Kya Dilli Kya Lahore (2014) | මෙය ධෛර්යය හෝ තේජස පිලිබඳ කතාවක් නොවේ… [සිංහල උපසිරැසි සමඟ]

“ඔවුන් මුණගැසුනේ සතුරන් ලෙසටයි, නමුත් ඔවුන් වෙන්වූයේ මිතුරන් ලෙසටයි”

යුද්ධය……. ලෝකයේ ඇති වචන වලින් භයානකම වචනයක් බව අවිවාදයෙන්ම පිළිගත යුතු කරුණකි. එසේ වුවද අප ජීවත් වන ලෝකය තුළ යුද්ධ හෝ යුධමය සිදුවීම් වල නම් නිමක් නැති තරම්ය. ඉතින් අද මා ඔබ වෙත රැගෙන එන්නේද ලෝකයම දන්නා එවැනි යුධමය සිදුවීමක් අලලා නිර්මාණය වූ දැනට බොහෝ දෙනෙකුගේ පැසසුමට ලක් වෙමින් පවතින නිර්මාණයකි. මෙය නිර්මාණය වී ඇත්තේ ඉන්දු-පකිස්ථාන යුද්ධය පාදක කොටගෙනය.

යුද්ධය නමැති වචනය සමඟ එකිනෙක තදින් බැඳී පවතින තවත් වචනයකි, එනම් සොල්දාදුවන්ය. ඔවුන් නොමැතිව යුද්ධයක් සිදුවිය හැකිද? නමුත් යුද්ධයට යන සොල්දාදුවන් වර්ග ගණනාවකි. සමහරු සත්‍ය වශයෙන්ම ජාත්‍යාලයෙන් යුද්ධයට යන්නා අයයි, සමහරු වෙනත් දෙයක් කිරීමට නොමැති නිසා යුද්ධයට යාමට සිදු වන අයයි. තවත් සමහරුන් වෙනයම් කරුණක් නිසා හමුදාව වෙත බැඳුනද අවසානයේ තුවක්කුවක් අත දරාගැනීමට සිදුවන්නන්ය. අපගේ කථා නායකයන් දෙදෙනාද මම අවසානයේ කියූ වර්ගයන්ට අයත් වන දෙදෙනෙකි. ඔවුන් දෙදෙනාම සත්‍ය වශයෙන්ම බය ගුල්ලන්ය. පකිස්තානයේ යුධ සෙබලා වෙන කරන්නට දෙයක් නොමැති වීම නිසා හමුදාවට බැඳුන අයෙකි. ඉන්දියාවේ සෙබලා කෝකියෙක් වශයෙන් සේවයට බැඳුනෙකි. ඔවුන් ඔවුන්ගේ තුවක්කුව පත්තු කරන්නේ ඇත්තෙන්ම තමාගේ බිය පහකර ගැනීමට විනා සතුරන් නැසීම උදෙසා නොවේ. 

ඉහළ තනතුරක් විසින් පකිස්ථානු සෙබලා තර්ජනය කිරීමෙන් අනතුරුව එවනුයේ ඉන්දියානු කඳවුරේ ඇති වැදගත් ලිපිගොනුවක් රැගෙන යාමටයි.  එසේ පැමිණෙන ඔහුට ඉන්දියානු කෝකියා මුණගැසෙනුයේ ලිඳක් අසලදීය. ඔවුන්ගේ හමුව වුවද සිදුවන්නේ හාස්‍ය රසයකිනි, එහෙත් ඒ අවස්ථාව වුවද මෙම පුද්ගලයන් කව්රුන්ද යන්න මැනගැනීමට බොහෝසෙයින් ප්‍රමාණවත්ය.

චිත්‍රපටියේ පළවෙනි අර්ධයම ගෙවී යන්නේ හාස්‍යජනක වූත්, අර්ථවත් වූත් දෙබස් ගණනාවක් මැදිනි. ඔවුන් දෙදෙනා තුවක්කුවෙන් වෙඩි තබාගැනීම පසෙක තබා තමන්ගේ මුවින් වෙඩි තබා ගනිති. කෙනෙක් විටෙක අනෙක් අයගෙන් වූ වැරදි පෙන්වා සෙමින් තර්ක කරයි, එවිට අනෙකාද නිහඬව නොසිටියි. ඔහුටද තර්ක කිරීමට කරණු ගණනාවකි. මෙයින් පැහැදිලි වන්නේ යුද්ධය නමැති සිද්ධි දාමය එක් පාර්ශවයක් නිසා පමණක් සිදු නොවන බවයි. දෙපාර්ශවයෙන්ම සිදු කළ වැරදි බොහොමයකි. යුද්ධයට හේතු වී ඇත්තේ එයයි. ඒ දෙපාර්ශවය පමණක්ම නොව යුද්ධය සඳහා යුධ පිටියක් නිර්මාණය කරන්නන් පිරිසක්ද සිටියි. ඒ අප කව්රුත් දන්නා බලය නමැති සාගින්නෙන් දැවෙන දේශපාලඥයන් සහ රාජතාන්ත්‍රිකයන් මිස වෙන කව්රුන්ද.
ඇවිලෙන ගින්නට පිදුරු දමන්නෝ ඔවුන්ය,නමුදු එයින් අනිසි ප්‍රතිවිපාක හිමි වන්නේ එයින් තැලෙන්නේ අහිංසක ජනතාවයි, නැතහොත් කිසිදෙයක් කරකියාගත නොහැකි සොල්දාදුවන්ය.

