How to Train Your Dragon: The Hidden World (2019) AKA How to Train Your Dragon 3 Sinhala Subtitles | දෙලොවක ආදර අන්දර..! [සිංහල උපසිරැසි සමඟ] *100

මේක කොහොම පටන් ගන්නද කියල ඔළුවට අදහසක් එන්නෙත් නෑ. කොහොමහරි බයිස්කෝප් කියන ආඩම්බරකාර පවුලත් එක්ක එකතුවෙලා ආපු ගමනේ අද දෙවනි සංධිස්ථානය පසු කරන්න තමයි මම මේ කතාව කියන්නෙ. විමා කියන විදියට නම් මේක තුන්වෙනි සංධිස්ථානය. පළවෙනි සබ් එක කරපු එකා දෙවනි සබ් එකත් කරනවනම් අනිවාරෙන් ඒකා පළවෙනි සංධිස්ථානය පහු කරනව කියල තමයි ඒ යකා කියන්නෙ. 😀 කොහොමින් කොහොමහරි මම අද අරගෙන එන්නෙ මගේ 100 වැනි උපසිරැසි නිර්මාණය. සමහරු නම් මාව දන්නෙත් නැතුව ඇති. ඒකට හේතුව මම ගොඩක් උපසිරැසි අරගෙන එන්නෙ ටීවී සීරීස් වලට නිසා. උපසිරැසි 100ක් කළා වුණත් ඒ අතරෙ මම චිත්‍රපටි සඳහා උපසිරැසි ලබා දුන්නෙ ඉතාම අඩුවෙන්.

ඉතිං මම කියන්න ඕනෙ මම කොහොමද මේ උපසිරැසිකරණයට ඇබ්බැහි වුණේ කියල. “2017 ජූලි 03” එතකොට මම කැම්පස් එකේ අවසාන වසරෙ ඉගෙන ගන්න ගමන් හිටියෙ. දවසක් මම නිකමට බයිස්කෝප් එකට ගොඩ වෙලා උපසිරැසියක් හදන්නෙ කොහොමද කියල විස්තර බැලුව. මොකද ඒ වෙනකල් කවුරුහරි උපසිරැසියක් දෙනකං ඉඳල ඒක බාගෙන බැලුව මිසක්, උපසිරැසියක් කරන්න අදහසක් තිබුණෙ නෑ. එහෙම කරල මම ලයින් 300ක් විතර තිබුණු Valhalla Rising (2009) චිත්‍රපටියට ( මේක ගොඩක් ලස්සන ෆිල්ම් එකක් නම් නෙවෙයි) සබ් දෙන්න කියල හිතාගෙන බයිස්කෝප් එකට මේල් එකක් දැම්ම. ඒකට උත්තර දුන්නෙ “අසංක ප්‍ර්දීප් රණතුංග” අයිය. නැත්තං අපි හැමෝම දන්න ලෝගන් අයිය. ඊට පස්සෙ ඉතිං මම සබ් එක කරල යැව්ව. වැරදි වගයක් තිබිල ඒව හදල දුන්න. ඊට පස්සෙ ඉතිං මට වැඩේ අල්ලල ගියා. ඊට පස්සෙ 2018 මාර්තු 30 වෙනකොටත් මම උපසිරැසි ලබා දීල තිබුණෙ උපසිරැසි 7ක් විතරයි. ඊට පස්සෙ එක දවසක් විමා කිව්ව Krypton එපියක් හිර වෙලා තියෙනව, පුළුවන් නම් කරල දීපං කියල. ඉතිං මම දවසක් යන්නත් කලින් ඒක කරල දුන්න. ඊට පස්සෙ ඉතිං “විමා” නිතර දෙවේලෙ අරක කරපං, මේක කරපං කිය කිය සබ් කරන්න බාර දිදී කරදර කළා. ඉතිං ඔහොම තමයි 100ක් දක්වා මේ ගමන ඉතාම වේගයෙන් මට එන්න හැකියාව ලැබුණෙ.

