Rangoon (2017) with Sinhala Subtitles | මියන්මාර දේශයේ අබිරහස් රත්‍රන් ජාවාරම…! [සිංහල උපසිරැසි සමඟ]

 

ඉපදෙන්න හරිම ලේසියි…
මැරෙන එක ඊටත් වඩා ලේසියි…
ඒත්, ජීවත්වෙලා ඉන්න එක තමයි අමාරුම දේ!

මං ඉපදුනේ ඉන්දියාවේ නෙමෙයි… බුරුම දේශයේ. බුරුමයේ, රැන්ගූන් කියන හරි ලස්සන පුංචි ගම්මානයේ තමයි ඉපදුණු දවසේ ඉඳලා මං උස් මහත් වුනේ. අම්මයි, මමයි, නංගියි විතරයි බුරුමයේ හිටියෙ. තාත්තා හිටියෙ ඉන්දියාවේ. තාත්තට ඉන්දියාවේ, චෙන්නායි වල මාකට් එකේ බ්‍රෝකර් කෙනෙක් විදියට රස්සාවක් ලැබුණු නිසා, පොඩි කාලෙදිම අපිට ඉන්දියාවට යන්න සිද්ධවුණා. මම ජීවිතේටම දැනගෙන හිටියෙ අපි ජීවත් වෙච්ච ගම්මානය විතරයි. අන්තිමේදී, ඒකත් අත්හැරලා දාලා, කිසිම දෙයක් නොදන්න ඉන්දියාවට යන්න වුණා. ඒක තමයි මගේ ජීවිතේ පළවෙනි වෙන්වීම. දුක කියන්නෙ මොකක්ද කියලා එදා තමයි පළවෙනි වතාවට දැනුනේ.

බුරුමයේ ඉඳන් මං ඉන්දියාවට ආවේ, මගේ පණ වගේ හිටපු යාළුවා “චෝනි” වත් අත්හැරලා දාලයි. ඒ වගේ යාලුවෙක් මට ආපහු හම්බෙන එකක් නැහැ කියලයි මං හිතුවේ. ඒත්, එහේදී හම්බෙච්ච යාළුවො කට්ටියක් නිසා මගේ දුක ටිකක් හරි තුනී වුණා. කාලය ගෙවිලා ගියා. ගොඩක් දේවල් වෙනස් වුණා. මගේ ජීවිතේ වැදගත් කෙනෙක් මේ ලෝකෙන් සමුගෙන ගියා. මගේ යාළුවො හැමෝම එක එක විදියේ රස්සා කරන්න ගත්තා. මං විතරක් රස්සාවක් නැතුව, ඉබාගාතේ යන්න පුරුදු වුණා. පවුලක බර කරට ගන්න ඉන්න වැඩිමහල් පිරිමි දරුවා මේ විදියට රස්තියාදු ගහන කොට, ඒ පවුලට යන කල දසාව මොකක්ද? ඒත්, මට කියලා රස්සාවක් දෙන්න ඉන්නෙ කවුද?

දවසක් දෙවියන්ට මගේ මූණ බලන්න මතක් වෙලා තිබුණා. නොහිතපු විදියට මට රස්සාවක් ලැබුණා. මගේ තාත්තා කරපු විදියෙම බ්‍රෝකර් රස්සාවක්. මාකට් එකේ රත්තරන් බඩු කඩයක බ්‍රෝකර් කෙනෙක් විදියට රස්සාවක් මට ලැබුණා. කඩේ මුදලාලිගේ හිත දිනාගෙන, වැඩි කාලයක් නොයාම මං බිස්නස් එක අල්ලගත්තා. මුදලාලිත් එයාට වඩා මාව විශ්වාස කරන තත්වෙට පත් වුණා. මේ බැඳීම කොච්චර ගැඹුරට ගියාද කියනවා නම්, මුදලාලිට ප්‍රශ්නයක් වුනොත්, ඒක මගේ ප්‍රශ්නයක් විදියට සලකන්න තරම් මගේ හිතේ මුදලාලි කෙරෙහි භක්තියක් ඇති වුණා.

