Right at Your Door (2006) | ගෙද‍රටම පැමිණි මාරයා!

Thriller චිත්‍රපටි බලන අය කැමති වෙන එකක් මේක. තරමක විද්‍යා-ප්‍රභන්ධ ලක්ෂණත් තියනවා. IMDB එකේ 6.3ක් තියන මේකට සම්මානයකුත් ලැබිලා තියනවා. ලොස් ඇන්ජලීස් නගරයේ කීප තැනක පුපුරා යන කුඩා න්‍යෂ්ඨික බෝම්බ කීපයකින් පසු ඇතිවන තත්ත්වයත්,  තරුණ යුවලක් වන “බ්‍රැඩ්” සහ “ලෙක්සි”  ඊට මුහුණ දෙන ආකාරයත් ගැන තමයි මේකෙන් පෙන්නන්නෙ. බ්‍රැඩ් ගෙදර ඉන්න, ලෙක්සි වැඩට ගිහිපු දවසක තමයි මේ බෝම්බ පුපුරන්නෙ. බ්‍රැඩ් ඉක්මනටම ගියත් ලෙක්සි ව හොයා ගන්න බැරි වෙනවා. පිපිරීමෙන් පස්සෙ එන දූවිල්ල ලොකු ප්‍රදේශයකට පැතිරිලා, බ්‍රැඩ් ල ගෙ ගෙදර පැත්තටත් එනවා. මේ දුවිල්ල එක්ක අලුත් වෛරස් එකකුත් අවිල්ල සමහරු ලෙඩ වෙනවා. මේක බෝවෙන ලෙඩක්. අලුත් එකක් නිසා තාම බෙහෙත් නැහැ. ලෙඩේ පාලනය කරන්න ඕන නිසා ලෙඩ්ඩුන්න්ට වෙඩි තියන්න පොලිසියට සිදු වෙනවා. මේ අතරේ ලෙඩේට ඉක්මනින් ම බෙහෙතක් හොයන්නත් බලධාරීන් ක්‍රියා කරනවා. එතකං හුලඟක් වත් ඇතුලට නොඑන්න ගෙවල් දොරවල් වහගෙන ඉන්න කියලා උපදෙස් ලැබෙනවා. පරහකට තියෙන්නෙ, ලෙක්සි සැහෙන්නෙ පරක්කු වෙලා ගෙදර එන කොට බ්‍රැඩ් ගේ air tight කරල ඉවරයි. ලෙක්සි ලෙඩ වෙලාද නැද්ද කියල දන්නෙ නැහැ. ලෙක්සි ව ගෙට ගන්න විදියක් නැහැ මොකද සමහර විට ලෙක්සිගේ ඇ‍ඟේ ලෙඩේ තිබ්බොත්, බ්‍රැඩ් ටත් හැදෙන්න පුළුවන්. ලෙක්සි ව එලියෙ තියලත් බැහැ මොකද දැනට ලෙඩේ හැදිල නොතිබුනත්, දිගින් දිගටම එලියෙ ඉන්න කොට  හැදෙන්නත් පුළුවන්. බ්‍රැඩ් බේරෙයි ද,  ලෙක්සි මැරෙයි ද, දෙන්නම බේරෙයි ද, නැත්තං මැරෙයි ද, ලෙඩේට බෙහෙත් හම්බ වෙයිද, වගේ කුතුහලය අවුස්සන කතාවකුත්, අනපේක්ෂිත සිදුවීමකුත් ඇතුලත් මේ චිත්‍රපටිය එක හුස්මට බලන්න පුළුවන්. බලල ඉවර වුනාම, තෲෂ්නිම්භූත වෙන්නත් ඉඩ තියනවා. 🙂

ලිපිය – රන්බංඩා