Masoom [S01 : E03 & E04] Sinhala Subtitles | අනාරාධිත අමුත්තෙක්, මැදියමේ වෙඩි හඬක් [සිංහල උපසිරසි]

Disney Hotstar වෙතින් ඉතාම මෑතකදී මුදාහැරුණු Thriller Mystery ගණයේ හින්දි වෙබ් කතාමාලාවක් තමා අපි මේ බලාගෙන යන්නේ. කොටස් 6ක් විතරක් තියෙන මේ කතාමාලාවම එක හුස්මට කුතුහලයෙන් බලාගෙන යන්න පුළුවන් විදිහේ එකක් කියලා නිර්දේශ කරලා ඉන්නම්කෝ. ඒ වගේම එක වරකට කොටස් දෙක ගානේ දෙන නිසා වැඩිය රස්තියාදු නොවී දවස් තුනක් ඇතුළත මේක ඉවරයක් කරන්නත් ඔයාලට පුළුවන්. සීසන් ගණන් ඇදෙන නිර්මාණයකුත් නෙමේ පේන හැටියට නම්. ඉතින් ඔය හැමෝටම Masoom එක්ක එකතු වෙන්න කියලා ආරාධනා කරන ගමන්ම හැරෙමු මේ කතාමාලාවේ පහුගිය කොටස් ගැන මතක් කරගන්න.

පලවෙනි කොටසේ ආරම්භය වුණේ තරුණියක් ඉවක් බවක් නැතුව පාර පුරා තමන්ගේ රිය පදවගෙන එන දර්ශනයකින්. ඒ සනා කියලා දැන් ඔය කවුරුත් දන්නවා. අනතුරක් නොවී සනා එදා බේරුණේ අනූනමයෙන්. කාර් එක සනා පදවාගෙන ආවේම ඇඬු කඳුළින්. හේතුව ඔයා දන්නවා. මෙච්චර කාලයක් එක්තැන් වෙලා හිටි සනාගේ අම්මා නැතිවෙලා. මේ හදිසියේම. අම්මා මැරෙන්න තරම් අසනීපෙකින් නොහිටි බව සනා හොඳටම දන්නවා. දුකත් කම්පනයත් සනාව හෙම්බත් කරලා තියෙද්දියි සනා ගෙදර එන්න පිටත් වුණේ එයාගේ වාහනෙන්ම.

මගදී සිද්ධ වෙච්ච දේත් එක්කලා සනාට මුණගැහුණු පොලිස් නිලධාරියා මතක ඇතිනේ. සනා කියන්නේ බල්රාජ් කියන වෛද්‍යවරයගේ දුව කියලා දැනගත්තම පොලිස් නිලධාරියා සනාව ගෙදරටම ගිහින් දානවා. සනා යද්දීත් අම්මගේ මිනිය ගෙනත් තිබ්බේ නැහැ. මුළු පවුල හිටියේ ගුප්ත නිහැඬියාවක. දොස්තර මහත්තයා සහ සනා අතර එච්චර උණුසුම් හමුවීමක් සිද්ධ වුණේ නැහැ. සනාගේ අක්කා සහ අයියා නම් සනාව පිළිගත්තේ තමන්ගේ දුක තුනී කරගන්න කෙනෙක් වැඩි වුණාට හිතේ උපන් කැමැත්තෙන්. සනා දුකින් වුණත් හිටියේ විමසුම් ඇස් වලින්. ද්වේශය පිරුණු සනාගේ ඇස් විටින් විට යොමු වුණේ එයාගේ තාත්තා දිහාට. මේ කාගේ කාගෙත් හිත් වල රහස් ගොඩක් තෙරපි තෙරපි තිබ්බ බව සනා වුණත් නොදැන හිටි දෙයක්.

දැන් එතැන් සිට…!!!