අන්තිමේදී, මුදලාලිගෙත් අවසරය ඇතිව එතනින් අයින් වෙලා, මගේම කඩයක් පටන්ගන්න හිතාගෙන ඉන්නකොට, අවසාන වතාවට මුදලාලි මගෙන් එකක එක වැඩකට එන්න කියලා කතා කළා. සිංගප්පූරුවේ ඉඳලා රජයට අහු නොවෙන්න ඉන්දියාට රත්තරන් ගෙනෙල්ලා, වැඩි මිළකට ඒවා මියන්මාරයේ විකුණලා, කෝටි ගාණක ලාභයක් ලබන එක තමයි එයාගේ සැලැස්ම වුනේ. බල්ලෙක් ගාණට සමාජයේ ගණන් ගන්නේ නැතුව හිටපු මාව සමාජයට එක්කගෙන ඇවිල්ලා, මාව සමාජයේ උඩම තැනක තියාපු මේ මනුස්සයා ඉල්ලීමක් කළාම මං කොහොමද බැහැයි කියන්නෙ? අනික බුරුමය කියන්නෙ මං නොදන්න තැනක්යැ? සම්පූර්ණ වගකීම මං බාරගත්තා. රජයේ පොලීසියේ, රේගුවේ, මේ හැමදෙනාගේම ඇස් වහමින්, අතිශය සූක්ෂම විදියට රත්තරන් ටික බුරුමයට අරගෙන ගිහිල්ලා, ඒවා විකුණලා සල්ලි අරගත්තා. දැන් ඉතිං වැඩේ ඉවරයි නේද කියලා සැනසුම් සුසුමක් හෙලුවා… නමුත් මං හිතුවා වැරදියි. ඊට පස්සේ තමයි හැම දෙයක්ම පටන්ගත්තේ. මේක තමයි මගේ ජීවිතය වෙනස් කරපු, තීරණාත්මක හැරවුම් ලක්ෂ්‍යය වුණේ. වෙච්ච දෙයක් හිතාගන්න බැරුව මගේ ඔළුව විකාර වුණා. කාට කියන්නද, මොනවා කරන්නද කියලා හිතාගන්න බැරුව, ජීවිතයේ කවදාවත් නැති තරමට අසරණ වුණා. අන්තිමේදී, මගේ ජීවිතේ හිටපු හොඳම යාලුවෙක් මාව දාලා සදහටම ඇස් දෙක පියාගත්තා. මට තිබුනේ ප්‍රශ්න තුනක් විතරයි… කොහොමද මෙහෙම වුණේ? ඇයි අපිට මෙහෙම කළේ? කවුද මෙහෙම කළේ?

Action, Thriller, Crime යන කාණ්ඩ නියෝජනය කරමින්, 2017 වර්ෂයේ ජූනි මස 9 වන දින තිරගතවීම ආරම්භ කරන ලද මෙම සිනමා සිත්තම, මෙම සටහන ලියවෙන මොහොත වන විට Imdb දර්ශකයේ 7.2 ක් වැනි අගයක් කරා ගමන් කිරීමට සමත්ව තිබෙනවා. චිත්‍රපටයේ ප්‍රධාන රංගන දායකත්වය දරනු ලබන්නේ, වර්තමාන දමිළ සිනමාවේ නැගී එන තරුවක් වන, Gautham Karthik විසිනි. මීට පෙර ඉන්දියානු රූපවාහිණි කතාමාළා තුලින් පමණක් ප්‍රේක්ෂක හමුවට පැමිණි Sana Makbul, ඇයගේ මංගල චිත්‍රපට රංගන දායකත්වය ලෙස මෙම සලරුවෙහි ප්‍රධාන නිළියගේ චරිතය හොබවනු ඇති. චිත්‍රපටය අධ්‍යක්ෂණය කරනු ලබන්නේ, Thuppakki (2012) චිත්‍රපටය සඳහා සහාය අධ්‍යක්ෂණය ලබාදුන් Rajkumar Periasamy විසිනි. චිත්‍රපටය නිෂ්පාදනය කරනු ලබන්නේ, ඉන්දීය සිනමාවට අමරණීය චිත්‍රපට රාශියක් දායාද කරන ලද AR Murugadoss සහ Fox Star Studios විසිනි.

මේ චිත්‍රපටය බොහොම විශේෂිත දමිළ චිත්‍රපටයක්. කවදා හරි දමිල චිත්‍රපටයක් තුලින් බුදු දහම ගැන දැක්වෙන දර්ශන දැකලා තියෙනවද? චිත්‍රපටයේ නළු නිලියන් විසින් බුදුන් වහන්සේ වන්දනා මාන කරන දර්ශන සහිත දමිළ චිත්‍රපට නරඹලා තියෙනවද? එහෙනම්, ඒ වගේ කළාතුරකින් දැකගන්න පුළුවන් දර්ශන සමුදායකින් සමන්විත වන චිත්‍රපටයක් තමයි මේක. බුරුම දේශය කියන්නෙ බුදුදහමින් මැනවින් පෝෂණය වුණු රාජ්‍යයක්. මේ දේශය තුල බුදුදහම පැතිරිලා තියෙන ආකාරය, මෙම චිත්‍රපටය තුලින් සිත් සනහාලන ආකාරයට මැනවින් නිරූපණය කර තිබෙනවා. දමිළ චිත්‍රපට නරඹන ඔබට මෙය නැවුම් වූ අත්දැකීමක් වන බැව් නොඅනුමානයි.

