Titas Ekti Nodir Naam AKA A River Called Titas (1973) with Sinhala Subtitles | තිතාෂ් නැමැති නදිය [සිංහල උපසිරැසි සමඟ]

තිතාෂ් එක්ඨි නොදීර් නාම් යනු 1973 වර්ෂයේ නිර්මාණය වූ බංගලිදේශ වංග චිත්‍රපටයකි. ප්‍රකට වංග නවකතාකරුවකු වන අදෛබ්තමල්ල බර්මන් විසින් 1956 වර්ෂයේ දී එම නමින්ම යුතුව ලියා පළකරන ලද නවකතාව ඇසුරින් ඍත්වික් කුමාර් ඝටක් නම් සිනමාවේදියා විසින් නිර්මාණය කරන්නට යෙදුනු මෙම චිත්‍රපටය ඔහුගේ සිනමා නිර්මාණ අතර විශිෂ්ටතම නිර්මාණයයි. බංගලිදේශයේ තිතාෂ් නදිය අසබඩ ධීවර ගමක කතාන්ථරයක් ලෙස දිගහැරෙන මෙම චිත්‍රපටය තුලින් සිනමාකරුවා ග්‍රාමීය ජන සමාජයක පවතින සංකීර්ණතා මැනැවින් ග්‍රහණය කරගැනීමට සමත් වී ඇතිවාක් සේම එම සමාජයේ වෙසෙන ජනයාගේ සිතුම් පැතුම්, දුර්වලතා සහ දුක්ඛ දෝමනස්සයන් කෙරෙහි මානව දයාවෙන් යුතු කාරුණික බැල්මක් හෙලීමට ද උත්සුක වෙයි. “මේඝේ ධකා තාරා” චිත්‍රපටයේ මෙන්ම මෙම චිත්‍රපටයේද විශේෂම ලක්ෂණය වන්නේ සිනමාකරුවා විසින් මෙලෙස මුළු මහත් මානව සංහතිය දෙස බලන කාරුණික දෘෂ්ටියයි.

හින්දි සහ දෙමළ සිනමා නිර්මාණ ශ්‍රී ලාංකික සිනමා රසිකයන් අතර බොහෝ සේ ජනප්‍රිය වුවත් වංග සිනමාව වෙත ඔවුන්ගේ අවධානය යොමුව ඇත්තේ මද වශයෙනි. එබැවින් වංග සිනමාවේ විශිෂ්ට චිත්‍රපට උපසිරැසි යොදා ඔබ වෙත ගෙන එන්නට මම අදහස් කළෙමි. එම ව්‍යාපෘතියෙහි පළමු පියවර ලෙස මම ඔබට ගෙන ආවේ ඍත්වික් ඝටක් සිනමාවේදියාගේම සිනමා නිර්මාණයක් වූ “මේඝේ ධකා තාරා” නම් චිත්‍රපටයයි. වංග සිනමා නිර්මාණයක් බව ලිපියෙහි සඳහන් කිරීම අතපසු වූයෙන් බොහෝ දෙනා එය හින්දි චිත්‍රපටයක් ලෙස වරදවා වටහාගෙන ඇති බව ලැබෙන ප්‍රතිචාර අනුව පෙනෙන්නට ඇත. “මේඝේ ධකා තාරා” මෙන්ම අද මම ඔබ වෙත ඉදිරිපත් කරන “තිතාෂ් එක්ඨී නොදීර් නාම්” චිත්‍රපටයද හින්දි සිනමා නිර්මාණ නොවේ. ඒවා වංග සිනමා නිර්මාණයෝ වෙති.

කෙසේ වුවත් සත්‍යජිත් රායි හැර අන් කිසිදු වංග සිනමා නිර්මාණකරුවකු ශ්‍රී ලාංකික සිනමා රසිකයන් අතර ප්‍රචලිත නැත. නිර්මාණය කෙරුණු යුගයේ අනෙකුත් සිනමාකරුවන්ගේ නිර්මාණ කෙරෙහි ප්‍රමාණවත් අවධානයක් යොමු නොවීම නිසා සංරක්ෂණය කිරීමට උත්සුක නොවීම මෙයට හේතුවක් විය හැකි ය. උසස් වංග සිනමා නිර්මාණ සිංහල උපසිරැසි යොදා ඔබවෙත ගෙන ඒමට මා දරන උත්සාහයේදී මට ඇතිව තිබෙන බරපතලම අභියෝගය වන්නේද එම චිත්‍රපටවල පැහැදිලි පිටපත් සපයා ගැනීමට නොහැකි වීමයි. මේඝේ ධකා තාරා සහ තිතාෂ් චිත්‍රපට සම්බන්ධයෙන් මේ අපහසුව ඇති නොවූ නමුත් “නාගරික්, “ජුකි තක්කා ආර් ගල්පෝ”, “සුබර්ණරේඛා”, “ආකාශ් කුසුම්” වැනි සිනමා නිර්මාණවල හොද තත්ත්වයේ පිටපත් මම තවමත් සොයමින් සිටිමි. කෝමල් ගාන්ධාර් චිත්‍රපටයේ පවා මට සොයා ගැනීමට හැකි වූයේ ගොණු දෙකකින් සමන්විත පිටපතක් පමණි.

මෙම උපසිරැසිය නිර්මාණය කිරීමේදී මම පළමුවෙන්ම යොදාගත්තේ Bangla Movie Titash Ekti Nodir Naam 1973 Full length BRRip යන නමින් යූ ටියුබ්හි ලබා දී ඇති පිටපතයි. තිතාෂ් එක්ඨී නොදීර් නාම් චිත්‍රපටයේ දැනට සොයාගත හැකි අතිශයින්ම පැහැදිලි පිටපත මෙය වන බැවින් චිත්‍රපටය රසවිඳිම සඳහා මේ පිටපත යොදාගැනීම වඩාත් සුදුසු බව නිර්දේශ කරමි. යූ ටියුබ් පිටපත සඳහාත් ටොරන්ට් පිටපත් සඳහාත් වෙන වෙනම උපසිරැසි නිර්මාණය කොට මේ සමග ලබා දෙන්නෙමි.

මෙවන් විශිෂ්ට සිනමා නිර්මාණයක් අප වෙත තිලිණ කිරීම සම්බන්ධයෙන් ඍත්වික් ඝටක් සිනමාවේදියාට මගේ පළමු ස්තූතිය පුද කරමි. එසේම මගේ පස් වැනි නිර්මාණය වශයෙන් මෙම උපසිරැසිය ඔබ වෙත ගෙන ඒමට අවස්ථාව සලසා දුන් www.baiscope.lk වෙබ් අඩවියටද විශේෂ ස්තූතිය පුද කරන අතරම දකුණු ආසියවේ විශිෂ්ටතම සිනමා නිර්මාණයක් රස විඳීමට මා සමග එක් වන මෙන් සහෘද ඔබ සැමට ආරාධනා කරමි.

 

 

 

Due to copyright issues, we do not provide any torrent links.

 

Titas_Ekti_Nadir_Naam_cut (1.64 GB)

ලබා දී ඇති උපසිරසි ඉහත පිටපත සඳහා අදාළ වේ.

323 downloadsDownload Bangla-Movie-Titash-Ekti-Nodir-Naam-1973.New_.Baiscopelk.com_.rar94 KB

 

https://d36zzuvfojr38z.cloudfront.net/wp_content/uploads/2016/09/WajiraRathnayaka2-e1472758691562.jpg මේ ලබා දී ඇති සිංහල උපසිරැසි පිළිබද “වජිර රත්නායක” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.