Enemy Lines (2020) Sinhala Subtitles | සතුරු සීමාව [සිංහල උපසිරසි සමඟ] (50)

ආයුබෝවන්… තවත් නිරෝගිමත් ජයග්‍රාහී සුබ දවසක් වේවා කියලා ප්‍රාර්ථනා කරනවා හැමෝටම. ඉතින් ඔන්න මමත් අනෙක් උපසිරසිකරන අය වගේම උපසිරසිකරුවන්ගේ ස්වර්ණමය අවස්ථාවකට ඇවිල්ලා තියනවා. එහෙමත් නැත්නම් පළවෙනි කඩඉමට ඇවිත් තියනවා. ලෂේන් සහෝදරයා මෑතකදි කිව්වා ඔයා 50ට කිට්ටු කරලා ඉන්නේ. අපි 50 අළුත් චිත්‍රපටයකින් සමරමු කියලා. ඒ මොකද මම උපසිරසි කරපු ගොඩක් චිත්‍රපට පැරණි චිත්‍රපට නිසයි. ඉතින් ඒකත් ඔලුවේ තියාගෙන හෙමින් හෙමින් උපසිරසි හදලා ඔන්න දැන් 50 වෙනි උපසිරසියට නැත්නම් පළවෙනි කඩඉමට ඇවිත් තියනවා. ඒකත් හරි අපූරු සිද්දියක්.

ඉස්සෙල්ලම කියන්න ඕනේ මං වර්ග කිරීමක් නැතුව චිත්‍රපටි බලනවා. පරණ චිත්‍රපටි වලට ගොඩක් කැමතියි. සමහර දවස් තිබුණා එලිවෙනකන් චිත්‍රපටි බලපු. ඔහොම ඉන්න අතරේ තමයි මට The Passage කියන චිත්‍රපටය හම්බවෙන්නේ. මං ඒක බලලා ඒකට සිංහල උපසිරසි හෙව්වට මට හම්බවෙන්නේ නෑ.

ඔය අතරේ මට Facebook එකෙන් යාළුවෙක් හම්බවුනා නිරෝෂ් ගුණසේකර කියලා. එයාගෙන් මං චැට් කරලා අහනවා කොහොමද සිංහල උපසිරසි හදන්නේ කියලා. කවදාවත් දැකලවත් නැති, වචනයක්වත් කතා කරලවත් නැති, අකුරු වලින් විතරක් කතා කරපු නිරෝෂ් සහෝදරයා ටික වෙලාවකින් මට සිංහල උපසිරසි හදන විදිය ගැන කියලා දෙනවා. අන්තිමට කියනවා පැහැදිලිව තව විස්තර ඇතුව දැනගන්න මේ සයිට් එකට යන්න කියලා.

අළුත් චිත්‍රපටියක් ආවම අඩවිය පැත්තට ඇවිල්ලා සිංහල උපසිරසිය බාගත්තට කවදාවත් උපසිරසියක හදන්න හිතලවත් තිබුණේ නෑ. The Passage චිත්‍රපටය බලපු නිසාත් ඒකට සිංහල උපසිරසි නැති නිසාත් ආසාවට වගේ ඔන්න සිංහල උපසිරසිය හැදුවා. හදලා මාත් වීරයා වගේ අඩවියට උපසිරසිය මේල් කලා. ඒ 2019 මාර්තු 02 වනදා. බයිස්කෝප් සිංහලෙන් අඩවියෙන් ඉස්සෙල්ලම මාත් එක්ක සම්බන්ධවෙන්නේ ශාන් විමුක්ති සහෝදරයා. විමුක්ති සහෝදරයා තමයි චිත්‍රපටයක් වෙන්කරගෙන උපසිරසියක් නිර්මාණය කරලා ඒක අඩවියේ පලවන තැනට වෙනකන් කරුණු පැහැදිලි කලේ. (මේ සේරම විස්තර අඩවියේ තිබුණත් මට තිබ්බ තදියමට වෙච්ච දේ තමයි මේ) පස්සේ ශාන් සහෝදරයා කිව්වා ලිපියකුත් එවන්න කියලා. මේ වෙනකොට මං මගේ දෙවන සිංහල උපසිරසිය Gray Lady Down විත්‍රපටයේ උපසිරසියත් හදලා ඉවරයි. ලිපියේ ප්‍රමාදය නිසාම මගේ පළවෙනි උපසිරසිය අඩවියේ පලවෙන්නේ Gray Lady Down. දෙවනියට තමයි ලිපියත් එක්ක The Passage පලවෙන්නේ.