මේ චිත්‍රපටිය සතුව ඇත්තේ චරිත 4 ක් පමණකි.නමුත් එයින් කියවෙන පණිවිඩය කියවෙන දෑ ඒ සා කුඩා නොවෙයි. ඔවුන්ගේ දෙබස් වලින් බොහෝ දෑ පැවසෙයි, ඔවුන්ගේ චරිත ලක්ෂණ කුමන ආකාරයේද, යුද්ධය යනු කුමක්ද, මිනිස් ක්‍රියාකාරකම් කෙසේ එයට බලපාන්නේද , යුද්ධයට මැදි වෙන පිරිස කව්රුන්ද, ඔවුන්ගේ හැසිරීම කෙබඳුද , යුද්ධය ඇති වීමට හේතු සාධක මොනවාද යනු එයින් කරණු කිහිපයක් පමණකි. ඇත්ත වශයෙන්ම මේ නිර්මාණය රස විඳීමෙන් මා උකහාගත් කරුණු කාරණා ස්වල්පයයි. ඔබට මෙය වෙනස් ආකාරයකින් දැනෙනු ඇති…ඔබට දැනෙන කරුණු කාරණා මා හට දැනුනු ඒවාට වෙනස් වනු ඇති. අවශ්‍ය වන්නේ ඔබගේ රසවිඳීමේ ශක්තිය පමණකි. එය අවසානයේ ඔබට කරණු රාශියක් පැහැදිලි කරදෙනු ඇති.  මෙය සම්පූර්ණයෙන්ම පාහේ සමාජය වෙත පණිවුඩයක් ඉදිරිපත් කිරීම සඳහා නිර්මාණය වූ, නාට්‍යමය සහ යුධමය නමැති වර්ගීකරණයට අයත් වන, එවැනි නිර්මාණ රසවිඳින්නන් අරඹයා නිර්මාණය කරන ලද අත්විතීය නිර්මාණයක් විනා වානිජමය අරමුණකින් හෝ සමාජයේ එක් කොට්ටාශයක් ගැරහීමට ලක් කිරීම උදෙසා කළ නිර්මාණයක් නොවෙයි. මෙය එවැනි චිත්‍රපට නරඹන ප්‍රේක්ෂකයන් අවසානය දක්වාම මේ චිත්‍රපටිය සඳහා ඇද බැඳ තබාගැනීමට තරම් සමත් නිර්මාණයකි. එය අන්තර්ජාතික චිත්‍රපටි දර්ශකයේ(IMDb) මේ නිර්මාණය සඳහා ලැබී ඇති 8.0 අගයෙන් වුවද ඔ‍බට නොවනුමානවම පැහැදිලි වනු ඇති.

ඉතින් මෙහි අවසානය කෙසේ සිදුවනු ඇතිද…. ලිපිගොනුව සොයා පැමිණෙන පකිස්ථානු සෙබළාට එය රැගෙන නැවතත් ආපසු යාමට හැකි වේවිද? ඔවුන්ගේ ඉරණම කෙසේ විසඳෙනු ඇතිද? එය දැනගැනීමට නම් ඔබට මෙය චිත්‍රපටිය රසවිඳින්නට සිදු වෙයි.

“ඔවුන් මුණගැසුනේ සතුරන් ලෙසටයි, නමුත් ඔවුන් වෙන්වූයේ මිතුරන් ලෙසටයි”

 ලිපිය- ඩිල්ශාන් කාලිංග

 

 

900 MB (BR) කොපිය මෙතනින් බාගන්න

42E8F043D38D3C1502FEA01948E42C6F583F2D44 ටොරන්ට් ලින්ක් ක්‍රියා නොකරයිනම් ඒ ලින්ක් එකට යටින් ඇති හෑෂ් (hash) එක google හි සෙවුමක් කරන්න. එවිට ලැබෙන ඕනෑම ටොරන්ට් අඩවියකින් එම ටොරන්ට් එක බාගත කරගන්න.

2,044 downloadsDownload Kya-Dilli-Kya-Lahore-2014.zip43 KB

 

https://d36zzuvfojr38z.cloudfront.net/wp_content/uploads/2013/11/hewa.jpg මේ ලබා දී ඇති සිංහල උපසිරැසි පිළිබද “හේවා ලුණුවිලගේ” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.