Sherni (2021) Sinhala Subtitles | කොටි දෙන! [සිංහල උපසිරසි] (200*)

2014 ජනවාරි 14 වෙනිදා Raaz : The Mystery Continues (2009) චිත්‍රපටියට සිංහල උපසිරැසිය කරලා පටන් ගත්තු මේ වැඩේ දැන් අවුරුදු හතක් තිස්සේම හෙමින් සීරුවේ කරගෙන ඇවිත් 200ක තරම් සිංහල උපසිරසි ප්‍රමාණයකට දායක වෙන්න මට පුළුවන් වෙලා තියෙනවා. පොඩි සතුටක් තියෙනවා මේකත් එක්තරා ආකාරයක අභියෝගයක් නිසා. දන්න අය දන්නවා පුළුවන් තරම් මං උපසිරැසි පල කරේ ඉන්දියන් නිර්මාණ වලටම තමා. ඒවායිනුත් බහුතරයක් හින්දි නිර්මාණ වලට. ඉංග්‍රීසි නිර්මාණ වලට නම් ටිකක් අඩුවෙන් තමා දායකත්වය දුන්නේ. ඉතින්, මේ කාලය තුල උපසිරැසිකරණය නිසා ඉගෙන ගත්තු දේ බොහොමයි, කැප කරපු දේ බොහොමයි, අඳුනගත්තු අය බොහොමයි, තරහ වුණු අය නම් නැතිම තරම්. ඒ හින්දම මේ විශේෂ අවස්ථාවේ මතක් කරන්න බොහෝ දෙනෙක් ඉන්නවා. අනිවාර්යෙන්ම එක්කෙනෙක් හරි මග ඇරෙන නිසා එකින් එක මතක් නොකර ඉන්නම්. සමූහ වශයෙන්, මේ සිංහල උපසිරැසිකරණ ගමන් මගේ හමු වෙච්ච හැම බයිස්කෝප් සහෝදර සහෝදරියෙක්වම ආදරයෙන් මතක් කරනවා මේ වෙලාවේ. ඒ වගේම අපේ මහගෙදර බයිස්කෝප් පරිපාලක මඩුල්ලේ හැම කෙනෙක්ටම මගේ හදපිරි ආචාරය පුද කරනවා මේ කරන කැප කිරීමට සහ නිතරම අපිට හයියක් වෙනවට. ඒ වගේම හැමදාමත් අපිට අදහසක් දක්වලා යන මිතුරන් ටිකව අමතක කරලා කොහොමද? ඔයාලටත් බොහොමත්ම ස්තූතියි. මගේ රත්තරන් අත් දෙක, ඇස් දෙක ඇතුළු මගේ මුළු ශරීර කූඩුවටයි, කරන හැම හිරිහැරයක්ම ඔහේ ඉවසන් ඉන්න, බැරිම තැන නොකියම හිටි හැටියේ ඕෆ් වෙන මගේ ලැප් රාජයාටයිත් ස්තූති කරන්න මට වචන මදි.

එහෙනම් මේ අරන් එන්නේ මගේ හතරවෙනි කඩඉම. කලින් කිව්වත් වගේ 200වෙනි උපසිරැසිය. හැමදාම කඩඉමකදී කියනවා වගේ ඊළඟ කඩඉම ගැන විශ්වාසයක් නෑ කියලා අද නම් කියන්නේ නැහැ. බොරු කියන්නේ මොකටද? මේ වැඩේ අත ඇරගන්න අමාරුයි. ඊළඟ කඩඉමත් තව අවුරුදු 5කින් හරි ගහයි. මැරුනේ නැත්තම් අබාධයක් වුණේ නැත්තම් ඒක අනිවාර්යයි. මෙච්චර කල් අපිත් එක්ක හිටියා වගේ දිගටම අපිත් එක්ක එකතු වෙන්න කියලා අන්තිමට ඉල්ලන්න තියෙන්නේ.

