Sapta Sagaradaache Ello – Side A (2023) Sinhala subtitles | නිහඬ සාගරේ.. අපි දෙන්නා [සිංහල උපසිරසි] (300)

මනු…

මං හීන දකින දෙයක් කියන්නද?
ඔයා දන්නවනේ අපේ ගමේ තියෙන මුහුද!
ඒ මුහුදු වෙරල දිගේ,
ඔයත් එක්ක ගොඩාක් දුර ඇවිදන් යන්න මට ආසයි..
මූදු රැලි ඇවිත් අපේ කකුල් වල වදිද්දි,
මට ඔයාගේ අත තද කරන් අල්ලන් ඉන්න ඕනි..

මූදු රැලි වල සද්දේ, මනු…!!
ඒ සද්දේ ඇහෙද්දී
මට පපුව පිරෙන්නම සිංදු කියන්න හිතෙනවා..
මං ඔයාට කලින් මේක කියලා නෑ..
ඔයා එක්ක ඉද්දිත් මට ඒ විදිහටමයි දැනෙන්නේ..

මගේ සාගරේ ඔයා..!!

ප්‍රියා…

පසුගිය සැප්තැම්බර් මස පළමුවෙනිදා කන්නාඩ සිනමාවෙන් ලොවට මුදාහැරුණු මේ සිනමාපටය ගැන තිරගත වීමට කලින් වැඩි කතාබහට ලක්වීමක් සිදු වුණේ නැහැ. මේකත් තවත් එක සාමාන්‍ය ආදර කතාවක් කියන මතය තමයි බොහෝ දෙනෙක්ට තිබුණේ. නමුත් සිනමාපටය තිරගත වීමත් එක්ක මේ තත්ත්වය ඊට සහමුලින්ම වෙනස් වුණා. ප්‍රේක්ෂක විචාරක දෙපාර්ශවයේම නොමද ප්‍රසාදය දිනාගන්න මේ පුංචි සිනමාපටය සමත් වෙනවා. හෝරා 2යි මිනිත්තු 20ක් පුරාවට සිනමාහල් ප්‍රේක්ෂකයාගේ අවධානය වෙන කොහෙටවත් යන්න නොදී ආසනයටම බැඳ තියාගෙන, අවසානයේ වේදනාවෙන් බර වෙච්ච හිතක් එක්ක සිනමාශාලාවෙන් පිටත් කරවන්න මේ සිනමාපටය වග බලාගෙන තිබුණා. ඔව්, වසරේ හොඳම ආදර කතාව!! අහේතුකව ප්‍රචාරණය දීලා උලුප්පවන්න හදන ගොඩක් සිනමාපට අතරේ නිරායාසයෙන්ම කාගෙත් ආදරය දිනාගන්න මේ Sapta Sagaradaache Ello සිනමාපටය සමත්වෙන්නේ ඒ විදිහට. ඒ ආදරය තිරගත වීම ආරම්භ කළ දවසට පහුවෙනිදා ඉඳන් සිනමාශාලා වල පැහැදිලිවම පෙනෙන්න තිබුණා.

Kavaludaari (2019), Godhi Banna Sadharana Mykattu (2016) වගේ උසස් ගණයේ නිර්මාණ අධ්‍යක්ෂණය කරපු Hemanth M Rao මේ සිනමාපටයේ වගකීම කරට අරන් තිබුණා. පසුගිය වසරේ 777 Charlie (2022) සිනමාපටයෙන් වැඩි අවධානයකට පාත්‍ර වුණු Shetty පවුලේ තවත් පුරුකක් වන Rakshit Shetty සමඟ ආදරණීය Rukmini Vasanth ප්‍රධාන චරිත දෙකට හරි අපූරුවට පණ පොවලා තිබුණා. විශේෂයෙන්ම කියන්න ඕන මේ සිනමාපටයේ පසුබිම් සංගීතය ගැන. මේ තරම් සාර්ථකත්වයක් ළඟා කරන්නට, මේ තරම් ආදරයක් ලබන්නට චිත්‍රපටිය වෙනුවෙන් ඒ සංගීතය දුන්නු රුකුල නම් මෙහෙමයි කියන්න බැහැ. පපුවට වදින තරම් හරිම ලස්සනට සංගීතය අවශ්‍ය තැනට අවශ්‍ය විදිහට ගලපලා තිබ්බා. ඉතින් මේ හැමෝගෙම මේ සාමුහික සාර්ථක ප්‍රයත්නය වෙනුවෙන් ජාත්‍යන්තර සිනමා දර්ශකය 8.6ක් වැනි දැවැන්ත අගයක් සටහන් වෙලත් තියෙනවා. ඒ මනාප ආසන්න වශයෙන් 3500ක සංඛ්‍යාවකින්. සිනමාපටය අන්තර්ජාලයෙන් නිකුත් වීමත් එක්ක මේ ආදරය ඉස්සරහට වැඩි මිසක් අඩු වෙන එකක් නෑ කියලා නම් සහතිකයි.

