Triggerman (2009) aka Doc West: La sfida | මගපාදන්නෝ…

ඇමෙරිකාව දැන් මහා බලගතු රාජ්‍යයක්. කතාවට කියන්නේ ලෝකයේ පොලිස්කාරයා කියල. යුධ-බලය, න්‍යෂ්ඨික-බලය, ආර්ථික- බලය, විද්‍යා-බලය ඒ ඔක්කෝටමත් වඩා මුළු ලෝකයටම බලපෑම් කරන්න පුලුවන් දේශපාලන-බලය මේ හැමදේම සැලකුවහම ඒකත් මහ අරුමයක් නෙවෙයි.

ඒ කෝකවෙතත් ඇමෙරිකාව මේ තත්ත්වෙට ආවෙ ඕපපාතිකව නෙවෙයි. ඒ වෙනුවෙන් ජීවිත කැපකරපු, වෙහෙස මහන්සි දරපු, උපාය උපක්‍රම යොදපු, බොහොම උත්සාහවන්ත – නොපසුබස්නා මිනිසුන්ගේ සලකුණු මතින් තමයි මේ හැමදේකටම පාර කැපුණෙ. ඇමෙරිකාවට කොළොම්බස් ගොඩබැස්සට පස්සෙ, රටේ තැන තැන පොඩි පොඩි මිනිස්වාස ඇතිවුණා. මේ කොළනිවල මුල්පදිංචිකාරයන්ට මුහුණපාන්න තිබුණු ගැටළු නිමක් නැහැ. ඔවුන්ට වගාකරන්න, ජලය සපයගන්න, වාසස්ථාන තනාගන්න, ආරක්ෂාව සපයගන්න බොහොම දුෂ්කරතා මතුවුණා. ඒත් ඔවුන් සමූහයක් වශයෙන් මේ හැමදෙයක්ම ජයගත්තා ටිකින් ටික.

මම මේ කියන්න යන කතාවෙත් තියෙන්නේ ඒ වගේ සිදුවීම් පෙළක් වටා ගෙතෙන සුන්දර සිනමාවක්. හෝලිසෑන්ඩ් කියන්නෙ මේ වගේ කොළනියක්. එහේ ඉන්න එකම වෛද්‍යවරයා තමන්ට හැකි හෑම දෙයක්ම කරමින් මේ මිනිසුන්ගේ දුකට පිහිටවෙනවා. ඔහු අතීත සිදුවීමක් නිසා ඇති වූ පසුතැවීමකින් මෙහාට ආ අයෙක්. ඒවුණත් ඔහු මේ නගරයේ කාගෙත් ගෞරවාදරය දිනාගෙන එහිම පුරවැසියෙක් ලෙස සැලකුම් ලබනවා. වෛද්‍යවිද්‍යාව එතරම් දියුණු නැති කාලෙ, පහසුකම් කොහෙත්ම නැති කාලෙ මෙයාගෙ සුළු දැනුම වුණත් මේ අයට මහා සහනයක්. මේ නගරයටත් මේ වෛද්‍යවරයාහටත් තිබෙන ලොකුම ගැටළුව තමයි ආරෝග්‍යශාලාවක් නැති අඩුව. මේ සඳහා යොදවන්න තරම් මුදලක් ඔවුනට නෑ. මේ මුදල් ගැටළුව විසඳගන්න මොවුන් යොදාගන්නෙ එක්තරා අපූරු ක්‍රමයක්. ඒ වෙනුවෙන් මොවුන් යොදන උපක්‍රමයට අහළ ගම් වලිනුත් මිනිසුන් ඇදී එනවා. මේ අතරේ වංචාවෙන්, කූඨෝපක්‍රමවලින් විතරක් නෙමේ තක්කඩිකමෙනුත් මේ තරගය ජයගන්න උත්සාහ කරන අය ඉන්නවා. ඇයි ඉතිං $32,000ක් කිව්වහම කවුරුවුණත් මොනව නොකරයිද? මෙහෙම එහෙකට සහභාගිවෙන්න එන්නේ යුක්තිගරුක අය විතරක්ම නෙමේනේ!

අවසානයේ මොවුන්ගේ මේ අරමුණ ඉ‍ටුකරගැනීමට ඔවුන් මග පාදා ගන්නේ මේ හැම ගැටයක්ම, මගඩියක්ම පරදවමින්. එහි මූලිකයා වෙන්නේ පෙර කිවූ වෛද්‍යවරයාමයි. ඉතිං මමනං හිතන්නේ ඇමෙරිකාව නැගුණු හැටිගැන හොඳ පාඩමක් ඉගෙනගන්නත්, අතීත ඇමරිකාවේ අසිරිය විඳගන්නත් ඉඩ සැලසෙන මේ වගේ නිර්මාණයක් මග හරින කෙනෙක්නම් හොයාගන්නවත් බෑ කියලයි.

ලිපිය – උදා