2017 අවුරුද්ද කියන්නේ හින්දි සිනමාවට එච්චර හොඳ අවුරුද්දක් නෙමේ. ආපු නිර්මාණ වලින් බහුතරයක් හොඳ මට්ටමේ නම් තිබ්බේ නැහැ. ඔය අතරේ එක පුංචි චිත්‍රපටියක් එලිදැක්වුණා. මතකද Newton (2017)? පුංචි චිත්‍රපටියක් කිව්වට මේක නතර වුණේ නම් ලොකු ලොකු වැඩ කරලා. ප්‍රේක්ෂක විචාරක මනාපය දසතින් දිනාගන්න ගමන්ම තිරගත කිරීම තුළින් ලබපු ආදායමෙන් Hit ලේබලය අලවගන්නත් මේ පුංචි චිත්‍රපටියට පුළුවන් වුණා. ඒ විතරක් නෙමේ ගොඩක් දෙනෙක්ට නොලැබෙන ඒ අවස්ථාව, ඔස්කා සම්මානය වෙනුවෙන් තරඟ කරන්න ලැබෙන ඒ අවස්ථාව, 90වන ඇකඩමි සම්මාන උළෙල වෙනුවෙන් ඩැහැගන්න මේ චිත්‍රපටිය සමත්වුණා. මේ හැමදේටම හේතු වුණු ඒ නිර්මාණයේ අධ්‍යක්ෂකතුමා කවුද? අමිත් වී. මසුර්කාර්.

මෙච්චර වටේ ගියේ අමිත් මහත්තයා ගාවට එන්න තමයි. ඉතින් 2021 වසරේ ඔහුගේ මීළඟ නිර්මාණය කලඑලි බැස්සා. මේ සැරේ අමිත් කියන නමට අමතරව මේ චිත්‍රපටිය රස විඳින්න ඔයාට තව හේතුවක් තියෙනවා. ඒ තමයි විද්‍යා බාලන්. විනාඩි දෙකක් හිටියත් ඇති, බාලන් නෝනා ඉන්න ඒ තිර කාලය රත්තරන් වගේ. ඒ රංගනයෙන් ඒ කටහඬින් කරන ඒ ප්‍රකාශන පසසන්න තරම් අපි කවුද? මේ වගේ කට්ටියකගේ උරමතින් ශේර්නි චිත්‍රපටිය පසුගිය සිකුරාදා දවසේ ඇමසෝන්ප්‍රයිම් හරහා විකාශය වෙන්න ගත්තේ කොරෝනා වාතාවරණය නිසා රිදීතිරයේ ප්‍රදර්ශනයකට මේවර ඉඩක් නොලැබීම හේතුවෙන්. නිව්ටන්ට වගේම තමයි මේ චිත්‍රපටියට ප්‍රේක්ෂකයන්ගේ සහ විචාරකයන්ගේ ධනාත්මක ප්‍රතිචාර මේ වන විට ලැබෙමින් පවතිනවා. ජාත්‍යන්තර සිනමා දර්ශකයෙත් මේ වන විට 7.4ක ඉතාම හොඳ අගයක් වාර්තා කරලා තියෙනවා. Drama ගණයට ප්‍රිය කරන ඔයාට නම් ශේර්නි රස උල්පතක් වෙනවා නොඅනුමානයි. කම්මැලි වෙයිදෝ කියන දෙගිඩියාවෙන් බලන්න ගත්තත් පලවෙනි විනාඩියේ ඉඳන්ම ඇහැ අහකට ගන්න ශේර්නි නම් ඉඩ තිබ්බේ නැහැ. ඇබ්බැහියකින් වගෙයි මේ හෝරා දෙකම ගත කරේ.

