවා. මඟ පෙන්වන්න ස්වාමියෙක් නැති නිසා එයා ඉන්නේ අතරමං වුණු ගානට. වටේම නයිට්වරු, ස්වාමිවරු, ආර්යාවන් වගේම ගණිකාවනුත් (Ladies of the night) ඉන්නවා. අතේ පිච්චියක් නැති මේ ඩන්ක් උත්සාහ කරන්නේ මේ හැමෝගෙන්ම බේරිලා පාඩුවේ ඉන්න. හැබැයි එතනදී එයාට මුණගැහෙනවා හොඳටම කේන්ති ගිහින් ඉන්න ස්වාමියෙක්ව, ඒ තමයි සර් ස්ටෙෆන් ෆොසවේ (එඩ්වඩ් ඈෂ්ලි).

එයා ඩන්ක්ට සටනකට එන්න කියලා අභියෝග කරනවා. හැබැයි අපේ වීරයා බොහොම ආචාරශීලීව ඒක ප්‍රතික්ෂේප කරනවා. එතනින් නික්ම යන ඩන්ක් රූකඩ සංදර්ශනයකට ගොඩවෙනවා. එහි කාන්තාවක් කවි ගායනා කරන අතරේ රූකඩ මකරුන් විශාල ගිනි ජාලා පිට කරනවා. ඇය නමින් ටැන්සෙල්. ටැන්සින් ක්‍රෝෆර්ඩ් (Tanzyn Crawford) විසින් රඟපාන ඇය ඩෝර්න් දේශයෙන් පැමිණි රූකඩ ශිල්පිනියක්. ඩන්ක්ගේ හිත ඇය වෙත ඇදී යන බව පැහැදිලිවම පෙනෙනවා. නමුත් ඩන්ක් මෙතැනට ඇවිත් ඉන්නේ අශ්වයින් පිටේ යන සටන් (Joust) සහ අනෙක් සටන් වෙනුවෙන් ඉදිරිපත් වෙන්න නිසා, තරඟකරුවන්ගේ ලැයිස්තුවට ඇතුළත් වෙන්න ඔහු උත්සාහ කරනවා.

තරඟ සංවිධායක ප්ලමර් (Tom Vaughan-Lawlor), තමන්ගේ නයිට් තනතුර ගැන බොරු කියන ඕනෑම කෙනෙකුට ‘Ashford Chair’ මගින් ඉතා දරුණු මරණයක් අත්කර දෙන බවට තර්ජනය කිරීමෙන් පසුව, තරඟයට ඇතුළත් වීමට නම් ඩන්ක් වෙනුවෙන් කවුරුන් හෝ සහතික විය යුතු බව ඔහුට පවසනවා. ඩන්ක් නයිට්වරයෙක් බවට පත් වුණේ සර් ආර්ලන්ගේ මරණ මංචකයේදී විතරයි. ඕනෑම නයිට්වරයෙකුට තවත් නයිට්වරයෙක් පත් කළ හැකි බව ඇත්ත වුණත් (උදාහරණයක් විදිහට ජේමි ලැනිස්ටර් විසින් බ්‍රියෑන්ව නයිට්වරයෙක් කිරීම ව​ගේ), ඩන්ක්ගේ සිදුවීමට සාක්ෂිකරුවන් කවුරුත් හිටියේ නෑ. ඩන්ක් කියන්නේ හෙජ් නයිට්වරයෙක්. ඒ කියන්නේ ඉඩම් හෝ තනතුරු නැති, තැනින් තැන යන, සතේ අතේ නැති කෙනෙක්. ඒ වගේම එයාගේ නම කවුරුත් දන්නෙත් නෑ. කොහොම වුණත් සර් ආර්ලන් වරක් මැන්ෆ්‍රඩ්ගේ පියා යටතේ සේවය කරපු නිසා, තමන් වෙනුවෙන් සහතික වෙන්න පුළුවන් සර් මැන්ෆ්‍රඩ් ඩොන්ඩේරියන්ව හොයාගන්න ඩන්ක්ට සිද්ධ වෙනවා.

ඩන්ක් ස්වාමියාගේ කූඩාරම වෙත පැමිණෙන විට, ගැහැ​ණූ දෙන්නෙක් ඔහුට පවසන්නේ මැන්ෆ්‍රඩ් නිදාගෙන සිටින බවයි. පසුව බලන විටත් එ​යා තවම නිදි. අවසානයේ ඩන්ක්ට ඔහුව මුණගැසුණු විට, නයිට්වරයා ඔහුට සමච්චල් කරමින් පවසන්නේ සර් ආර්ලන් පිළිබඳ තමාට කිසිදු මතකයක් නැ​ති ව​ග.