මේ චිත්‍රපටය උපසිරැසි ගන්වන්න හිතාගෙන හිටියත්, ටිකක් කම්මැලි කමින් තමයි හිටියෙ. මොකද මේක ඉංග්‍රීසි උපසිරැසිය එතරම් හොඳ මට්ටමක තිබුනේ නැහැ. අනිත් කාරණාව, ප්‍රසිද්ධම සිනමා තරු නැති දමිල චිත්‍රපටි වලට, චිත්‍රපටිය කොච්චර හොඳ වුනත් වැටෙන අදහස් ප්‍රමාණය බොහොම අඩු වෙලා තියෙනවා දැන්. ඒ නිසා මේ චිත්‍රපටය කොච්චර හොඳ වුනත්, කරම්දෝ නොකරම්දෝ කියන දෙගිඩියාවෙන් හිටියෙ. ඒ වෙලාවේ තමයි හසන්ත අයියා මැසේජ් එකක් දාලා ඇහුවේ, මේක කරමුද කියලා. හැමදාමත් බැහැයි කියන්න බැරි නිසා ඔන්න මේක උපසිරැසි ගන්වලා අරගෙන ආවා. 😀

එහෙනම්, කැමති අය අරගෙන බලන්න. වෙනස්ම විදියේ අත්දැකීමක් වේවි අනිවාර්‍යයෙන්ම. චිත්‍රපටයේ පළවෙනි අර්ධය නම් වැඩි කුතුහලයක් නැහැ. සාමාන්‍ය විදියට, ඒත් කම්මැලිකමක් නැතුව මුල් අර්ධය නරඹන්න පුළුවන්. මතක තියාගන්න… චිත්‍රපටයේ විවේක කාලයට පෙර අවසාන මිනිත්තු දෙක තුන… චිත්‍රපටයේ කතාව සම්පූර්ණයෙන්ම උඩු යටිකුරු වෙනවා. කෙටියෙන් කියනවා නම්, කරකවලා කරකවලා, උඩ තට්ටුවකින් පහලට අත්හැරියා වගේ අත්දැකීමක් ලබාගන්න පුළුවන්. තත්පර කීපයක දර්ශනයකින්, ප්‍රේක්ෂකයා පුටුව උඩ හිඳුවන්න තරම් ක්ෂණික තිගැස්මක් සමගින් අවසාන වන චිත්‍රපටයේ පළමු අර්ධය, දෙවැනි අර්ධයේ ආරම්භයේ සිට අවසානය දක්වාම ඒ කුතුහලය එක දිගට පවත්වාගැනීමට සමත් වෙනවා. අවසාන මිනිත්තු කීපයේදී කතාවේ තවත් උඩි යටිකුරු වීමක් සමගින් කතාවේ චරිතයන්හි ප්‍රධාන වෙනස් වීමක් සහිතව ප්‍රේක්ෂකයාට උපරිම වින්දනීය විස්මයක් ලබාදෙනවා.

එහෙනම්, තවත් චිත්‍රපටයකින් හමුවන තුරාවට, හැමදෙනාටම ජයවේවා!!!

*** මේ චිත්‍රපටයේ නමින්ම, මේ අවුරුද්දෙම තිරගත වෙච්ච හින්දි චිත්‍රපටියක් තියෙනවා. බාගත කරනකොට හැමෝම පොඩ්ඩක් සැලකිලිමත් වෙලා බාගත කරන්න කියලා ඉල්ලීමක් කරනවා. එහෙම නැත්නම්, ගැළපෙන පිටපත කිසිම කරදරයක් නැතුව අපේම අඩවියක් වන, බයිස්කෝප් ඩවුන්ලෝඩ් අඩවියෙන් අරගන්න පුළුවනි.

“මේ ලෝකේ හොඳ මිනිස්සු කියලාවත්,
නරක මිනිස්සු කියලාවත් ජාතියක් නැහැ…
වාසනාව හොයමින් යන,
අවාසනාවන්ත මිනිස්සු තමයි හැම තැනකම ඉන්නෙ”

ජය!!!

 

 

 

 

Due to copyright issues, we do not provide any torrent links.

www.TamilRockers.nu – Rangoon (2017)

ලබා දී ඇති උපසිරසිය ඉහත පිටපත සඳහා අදාළ වේ.

12,989 downloadsDownload Rangoon-2017.zip47 KB

https://d36zzuvfojr38z.cloudfront.net/wp_content/uploads/2016/05/SisilaPrasad.jpg මේ ලබා දී ඇති සිංහල උපසිරැසි පිළිබද “සිසිල ප්‍රසාද්” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

 

Subtitle Contributor Rank

SILVER MEMBER
JOINING DATE – 2015-01-24
SUBMAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.