ඉතින් අළුත් සාමාජිකයෙක් විදිහට 2019 මාර්තු 30 වෙනිදා ඉඳන් මම බලපු, දැනට සිංහල උපසිරසි නැති චිත්‍රපටවලට සිංහල උපසිරසි හදන්න පටන් ගත්තා.

මං උපසිරසි හදපු ගොඩක් චිත්‍රපටි පරණ ඒවා. සමහරක් කළු සුදු චිත්‍රපට. ඒ කියන්නේ දැන් තියන චිත්‍රපට වලට මං කැමති නෑ කියන එක නෙවෙයි. පරණ චිත්‍රපට වලට මං කැමතියි. ඒක වෙනමම ටේස්ට් එකක්. මුලදි මං හිතුවා මම බලලා තියන සමහර පැරණි චිත්‍රපට දැන් කවුරුවත් බලන එකක් නැහැ කියලා. ඒත් ඒ චිත්‍රපට වලට උපසිරසි පලවුනාම ඒවට ලැබුණ හොඳ ප්‍රතිචාරත් එක්ක මං තව තවත් පැරණි චිත්‍රපටම කරන්න පෙළඹුණා. Shamal Manojan, geeganagamage, Priyantha Dayakeerthi, isuru srinath, හසිත මධුෂාන් ඇතුළු කණ්ඩායමක් මාව දිරිමත් කලා කිව්වොත් හරි.

මාත් එක්ක බයිස්කෝප් අඩවියෙන් ඉස්සෙල්ලම ශාන් විමුක්ති සහෝදරයා සම්බන්ධ වුනා වගේම ඊට පස්සේ සිසිල ප්‍රසාද්, හසන්ත වික්‍රමරත්න, ලෂේන් ඩිමෙල්, අසංක ප්‍රදීප්, ආසිරි ප්‍රියන්ත, තිසර නියෝ යන සහෝදරවරුත් සම්බන්ධ වුනා. මේ අතරේ දවසක් සොහාන් ජයසූරිය සහෝදරයා මාත් එක්ක චැට් කරලා මාව බයිස්කෝප් සිංහලෙන් උපසිරසිකරුවන්ගේ චැට් ගෘෘප් එකට එකතු කරගත්තා. තව මාත් එක්ක අදහස් හුවමාරු කරගත්ත මලිත් මධුෂාන්, උදය සමන් සහෝදරවරුනුත් මං, මගේ පළවෙනි කඩඉමේදී මතක් කරනවා.

පළවෙනි උපසිරසිය අඩවියේ පළවෙච්ච දවස මගේ ජීවිතේ සතුටුම දවස් වලින් එකක්. එදා මට කියාගන්න බැරි සතුටක් දැනුනා. ඒ සතුටම මම මගේ හැම උපසිරසියක්ම පළවන දවස් වල ලබනවා. පහුගිය කොරෝනා පළමු රැල්ල දවස් ටිකේ අඩවියේ උපසිරසි ගොඩගැහිලා, පල වෙන්න පරක්කුවෙනකොට මං විමුක්ති සහෝදරයගෙන් ඒ ගැන විමසලා දවසගානේ වගේ මේල් යවනවා.