නමුත් ඩැනියෙල් ඉන්ග්ස් (Daniel Ings) විසින් රඟපාන ලයන්ල් බරතියන් චරිතය (Lyonel Baratheon) සම්බන්ධයෙන් නම් ඩන්ක්ට ඊට වඩා වාසනාවක් තියෙනවා කියලා පේනවා. පොත්වලට සාපේක්ෂව මෙහි යම් යම් වෙනස්කම් තිබුණත්, ‘Laughing Storm’ (සිනාසෙන කුණාටුව) චරිතය හඳුන්වා දෙන ආකාරය ඉතා අපූරුයි. ඔහු ඉතා ප්‍රබල, ආකර්ෂණීය සහ දඩබ්බර චරිතයක්. හරියටම රොබට් බරතියන් වගේම ජීවිතේ සැප සම්පත් උපරිමයෙන් විඳින කෙනෙක්. ලයන්ල් කාරුණික වගේම බොරු ආටෝප නැති කෙනෙක්. ඩන්ක් එතනට ඇවිත් ඉන්නේ ඔහුව මරන්නවත්, ඉල්ලීමක් කරන්නවත් නොව, රෑ කෑම වේලක් බලාපොරොත්තුවෙන් පමණක් බව දැනගත් විට, ඔහු මේ තරුණ නයිට්වරයාව සාදරයෙන් පිළිගන්නවා. ‘ඔයා නටන්න කැමතිද?’ ලයන්ල් විමසනවා. ‘කවුද අකමැති?’ යැයි ඩන්ක් පිළිතුරු දෙනවා.

ඊළඟට එන නැටුම් ජවනිකාව සාර්ථක වෙන්න ලොකුම හේතුවක් වෙන්නේ ඉන්ග්ස්ගේ (Ings) ආකර්ෂණීය රඟපෑමයි. සාදයේ හිටපු විවිධ කාන්තාවන් එක්ක නැටුවට පස්සේ, ඩන්ක් සහ ලයන්ල් පොඩි සටන්කාමී නැටුමක යෙදෙනවා. බරතියන් වේගයෙන් කැරකෙන ගමන් උත්සාහ කරන්නේ මේ තරුණයාගේ කකුල පාගන්නයි. හැබැයි ඩන්ක් එයාට වඩා නම් දක්ශ​යි. යෝධයෙක් වුණාට ඩන්ක්ගේ වේගය ගැන පොඩි ඉඟියක් එතනදී ලැබෙනවා වගේම, ඒකෙන් ලයන්ල්ගේ හිතේ ඩන්ක් ගැන යම් ගෞරවයක් ඇතිවෙනවා. පස්සේ වෙලාවක මේ දෙන්නා කතාබහකට යොමුවෙනවා. එතකොට ඩන්ක් ඉන්නේ ලයන්ල්ගේ අං තියෙන ඔටුන්න (stag crown) දාගෙන. ස්ටෝම්ලෑන්ඩ්ස් (Stormlands) වල අධිපතියා ඉන්නේ හොඳටම වෙරි වෙලා වැනි වැනී. පැහැදිලිවම දැන් ඩන්ක් ඇෂ්ෆර්ඩ් පිටියේ තනි වෙලා නෑ. හෙජ් නයිට් කෙනෙක්ට යාලුවෝ ඉන්න එක කොහොමත් වටිනවානේ.

ඔහු ආපසු කඳවුරට එන විට, ගින්නක් දල්වා ඇති බවත් අර හුරුපුරුදු තට්ට හිස එතැන ඇති බවත් පෙනෙනවා. මේ ළමයා තමන් පසුපස පැමිණීම ගැන මුලදී නම් ඩන්ක්ට තරහ යනවා. නමුත් එග් ඉන්නේ තමන්ට කන්න දෙන එකට හිලව් වෙන්න වැඩ කරන්න ලොකු උවමනාවකින්. එයා ඩන්ක්ගේ ඇඳුම් සෝදලා, අශ්වයන්ව පිරිසිදු කරලා, හොඳට ගින්නක් පත්තු කරලා, මාළු වගයකුත් අල්ලගෙන එයාගේ අනාගත ස්වාමියා වෙනුවෙන් උයලයි තියෙන්නේ. අකමැත්තෙන් වුණත්, ඩන්ක් එයාව භාරගන්න එකඟ වෙනවා. ඒක හරිම සුන්දර මොහොතක්. එයා පොරොන්දු වෙනවා එග් තමන්ගේ සහායකයා විදිහට ඉන්න තාක් කල් කවදාවත් බඩගින්නේ තියන්නේ නෑ කියලා (කන්න තියෙන කෑම එච්චර රස නැති වුණත්). එයාට කවදාවත් අදින්න ඇඳුම් නැති වෙන්නේ නෑ, හැබැයි ඒවා රළු ලොම් රෙදි වෙන්න පුළුවන් වගේම අඳින්න එච්චර පහසු නැති වෙන්න පුළුවන්. වැදගත්ම දේ තමයි, එයා පොරොන්දු වෙනවා කවදාවත් මේ ළමයාට ගහන්නේ නෑ කියලා. අපි දන්නවා එයා ඒක කියන්නේ අවංකවමයි කියලා. එයා තමන්ගේ පරණ ස්වාමියාට ගොඩක් ගරු කළත්, ඒ ​ලැබුනු හිරිහැර කිරීම් තව කෙනෙක්ට කරන්න තරම් ඩන්ක් නපුරු කෙනෙක් නෙවෙයි.