විශේෂයෙන් දෙයක් කියන්න ඕන. Sapta Sagaradaache Ello සිනමාපටය නියෝජනය කරන්න කැසට් පටයක්. කැසට් පටයක් ගත්තම ඒකෙ දෙපැත්තක් තියෙනවා, Side A සහ Side B ලෙස. ඉතින් සිනමාපටය ඉදිරිපත් කරන්නෙත් කොටස් දෙකක් විදිහට. අද අපි Side A විදිහට නරඹන්න යන්නේ පළමු කොටස. එතකොට දෙවැනි කොටස නැත්තම් Side B නරඹන්න තව වසරක් දෙකක් ඉන්න වෙයිද? කොහෙත්ම නැහැ. මේ ඔක්තෝම්බර් මාසයේ 27වෙනිදා ඉඳන් ඔයාලට දෙවැනි කොටස රස විඳින්න පුළුවන්. ඉතින් Side A නරඹලා හිත බර කරගෙන අත පිහදාගෙන ඉන්න ඔයාට කිසිම ඉඩක් නැහැ. මේ ආදරේට මොකක් වෙයිද කියන කුතුහලය දල්වාගෙන තව මාසයකට ආසන්න කාලයක් බලාගෙන ඉන්නත් වෙනවා. බලාගෙන ඉන්න එකෙත් රසයක් තියෙන නිසා ඒ රසයත් විඳින්න කියලයි ආරාධනා කරන්නේ.

ඉතින් Sapta Sagaradaache Ello – Side A චිත්‍රපටිය මට විශේෂ වෙන්නේ මේ මගේ 300වෙනි උපසිරැසිය නිසා. 2014 වසරෙන් පටන් ගත්තු මේ උපසිරැසි ගමන අද වෙද්දි බොහොම ඉබි ගමනින් ඔහේ ඇදගෙන යනවා. මේ 6වෙනි කඩඉම සටහන් කරන දවසේ මට ස්තූති කරන්න නම් කට්ටිය ගොඩක් ඉන්නවා. නම් වශයෙන් සඳහන් කරන්න අමාරු අනිවාර්යෙන්ම ගොඩ දෙනෙක්ව මග ඇරෙන්න ඉඩ තියෙන නිසා. හැමදාමත් මගේ ලැප් රාජයාට මුලින්ම ස්තූතිවන්ත වෙනවා. එතුමා නැත්තම් මේ මොකවත් නෑ. ඒ වගේම අපේ සහෝදර උපසිරැසිකරුවන් සෙට් එක ආදරයෙන් මතක් කරනවා. මේ අවුරුදු නවයහමාරක කාලය තුල එක එක විදිහේ යාළුවො මේකෙන් සෙට් වුණා. ගොඩක් අය අද වෙද්දි උපසිරැසිකරණයෙන් ඈත් වෙලා. ගොඩක් අය අලුතින් එකතු වෙලා. ඒ හැමෝටම මගේ ආචාරය පුද කරනවා. ඒ වගේම අපේ පරිපාලක මඩුල්ලේ හැම කෙනෙක්වම විශේෂයෙන්ම ඉන්දියන් අපිව මෙහෙයවන විමා, රවිඳු හේෂාන්, රවිඳු නවීන් සහෝදරයන්ටත් ආදරණීය ස්තූතිය පුද කරනවා. ඒ වගේම අපේ ශක්තිය, හැමදාම අදහසක් දක්වලා අපිට ධෛර්යයක් දීලා යන ඔය හැමෝටමත් ගොඩක් ස්තූතිවන්ත වෙනවා. ආයෙත් කඩඉමක් කවදා ගහන්න වෙයිද කියන සැකය නම් තියෙනවා. කිව්වත් වගේ ඉඩ ලැබෙන වෙලාවක උපසිරසියක් කරගෙන, බොහොම හෙමින් ගමනක් තමා මේ යන්නේ. බලමු ඉතින් නේද?

හරි, මං එහෙනම් සමුගන්නවා. අනිවාර්යෙන්ම මේ සිනමාපටය ඉන්දියන් ප්‍රේක්ෂක ඔබ නැරඹියයුත්තක්. ඒ නිසා මගහැරගන්න එපා. එහෙම වුණොත් ඔබට කිසිම විදිහකට පසුතැවෙන්න ඉඩක් නෑ. හැමෝගෙම යහපත් බලාපොරොත්තු ඉෂ්ට සිද්ධ වෙන්න කියලා ප්‍රාර්ථනා කරනවා. ජයවේවා!!

 

 

 

Due to copyright issues, we no longer provide any torrent links.

මෙම ලබා දී ඇති SRT උපසිරසි HQ HD පිටපත් සඳහා ගැළපේ.

19,616 downloadsDownload Sapta-Sagaradaache-Ello-Side-A-2023-1.zip48 KB

මේ ලබා දී ඇති සිංහල උපසිරැසි පිළිබද PHOENIX” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔවුන්ගේ අවසරය මතම සිදුවිය යුතුය.

 

Subtitle Contributor Rank
PLATINUM MEMBER
JOINING DATE – 2014-01-28
SUB-MAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.