බයිස්කෝප් අඩවියේ සමාජ සත්කාර වැඩසටහන් එකකටවත් මේ වනතුරු මට සහභාගි වෙන්න බැරිවුනා. ඒ නිසාම කලින් සඳහන් කරපු එක් සහෝදරයෙක්වත් එක්ක මං කතා කරලා නැහැ, ෆොටෝ එකකින් ඇර මං එයාලව දැකලවත් නැහැ. ඒත් ඒ හැමෝම වචනයේ අර්ථයෙන්ම සහෝදරවරු. මට ආපු ගැටළු සියල්ලටම එයාල බොහොම කාරුණිකව පිළිතුරු ලබා දුන්නා. උසස් ගණයේ චිත්‍රපටි හඳුන්වලා දීලා ඒවටත් උපසිරසි හදන්න මාව උනන්දු කලා. මාත් එක්ක උපසිරසි බෙදාගත්තා. මලිත් මධුෂාන් සහෝදරයා දවසක් ටීවී සීරීස් එකකට සබ් කරන්න එකතු වෙන්න කියලා යෝජනා කලත් පස්සේ ඒක වෙන සහෝදරයෙක් බාර අරන් තිබුණ නිසා මට ඒ අවස්ථාව මඟහැරුනා. ඒත් චිත්‍රපටයකට වගේ රූපවාහිනී කතා මාලාවකට උපසිරසි හදන්න මට පොඩි තිගැස්මක් තිබුණා. ඒ චිත්‍රපටයකට වගේ නෙවෙයි, ටීවී සීරීස් වලට අනිවාර්යයෙන්ම ඊළඟ කොටසට නිශ්චිත දවසට උපසිරසිය ලබාදෙන්න ඕනේ. ඉතින් මගේ රැකියාවත් අනෙක් වැඩකටයුතුත් එක්ක මට ඒ උපසිරසිය කරගන්න බැරිවෙයිදෝ කියන බයක් දැණුනා. මලිත් සහෝදරයා නම් කිව්වේ අපි කරමු අයියේ, එතකොට ඉක්මණටම පළවෙනි කඩඉම ගහන්නත් පුළුවන් කියලයි. කොහොම හරි ඉදිරියේදී ඒ අත්දැකීමත් විඳගන්න මං හරි ආසාවෙන් ඉන්නවා.

මේ අතර දවසක් ලශේන් සහෝදරයා චිත්‍රපට එකතු වල තියන මඟහැරුණු චිත්‍රපට වලටත් සබ් හදන්න කියලා යෝජනා කලා. ඒ, ඒ වෙනකොටත් මං ජැක් රයන් චිත්‍රපට මාලාවේ චිත්‍රපටි තුනකට උපසිරසි හදපු කාලේ. ඉන්පසු මං The Mask චිත්‍රපටයේ උපසිරසියට අමතරව The Mummy චිත්‍රපට මාලාවට උපසිරසි හදන්න පටන් ගත්තා. දැනට එහි තුනක් නිකුත් කර ඇති අතර ඉදිරියේදී එහි ඉතිරි චිත්‍රපට වලටත් උපසිරසි ලබා දීමට බලාපොරොත්තු වෙනවා.

උපසිරසි වලට අදහස් දක්වන අය අතරේ රොයිලි සහෝදරයව අනිවාර්යයෙන්ම මතක් කරන්න ඕනේ.

ඉහත නම් සඳහන් කරන්න බැරිවුන සහෝදරවරු තව ඇති. අදහස් දක්වලා මාව දිරිමත් කරපු, පුද්ගලිකව පණිවිඩ එවලා මට සුබ පතපු ඔයාලවත් මං ආදරයෙන් මතක් කරනවා.

මුලදි මං කිව්වා මේක හරි අපූරු සිද්දියක් කියලා. මං පලවෙනි උපසිරසිය හදපු චිත්‍රපටයේ කතාව නාසී ග්‍රහණයට ලක්වුන එක මහාචාර්යවරයෙක් හොර රහසින් පිටුවහල් කරගන්න උත්සහ කරලා අවසානයේ එඬේරෙකුගේ සහයෙන් ආරක්ෂිත මාර්ගයකින් රටින් පැනගන්න කතාවක්.

