Khelein Hum Jee Jaan Sey (2010) with Sinhala Subtitles | මව්බිම නැතිනම් මරණය ! [සිංහල උපසිරැසි සමඟ]

කලින් එක වගේම ඔන්න මේ සැරෙත් මං ගෙනාවේ හින්දි චිත්‍රපටයක්. තුන්වැනි සිංහල උපසි‍රැසි නිර්මාණයට හින්දි එකක් දෙන්න අදහසක් නොතිබුණත් මේ චිත්‍රපටය බැලුවහම මට හිතුණා මේකට සබ් දැම්මොත් හොඳයි කියලා. එහෙම තමයි අද දවසේ දී මේක ඔයගොල්ලන්ගේ අතට එන්නේ.

IMDb Ratings වල 6.8/10 අගයක් ලබාගෙන තියෙන මේ චිත්‍රපටය Action, Drama, History යටතේ වර්ගීකරණය කරලා තියෙනවා. මෙහි නිමැවුම්කරුවා ගැන කියනවා නම් ඒ අපි හැමෝම දන්න Ashutosh Gowariker. මතක ඇතිනේ මෙයා හදපු Lagaan, Swadesh, Jodhaa Akbar වගේ චිත්‍රපට. මෙහි ප්‍රධාන නළු නිළි යුවල වන්නේ අභිෂේක් බච්චන් සහ දීපිකා පාදුකෝන්. චිත්‍රපටයේ මූලික විස්තර ටික එහෙම වෙද්දී දැන් අපි හැමෝම උනන්දුවෙන් බලාගෙන ඉන්න මේකේ කතාව මොකක්ද කියලත් ටිකක් දැන ගම්මු.

චිත්‍රපටයේ ප්‍රධාන කතානායකයා වන සූර්ජදා සෙන් කියන්නේ චිතගොන්වල ජීවත්වන ගුරුවරයෙක්. මෙයා ගුරුවරයෙක් වුණාට සූර්ජදා තමන්ගේ මුළු ජීවිතයම කැප කරලා තියෙන්නේ තම උපන් බිම වෙනුවෙනුයි. ඉන්දියාව බ්‍රිතාන්‍ය යටත් විජිතයක් විදිහට පවතිමින් විඳින වේදනාවන් ඔහුට තවදුරටත් ඉවසන්න බැරිවෙන්නෙත් මෙන්න මේ හේතුවෙනුයි. ඒ හින්දම මේ අසාධාරණකම්වලට එරෙහිව ක්‍රියාත්මකවීමේ අදහසින් සූර්ජදා තමන්ගේම වූ විප්ලවීය කණ්ඩායමක් නිර්මාණය කරගන්නවා. සරලවම කිව්වොත් මේක ආයුධ සන්නද්ධ කණ්ඩායමක්. හැබැයි මේකේ වැඩි හරියක්ම ඉන්නේ බාල වයස්කාර ළමුන්. ඒ වගේම කල්පනා සහ ප්‍රීතිලතා කියල තව කාන්තාවන් දෙදෙනෙකුත් මේ කණ්ඩායමට ඇතුළත්. සූර්ජදාගේ සැලැස්ම වන්නේ තම කණ්ඩායම මෙහෙයවා එක ‍රැයක් ඇතුළත චිතගොන්වල තියෙන බ්‍රිතාන්‍ය බලය ක්‍රියාත්මක වන ප්‍රධාන මර්මස්ථාන සියල්ලටම එක විට පහරදීමයි. ඒ හරහා බ්‍රිතාන්‍යයින්ගේ බලය හීන කරලා ඔවුන්ව චිතගොන්වලින් එලවා දැමීමයි ඔහුගේ අරමුණ. කණ්ඩායමේ බහුතරයක් වන විසේකාර කොලු රෑනකුයි කාන්තාවන් දෙදෙනෙකුයි එක්ක ඔහු තම සටන කොහොම මෙහෙයවයි ද ?, ඒක සාර්ථකවෙයි ද? ඒවගේම ඊට පස්සේ මොකද වෙන්නේ කියලත් ඔයාල දැනගන්න කැමති නම් මේ චිත්‍රපටය බලන්න කියල මං ආරාධනා කරන්න කැමතියි.

මීට අමතරව මේ නිර්මාණයට අදාළව කිව යුතු තවත් විශේෂම කරුණක් වන්නේ චිත්‍රපටය තුළ දිග හැරෙන සියලුම සිදුවීම් සහ ප්‍රධාන චරිත සියල්ල සැබෑ ඒවාය යන්නයි. එනම් Khelein Hum Jee Jaan Sey චිත්‍රපටයට පාදක වන්නේ 1930 වසරේ දී චිතගොන්හි සිදු වූ සැබෑ කතා ප්‍රවෘත්තියක්. Chittagong Uprising යනුවෙන් ප්‍රකට මේ සිදුවීම ගැන සමහරවිට ඔයාලත් අහලා ඇති. මේ තුළ දිග හැරෙන්නේ අන්න ඒ සැබෑ කතා පුවතයි. පසුකාලීනව මෙම සත්‍ය සිදුවීම Do And Die -The Chittagong Uprising 1930-34 (Manini Chatterjee) නම් ග්‍රන්ථයක් වශයෙන් එළිදැක්වුණු අතර චිත්‍රපටය සඳහා මූලිකව පදනම් වී ඇත්තේ ද මෙකී ග්‍රන්ථයයි.

Khelein Hum Jee Jaan Sey කියන්නේ සම්ප්‍රදායිකව අපි හැමදාම දකින විදිහේ හින්දි චිත්‍රපටයක් නෙවෙයි. ඒ හින්දම ඒකාකාරී හින්දි චිත්‍රපට බලල හෙම්බත්වෙලා ඉන්න අයටයි ඒකාකාරී බව හින්දම පුරුද්දක් වශයෙන් හින්දි චිත්‍රපට නොබලන අයටයි කියන දෙකොට්ඨාශයටම මේක බැලුවට පාඩුවක් නැතිවෙයි කියල හිතෙනවා. කොහොමවුණත් මුල ඉඳලම සතුට, සිනහව, කුතුහලය සමඟින් ඉදිරියට ඇදෙන මෙය අවසානයේ ඔයාලගේ ඇස්වලට පුංචි කඳුළක් එක් කරයි කියලත් හිතෙනවා. එහෙම නම් ඉඩ ලැබෙන විදිහට ඉස්සරහ දී තවත් චිත්‍රපටයක් සිංහල සබ් එක්කම අරගෙන එන බලාපොරොත්තුවෙන් මං ගිහිල්ල එන්නම්. හැමෝටම ජයවේවා!!!

 

 

Due to copyright issues, we do not provide any torrent links.

මෙම ලබා දී ඇති උපසිරසිය DVD පිටපත් සඳහා ලබා දි ඇත.

https://d36zzuvfojr38z.cloudfront.net/wp_content/uploads/2013/05/udara.jpg මේ ලබා දී ඇති සිංහල උපසිරැසි පිළිබද “කේ.යූ.ජී.උදාර” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

Subtitle Contributor Rank
NEW MEMBER
JOINING DATE – 2011/08/16