විද්‍යා බාලන් විසින් චිත්‍රපටයේ පණ පොවන්නේ විද්‍යා කියන චරිතයටමයි. ඇය වන සංරක්ෂණ දෙපාර්තමේන්තුවේ කලාපීය වන සංරක්ෂණ නිලධාරිනියක්. වනජීවය රැකගන්න උපරිමයෙන්ම කැපවුණු කෙනෙක්. හදිසියෙම ඇයට ස්ථාන මාරුවීමක් ලැබෙනවා පිටස්තර ගම්මානයකට. ඒ අලුත් පත්වීම ඇයට ලැබෙන්නේ අභියෝග ගොඩක් එක්කයි. ඇය ඇවිල්ලා ටික දවසකින්, නිතරම කැලේ එක්ක ජීවිතේ ගෙවන මේ ගම්මානේ ගම්වැසියන්ගේ ජීවිත හදිසියේම වෙනස් වෙන්න ගන්නවා. එයාලගේ ජීවිතේ බයෙන් දෙගිඩියාවෙන් මිරිකෙන්න පටන් ගත්තේ කැලේ හිටිය කොටිදෙනක් ගම්පැත්තට සේන්දු වෙලා හැමෝගෙම ජීවිත වලට තර්ජනයක් වෙන්න ගත්ත දා ඉඳලයි. ගම්වැසියොයි කොටිදෙනයි අතරට මැදිවෙන විද්‍යා මේ ප්‍රශ්නයට මූණ දෙන්නේ කොහොමද කියන හැටි ශේර්නි සිනමාපටයෙන් දිගහැරෙනවා. විද්‍යා බාලන්ට අමතරව විජේ රාස්, නීරජ් කාබී, ශරත් සක්සේනා වගේ ප්‍රවීණ රංගධරයන්ගෙන් සිනමාපටය හැඩගැන්වෙනවා. ඉතින් රංගනයන් ගැන කිසිම කුකුසක් තියාගන්න එපා. අනිත් පැත්තෙන් අධ්‍යක්ෂණය සහ කතාව ගැනත් අමිත් මහත්මයා ඔබට සහතිකයක් සපයනවා ඇති. ඉතින් ඔයාට තවත් හිතන්න දෙයක් නෑ. ශේර්නි උපරිම වින්දනයක් ලබාදෙනවා නිසැකයි.

ශේර්නි කියන්නේ මම කඩඉමකට තියා නිකන්වත් උපසිරැසිගන්වන්න හිතන් හිටි සිනමාපටයක් නෙමේ. මේ වන විටත් නිකුත් වෙලා තියෙන වෙනත් චිත්‍රපටියක් ගැනයි මගේ ඔලුවේ තිබ්බේ. ඒත් සිසිල සහෝදරයා යෝජනා කරා ශේර්නි වෙනුවෙන් කඩඉම් උපසිරැසිය කරමුයි කියලා. පොඩි සැකයක් තිබ්බට මොකද ශේර්නි බලන්න ගත්තම රූප රාමුවෙන් රාමුව ඉදිරියට යද්දි මට තහවුරු වුණා කඩඉම ගහන්න මීට වඩා හොඳ චිත්‍රපටියක් තවත් තියෙයිද කියලා. අන්තිමේදී මට හිතුනා මං මේ බැලුවේ, මේ වසරේ දැනට බලපු හොඳම හින්දි චිත්‍රපටිය නේද කියලත්. ඉතින් දෙපාරක් නොහිතම මගේ 200වෙනි උපසිරැසිය විදිහට ශේර්නි ඉදිරිපත් කරනවා. මේ වෙනුවෙන් විශේෂයෙන්ම සිසිල ප්‍රසාද් සහෝදරයට ස්තූතිවන්ත වෙනවා.

ඒ වගේම පොඩි දේකුත් කියන්න තියෙනවා. ඔයා ගොඩක් චිත්‍රපටි වලට උපසිරැසි හොයද්දි ඉංග්‍රීසියෙන් විතරක් නම ටයිප් කරලා උත්තරයක් ආවේ නැතුවම හැරිලා යනවා ඇති. ඒත් සිංහලෙනුත් නම ටයිප් කරලා ටිකක් හොයලා බලන්න. අනිවාර්යෙන්ම නෑ කියලා හිතන ගොඩක් චිත්‍රපට, කතාමාලා වල උපසිරැසි ඔයාලට හම්බෙන්න පුළුවන්. මේ සිංහලෙන් සර්ච් කරන එක ප්‍රැක්ටිස් එකක් කරගන්න. මං දැක්කා හොඳ නිර්මාණ කීපයක්ම ගොඩක් අයට මග හැරිලා තියෙනවා. සමීපම උදාහරණයක් කිව්වොත් විද්‍යා බාලන්ගෙම මීට කලින් නිකුත් වුණු චිත්‍රපටියක් වෙන ෂකුන්තලා දේවි චිත්‍රපටියට ඉතාම අඩු අවධානයක් තමා ගිහින් තියෙන්නේ. එහෙම අවධානයට ලක්නොවෙන්න සුදුසු චිත්‍රපටියක් නෙවෙයි ඒ. ඒ හින්දා ඒ ගැනත් ටිකක් ඔලුවේ තියාගන්න කියලා ආදරෙන් මතක් කරලා ඉන්නවා.

