Pacific Rim: Uprising (2018) sinhala subtitles | දැවැන්තයන්ගෙ යළි ආගමනය ! [සිංහල උපසිරසි සමඟ] (300*)

කොහොමද කට්ටිය. ඔන්න එහෙමනම් මම අරගෙන ආවා අපේ බයිස්කෝප් රසික රසිකාවියන් මග බලාගෙන හිටිය සළරුවක්. ඒ තමා PACIFIC RIM චිත්‍රපටමාලාවේ දෙවැන්න. ඒ වගේම මෙම චිත්‍රපටය තමයි මගේ උපසිරසි ජිවිතයේ 300වැනි උපසිරැසිය සනාථ කරන්නෙ. මුලින්ම මේ සිනමාපටය මට ලබා දීපු හසන්ත අයියට විශේෂයෙන්ම ස්තුති කරන්න ඕන.එහෙමනම් වෙනදා වගේම මගේ උපසිරැසිකරණයේ කඩයිම් ගෙවී ගිය ආකාරය මතක් කරලම මම අනිත් අටුවාටීකා පටන්ගන්නම්කො.

• 01 වන උපසිරැසිය 2015.04.19
• 50 වන උපසිරැසිය 2015.10.23
• 100 වන උපසිරැසිය 2016.03.10
• 150 වන උපසිරැසිය 2016.09.13
• 200 වන උපසිරැසිය 2017.02.23
• 250 වන උපසිරැසිය 2017.09.11

මෙන්න මේ විදිහට තමයි මගේ උපසිරසි දින වකවානු ගෙවිලා ගියේ. ඉතින් හැමදාමත් කියනවා වගේ කියන්න තියෙන්නෙ හිතේ තිබ්බ පුංචි ආසාවක් ඉෂ්ට කරගන්න කියලා එදා පටන්ගත්තු මේ ගමන අද මම හිතුවටත් වඩා දුරකට ඇවිත් තියෙනවා. එදා වෙද්දී ආසාවට පටන්ගත්තු මේ වැඩේ අද වෙද්දීත් කෙරෙන්නෙ ඒක දැන් පුරුද්දක් වෙලා තියෙන නිසා.

ඒ වගේම එදා ඉදලා අද වෙනකම් බයිස්කෝප් අඩවියත් එක්ක එකතුවෙලා හිටිය ගමනෙදි සහෝදර උපසිරසිකරුවන් බොහොමයක් හදුනාගන්න හැකියාව ලැබුනා. ඇත්තම කිව්වොත් බයිස්කෝප් අපි ඉන්නෙ එක පවුලක් වගේ තමයි. ඉතින් මේ වෙලාවේදී ඇඩ්මින්ලා සියලුම දෙනාවත් අනිත් සහෝදර සහෝදරියන්ව සාදරයෙන් මතක් කරනවා. මම කාගේවත් නම් වශයෙන් කියන්න යන්නෙ නෑ, මොකද නම් වශයෙන් කියන්න ගියොත් මේ ලිපිය තවත් විශාල ලෙස දිගු වෙන්න පුළුවන් වගේම කාවහරි අමතක වීමක් වුනොත් හිත් අමනාපකමක් ඇතිවෙන්න ඉඩකඩ තියෙන නිසා.ඒ වගේම තවත් ස්තුති කරන්න ඕන පිරිසක් ඉන්නවා. ඒ තමයි අපේ අඩවියට නිරන්තර ගොඩවෙලා උපසිරසි බාගත කරගෙන යන උදවිය. ඒ අයගෙනුත් තමන්ගේ වටිනා කාලයෙන් විනාඩියක් දෙකක් වැය කරලා අපිට ස්තුතියි කියලා යන අතළොස්ස විශේෂයි. ඒ අයගේ අදහස් නොවෙන්න මේ ගමන මෙතරම් දීර්ඝ නොවෙන්න තිබ්බා.