මෙන්න මගේ 50 වන සිංහල උපසිරසිය. Enemy Lines 2020

ෆේබියන් යනු පරමාණු/ න්‍යෂ්ටික විද්‍යාව ගැන ආචාර්යවරයෙක්. මොහුව ජර්මන් හමුදාව විසින් රඳවගෙන අළුත් ආයුධයක් හදන්න පර්යේෂණ කරනවා. ඒ ෆේබියන්ගේ බිරිඳත් දුවවත් නිවාස අඩස්සියක ඇපයට තබාගෙනයි. මාසයකට සැරයක් පැය කීපයකට මොවුන් හමුවෙනවා. මේ අතර බ්‍රිතාන්‍ය හා ඇමරිකාව එකතුව මේජර් කමින්ස්කිගේ නායකත්වයෙන් හොඳම වැඩකරුවන්ගෙන් කණ්ඩායමක් හදලා ෆේබියන්ව මුදවගෙන ඇමරිකාවට ගෙනයන්න මෙහෙයුමක් දියත් කරනවා. ඒ මේ ආයුධය නිපදවීම වලක්වන්නට. ඒත් මේජර් කමින්ස්කිට ජර්මන් හමුදාවටත්, ජර්මනියේ විරෝධතා කරුවන්ටත් වගේම ෆේබියන්ව අරන් යන එන රුසියානු හමුදා කණ්ඩායමකටත් මුහුණ දෙන්න වෙනවා. අවසානයේ ෆේබියන් කවුරු සතුකරගනීද, ඇත්තටම ඔහු ආයුධය නිපදවයිද කියලා බලන්න චිත්‍රපටයේ අවසානය බලන්න.

අපූරු සිද්දිය නම් පළමු සහ පනස්වන උපසිරසි වල චිත්‍රපට සමාන කතාන්දරයක් වීමයි.

චිත්‍රපටය නිකුත්වෙලා තියෙන්නේ මේ වසරේ අප්‍රේල් 24 වනදා.චිත්‍රපටය ගැන විචාර සහ අදහස් එතරම්ම හොඳ නොවූවත් සමස්ථයක් විදිහට චිත්‍රපටය රස විඳින්න පුළුවන්. මෙහි කමින්ස්කි ලෙස Ed Westwick, කර්නල් ප්‍රිස්ටන් ලෙස John Hannah, ඩේවිඩ්සන් ලෙස Tom Wisdom, සාරා ලෙස Ekaterina Vladimirova, ආචාර්ය ෆේබියන් ලෙස පෝලන්ත ජාතික Paweł Deląg සහ ජෙනරල් මැක්ලවුඩ් ලෙස Corey Johnson ඇතුළු රංගන ශිල්පින් රැසක් රංගනයෙන් දායක වෙනවා. අධ්‍යක්ෂනය Anders Banke විසිනි. චිත්‍රපටය විනාඩි 92ක කාලයකින් යුක්තය. Enemy Lines චිත්‍රපටය සඳහා දැනට IMDb දර්ශකයේ 4.8ක් සහ Rotten Tomatoes 20%ක අගයක් ලැබී ඇත. Google පරිශීලිකයින්ගෙන් 78%ක කැමැත්ත මෙම චිත්‍රපටයට ලැබී ඇත.

එහෙනම් අදට මං ගිහින් එන්නම්. ආපහු දවසක මේ වගේම තවත් චිත්‍රපටයකට සිංහල සබ් අරන් එනකන් ඔයාල හැමෝටම නිරෝගිමත් සුබ දවසක් වේවා…

~ ජය වේවා ~

 

 

Due to copyright issues, we do not provide any torrent link.

මෙම ලබා දී ඇති උපසිරැසි BR පිටපත් සඳහා අදාළ වේ.

7,972 downloadsDownload Enemy-Lines-2020-.zip36 KB

මේ ලබා දී ඇති සිංහල උපසිරැසි පිළිබද “ රොෂාන් ශමීර ජයසිංහ ” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

 

Subtitle Contributor Rank

SILVER MEMBER
JOINING DATE – 2019-03-30
SUB-MAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.