එහෙනම් ශේර්නි එක්ක මං සමුගන්නවා. ඒත් ශේර්නි අපෙන් සමුගන්නේ නිකන්ම නෙමේ, හිතන්න යමකුත් ඉතුරු කරලයි. අපි කවුරුත් ජීවත් වෙන මේ මහපොළොවේ අඟලක් අඟලක් ගානේ අපිට වගේම මෙහි ජීවත් වෙන හැම සතාටම අයිතියි. සමහරවිට අපිටත් වඩා අයිතිය තියෙන්නේ ඔවුන්ට. අපි නැතිව ඔවුන්ට පැවැත්මක් තිබ්බට අපිට කොයින්ද ඔවුන් නැතුව පැවැත්මක්. පොළොව හාරන පණුවගේ ඉඳන්ම අපේ ජීවිත වලට ඔවුන් බලපාන හැටි, ඔවුන් නැත්තම් අපේ ජීවිත වෙනස් වෙන හැටි පොඩ්ඩක් ගූගල් එකේ සර්ච් කරලා බලන්න. හැමදේම හොඳ විදිහට වෙන්න නම් කරන්න තියෙන්නේ ඉතාම පොඩි දෙයයි. ඒ තමා බුද්ධිමත්ම ජීවියෙක් වෙන මනුෂ්‍ය අපි, අපේ ආකල්ප හදාගන්න එක. සර්පයෙක් දැක්ක ගමන් ඉබේම පොල්ලක් අතට ගන්න, බල්ලෙක්ව දැක්කම ගල් ගෙඩියකට අත යන අපේ ආකල්ප හදාගන්න එකයි. එතකොට හැමදේම හොඳ විදිහට වෙනස් වෙයි. මනුෂ්‍යයාට හිතන්න පුළුවන් මනසක් දීලා තියෙන්නේ යම් හේතුවකටයි. ඒ ම්ලේච්ඡයෙක් වගේ හැසිරෙන්න නෙමෙයි. හිතන්න, හැමදේටම ආදරේ කරන්න. කාටහරි හිතෙනවා ඇති අලි කඩා පනින ගමක හිටිය නම් මූ මේ සත්ව ප්‍රේමි බයිලා කියයිද කියලා. මතක තියාගන්න ඔය ප්‍රශ්න කියන දේවල් අවුරුදු ගානක් තිස්සේ ප්‍රශ්න විදිහටම තියෙන්නේ ඒ ප්‍රශ්න වලින් වාසි ගන්න යම් කොටසක් ඉන්න නිසයි. නැත්තම් ඔය දේවල් විසඳිලා අද මනුස්සයත් කැලෑ සතාත් දෙගොල්ලම තමන්ගේ ජීවිත ගෙවාගෙන සතුටින් ඉන්නවා.

නොරිදවා නොරිදවී ජීවත්වෙන්න..!!

 

 

Due to copyright issues, we do not provide any torrent links.

මෙම ලබා දී ඇති උපසිරැසි WEB/HD පිටපත් සඳහා අදාළ වේ.

11,919 downloadsDownload SHRN-2021.zip54 KB

මේ ලබා දී ඇති සිංහල උපසිරැසි පිළිබද “මයුර සුරාජ්” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

 

Subtitle Contributor Rank
PLATINUM MEMBER
JOINING DATE – 2014-01-28
SUB MAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.