ඒ වගේම මේක මං අවස්ථාවක් කරගන්න කැමතියි ඇතැමුන්ට දෙයක් කියන්නත්. ඇතැම් පිරිසක් ඉන්නවා කවදාවත් උපසිරසියක් බාගත කරද්දී ස්තුතියි කියන අකුරු හතරවත් ටයිප් නොකර යන පිරිසක්. හැබැයි යම්කිසි හේතුවක් නිසාවෙන් අපේ යම් ප්‍රමාද වීමක් වුනොත් එහෙම අන්න එතකොටනම් ඒ කරළියට එනවා. වෙනදටනම් අදහසක් දක්වන්න වෙලාවක් නැති උනත් ඒ අයට ආන්න ඒ වෙලාවටනම් හොදහැටි වෙලාව වගේම කියන්න වචනත් ඕන තරම් තියෙනවා. එහෙම වෙලාවට අපිටම හිතෙනවා අනේ අපි මේ කාලය වැය කරගෙන මේ වගේ දෙයක් කරන්නෙ මේ වගේ මිනිස්සු වෙනුවෙන් නේද කියලා? ඒ වගේ අවස්ථාවන් උද්ගත වෙලා කළකිරුණු වාර අනන්තයි. හැබැයි අන්න එහෙම වෙලාවල්වලදී අපේ හිතට සහනයක් එක් කරන්නට සමත් උනේ අර ඉහත සදහන් කළ සුළුතරය. ඒ අයගේ සහයෝගය නොතිබෙන්න අද මම මෙහෙම ලිපියක් නොලියන්න තිබ්බා. ඉතින් මට හැමෝගෙන්ම ඉල්ලන්න තියෙන්නෙ තම ආත්මාර්ථය ගැනම නොසිතා තමන්ට හැකි අයුරින් අපේ සහෝදර උපසිරසිකරුවන්ට සහය දක්වන්න කියලා. මොකද කියනවනම් මේක අපි කවුරුත් මුදල් ලාභ ඉපයීමේ පරමාර්ථයෙන් යුතුව කරන්නක් නෙවෙයි. ඔබ අපට ලබා දෙන සහයෝගය ඔබ ස්තුතියි කියා දක්වන අදහස තමයි අපිව දිරිමත් කරන්නෙ. දැන් සමහරු කියයිද දන්නෙත් නෑ මම ලිපියෙන් බැන්නා ඒ අයට බැන්නා කියලා. යම් අයුරකින් එහෙම කාගෙහරි හිත් රිදවීමක් උනානම් සමාවෙන්න ඕන.

එහෙමනම් දැන් අපි සිනමාපටය ගැන විමසා බැලීමක් කරලා බලමු. PACIFIC RIM ප්‍රථම චිත්‍රපටය නිකුත් වුනේ 2013 වසරේ. ඉන්පසුව මෙහි දෙවැන්න PACIFIC RIM UPRISING ලෙස වසර පහකට පසුව 2018 වර්ෂයේ මාර්තු 21වන දින තිරගත කෙරෙන්නට යෙදුනා. මෙවර සිනමාපටයේ අධ්‍යක්ෂණ කටයුතු සිදුව තිබෙන්නේ Steven S. Deknight නම් අධ්‍යක්ෂවරයා අතින්. ප්‍රථම චිත්‍රපටයේ අධ්‍යක්ෂකවරයා වූ Guillermo del Toro මෙවර මෙහි නිෂ්පාදකවරයකු ලෙස සම්බන්ධව සිටීම විශේෂත්වයක්. මේ වන විට IMDB දර්ශකයේ 6.0ක අගයක් ලබා ගන්නට සමත්ව ඇති මෙම සිනමාපටය උපයා ඇති ආදායම ඇමෙරිකානු ඩොලර් 281,726,740 ලෙස දැක්වෙනවා. මෙවර ප්‍රධාන චරිත ලෙස රංගනයෙන් දායක වන්නෙ John Boyega ජේක් පෙන්ටකොස්ට් ලෙස ප්‍රධාන චරිතයට පණ පොවද්දී සෙසු චරිත සදහා Jing Tian (ලිවෑන් ෂාඕ), Scott Eastwood (ලැම්බර්ට්), Rinko Kikuchi (මාකෝ මෝරි), Charlie Day (නිව්ටන් ගයිස්ලර්), Burn Gorman (ගොට්ලිබ්) ලෙසත් සිය රංගන දායකත්වය සපයනවා.

කට්ටියට මතක ඇති නේද PACIFIC RIM පළමුවන චිත්‍රපටයට පාදක උනේ පැසිෆික් සාගරය මධ්‍යයේ පැවති දොරටුවකින් පැමිණෙන කයිජු නම් වූ යෝධ රාක්ෂයන් පිරිසක් බව. පෘථිවිය ඔවුන් හා සටන් වැදුනා, නමුත් ඔවුන් එන්න එන්නම පරිනාමනය වෙමින් බලවත් වීමත් සමග පෘථිවියෙ සියලුම බලවත් රාජ්‍යයන් තීරණය කළා එකට එකතුව ඔවුන් හා සටන් වැදීමට යෝධ රොබෝවරුන් නිර්මාණය කිරීමට. ඒ අනුව තමයි යේගර්වරු නිපදවෙන්නෙ. ඩොක්ට ගයිස්ලර් සහ ගොට්ලිබ් දෙදෙනා එක්ව හොයාගන්නවනේ මේ කයිජු රාක්ෂයන්ව වෙනත් පිටසක්වළ ජීවි වර්ගයක් පාලනය කරනවා කියලා. කෙසේ වෙතත් මේ දැවැන්තයන් හා සටනේදී යේගර් නියමුවෙකු වෙන ස්ට්‍රකර් පෙන්ටකොස්ට් කයිජුලා පැමිණෙන විවරය වහන්න තම ජීවිතය පවා පරිත්‍යාග කරනවා. අන්න ඒ විදිහට තමයි පළමුවැනි සිනමාපටයේ කතාව ගෙතෙන්නෙ.