මේ අතරේ එග් තමන්ගේ බුද්ධිමත්කම පෙන්නනවා. එයා දන්නවා කොහොමද මේ තරුණ නයිට්වරයාව හරි පාරට ගන්නේ කියලා. කතාව ඉවර වෙද්දී, ‘සර් ඩන්ක්’ කියන නම ‘සර් ඩන්කන්’ බවට පත් වෙල​ත් ඉවරයි. එග් ‘කොහේ ඉන්න සර් ඩන්කන්ද?’ කියලා අහනකොට, ඩන්ක්ට මතක් වෙනවා ලයන්ල් බරතියන් එයාට කොන්ද නමාගෙන ඉන්න එකට බැනපු හැටි. ‘දෙවියෝ උඹට උස දීලා තියෙනවා නම්, කෙලින් හිටපන්!’ කියලා ඒ ස්වාමියා අණ කළා වගේම, දෙවියන් දුන්න දේ ප්‍රතික්ෂේප කළාට දඬුවම් කරනවා කියලත් තර්ජනය කළා. ඩන්ක් කෙලින් වී, ‘සර් ඩන්කන් ද ටෝල්’ (Ser Duncan the Tall) යැයි පවසනවා.

පස්සේ වෙලාවක එයාලා තරු යට හාන්සි වෙලා ඉන්නකොට, කඩාවැටෙන තරුවක් දකිනවා. එග් එයාගේ අලුත් ස්වාමියාට කියනවා කඩාවැටෙන තරුවක් කියන්නේ වාසනාව කියලා. එයා පෙන්නලා දෙනවා අනිත් හැම නයිට් කෙනෙක්ම, ස්වාමියෙක්ම එයාලගේ කූඩාරම් ඇතුලේ නිදාගෙන ඉන්නේ කියලා. ඩන්ක් කේන්තියෙන් වගේ කියනවා කතාව නවත්තලා නිදාගන්න කියලා. ඊට පස්සේ තමයි එයාට තේරෙන්නේ එග් කිව්ව දේ තේරුම. ‘ඒ කියන්නේ ඒ වාසනාව තියෙන්නේ අපිට විතරද?’ කියලා එයා පුදුමෙන් වගේ අහනවා. නයිට්වරයාට එහා පැත්තේ ගුලි වෙලා ඉන්න එග්, හිනා වෙනවා.

ඔන්න එහෙමයි පළවෙනි කතාව සිද්දවුනේ. අදකතාවේ වෙන්නේ මොනවද කියලා දැනගන්න එක කතාව බලන ඔයාට භාරයි. වෙනදාවගේම අද කතාවත් රසවිඳින්න කියලා ඔයාලට ආරාධනා කරනවා. මේ එපිසෝ​ඩ් එකේ ඩිරෙක්ට් ලින්ක් අපේ බයිස්කෝප් ඩව්න්ලෝඩ්ස් එකෙන් වගේම ටෙලිග්‍රෑම් එකෙනුත් ගන්න පුළුවන්.

ඊළඟ එපියෙන් හමුවෙමු.

 

 

*-* ජය ශ්‍රී *-*

 

 

 

 

Due to copyright issues, we no longer provide any torrent links.

මෙම ලබා දී ඇති උපසිරස WEBRip පිටපත් සඳහා ආදාළ වේ.

6,089 downloadsDownload Knight.of_.the_.Seven_.Kingdoms.2026.S01E02.zip17 KB

 

මේ ලබා දී ඇති සිංහල උපසිරැසි පිළිබද “යසිරු හසරංග” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

 

 

Subtitle Contributor Rank

SILVER MEMBER
JOINING DATE – 2015-10-23

SUBMAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.