දෙවැන්න බිහිවෙන්නෙ කයිජු යුද්ධය ජයග්‍රහණය කිරීමෙන් වසර දහයක කාල පරාසයකට පසුව. අපරාධ කල්ලි සමග එක්ව විවිධ හොරකම් ආදිය සිදු කරමින් සිටින ස්ට්‍රකර් පෙන්ටකොස්ට්ගෙ පුත්‍රයා ජේක් පෙන්ටකොස්ට් තමා මෙවර ප්‍රධාන චරිතය වෙන්නෙ. නීතිවිරෝධී යේගර් රොබෝවෙක් තුළ සිටියදී ඔහුව අත්අඩංගුවට පත් වෙනවා. හැබැයි ඒ තනියමනම් නෙවෙයි අමාරා නමානි කියලා තව ගෑණු ළමයෙක් සමග. ඉතින් එතනට පැමිණෙන මාකෝ මෝරි ඒ දෙන්නවම පැසිෆික් ආරක්ෂක බලකායට එක්කගෙන යනවා. ඉතින් ඔය දේවල් සිද්ද වෙන අස්සේ තමයි ෂාඕ ආයතනයෙ නවතම රොබෝලා විසින් එක්වරම කයිජුලාට ආපහු එන්න විවර විවෘත කරන්නෙ. මේ අය විවර විතරක් ඇරලා නවතින්නේ නැහැ. ලොව වටාම යේගර්වරුන්ට පහර දෙනවා. කොහොමහාරි මේ විවර වහන්න සමත් උනත් ඒ වනවිටත් කයිජුලා තිදෙනෙක් මෙහාට ඇවිත්. හැබැයි මේ අය සමග සටනට ඉතුරු වන්නෙ යේගර්වරු හතරදෙනෙකු පමණයි.

මෙවර තියෙන විශේෂත්වය තමයි මොවුන්ට පෘථිවියට පැමිණෙන්න මිනිසුන් විසින්ම සහය දැක්වීම. එහෙම කරන්නේ ඇයි? එතකොට කයිජුලාගෙ අරමුණ මොකක්ද? ජේක් පෙන්ටකොස්ට් ඇතුළු කණ්ඩායමට ඔවුන්ව නැවත්වීමට හැකිවේවිද යන කාරනාවලට පිළිතුරු ඔබම සිනමාපටය තුලින් හොයාගන්න. එහෙමනම් ඔබට මෙය නැරඹීමට ආරාධනා කරමින් මා මෙතෙකින් නවතිනවා. ඔබ සැමට ජයෙන් ජය !

සැ.යු-

මෙම උපසිරැසිය නිර්මාණය කර ඇත්තේ HC HDRIP පිටපතකට වන බව කරුණාවෙන් සළකන්න. ඒ වගේම මේක හදන වෙලාව වෙනකොටත් 100%ක් නිරවද්‍ය උපසිරසියක් තිබුනේ නැහැ. තිබ්බ එකෙත් යම් යම් අඩුපාඩු තිබ්බා. ඉතින් මට හැකි උපරිමයෙන් එම අඩුපාඩු නිවැරදි කරලා තමා මේක හැදුවේ. හැබැයි තව අඩුපාඩු මොනාහරි තියෙනවනම් ඒ පිළිබදව කාරුණිකව සළකන්න කියලා ඉල්ලා සිටිනවා. එමෙන්ම වඩා හොද පිටපතක් ආ සැණින් උපසිරැසිය යාවත්කාලීන කර දෙන්නම්.

 

 

 

 

 

Due to copyright issues, we do not provide any torrent links.

මෙම ලබා දී ඇති උපසිරසි BR පිටපත සඳහා අදාළ වේ.

43,016 downloadsDownload Pacific-Rim-Uprising-2018-BR.zip188 KB

https://d36zzuvfojr38z.cloudfront.net/wp_content/uploads/2015/04/WP_20150309_004-e1429297736497.jpg මේ ලබා දී ඇති සිංහල උපසිරැසි පිළිබද “මධුකප්‍රිය පෙරේරා” සොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

Subtitle Contributor Rank

PLATINUM MEMBER
JOINING DATE – 2015-04-19
SUBMAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.