ඊටත් පස්සෙ කාලය ගෙවිල යනකොට මට මූණු පොතෙන් බයිස්කෝප් සැට් එක හමු වෙනව. එතනින් එහාට නම් කතා කරල වැඩක් නෑ. සමහර ඒවට සබ් කරන්න මාව දාල කියලවත් මම දන්නෙ නෑ. ඇඩ්මින්ල අපේ කිසිම අවසරයක් නැතුව අපෙන් බලහත්කාරයෙන් සබ් කරවගන්න පටන් ගත්ත. 😀 බලහත්කාරයෙන් කිව්වට ඉතිං කැමැත්තෙන් තමා සබ් කළේනම්. එහෙම කතබහ කරද්දි තමයි බයිස්කෝප් සුහද හමුව පැවැත්වුණේ. මුහුණු පොතෙන් කතාබහ කරල තිබුණ වුණත් කවදාවත් දැකල නැති යාළුවො සෙට් එක මුණ ගැහුණෙ එදා තමයි. ඒක අමතක නොවෙන සිදුවීම් ගොන්නක් ජීවිතේට එකතුවුණු දවසක්. ඒ හමුවීමෙන් පස්සෙ මාස කීපයක් යනකල් පාරෙ බැහැල යන්න බැරි විදියෙ අපවාද, මඩ ප්‍රහාර වලට දිගින් දිගටම ලක් වෙන්න වුණා. 😏😏 ඒකෙ ප්‍රධානියා වෙන් කවුරුවත් නෙවෙයි හසා තමයි. 

100 වැනි උපසිරැසිය වෙලාවෙ මම ඇත්තටම මතක් කරන්න ඕනෙ පිරිසක් ඉන්නව ඇඩ්මින් මණ්ඩලය ඇතුළෙ. මම කවදාවත් දැකල නැති, කතා කරලත් නැති බයිස්කෝප් නිර්මාතෘ “ඉසිර ගුණතිලක අයිය” එයා නැත්තං මම අද මේ ලිපිය ලියන්නෙත් නෑ. ඊට පස්සෙ හැමෝම දන්න හැමෝම ආදරේ කරන අපේ “රොයිලි අයිය.” එතකොට ලෝකෙ මොන කෙළවරේ හිටියත් අපි එක්ක හැමදාම ලඟින් ඉන්න, අඩුපාඩු දැක්කම ඒව කියල දෙන අපේ හසායියා.  ඊට පස්සෙ උපසිරැසිකරණයේදි මට ගොඩක් උපකාර කරපු සමීර කරුණාරත්න සහෝදරයා, තමන්ව “හන්දියා” ලෙස හඳුන්වා ගන්න, බයිස්කෝප් හැම කෙනෙක් එක්කම තමන්ගෙ පැටිකිරිය කියවන, මාව උපසිරැසිකරණයට ඇදල ගත්ත විමා, 😂😂 හැමදාම දරුණු ලෙස මඩ ප්‍රහාර වලට ලක් වෙන ජෙරෝමි (පූසා), සීනිබෝල ආසිරි, හෙන ගැට්ටෙන් ඉන්න යශෝධ, පාඩුවේ පෝස්ට් ටික හදාගෙන, සබ් එකක් කරගෙන ඉන්න චාමර, ඒ වගේම ලොකු කාර්‍යබාරයක් ඉෂ්ට කරන සිසිලයිය, සුධීර අයිය, ලෝගන් අයිය, වගේම නිර්මාණි සහෝදරිය. තව ටිකෙන් අමතක වෙනව “සෝජු බඩා” තිසර නියෝ මේ හැමෝම ලෙංගතුව මතක් කරන්න ඕනෙ.

ඊට අමතරව මට හමු වුණා යාළුවො ගොඩක්. හොඳ යාළුවො ගොඩක්. ලහිරු, අචින්ත, නුවන්ත, නුලුපුල් (ටියුබ්), රවිඳු මලය, ප්‍රනීත් චින්තක, දිලා, තරිඳු, කාලිංග, චන්දිම (සර්), දසන්(කොටා), පීටර් (සඳුන්), දේවක, ඉසුරු, යුශාන්, මයුර, කවිෂල් මලය, වගේම මගේ යෙහෙළිය ශෂී, මේ හැමෝම මට හමු වුණු හොඳ යාළුවො. එකා වගේ හැම එකාටම උදව් කර ගන්න ගමන් බයිස්කෝප් වෙනුවෙන් තමන්ගෙ කාලය කැප කරමින් අනිත් අයගේ තෘප්තිය වෙනුවෙන් තමන්ගෙ තෘප්තිය කැප කරපු අය. එක නමක් හරි මඟ හැරිල නම් සමාවෙන්න ඕනෙ. මම ඔය මතක ඔක්කොම තමා දැම්මෙ. මීට අමතරව බයිස්කෝප් පවුලේ තව ගොඩාක් යාළුවො එකට එකතුවෙලා ඉන්න. ඒක සුහද හමුවෙදි ගොඩාක් හොඳින් තේරුම් ගියා. ඉතිං මේ තමයි මගේ කතාව. මේක ගොඩක් අය කියවන එකක් නෑ. ඒත් ඉතිං හැමදාම 100 වැනි උපසිරැසියක් කරන්න වෙන්නෙ නෑනෙ. ඒකයි මේ ඔක්කොම කිව්වෙ. දැන් එහෙනම් ඉතිං චිත්‍රපටිය පැත්තට හැරිල බලමු නේ. 😀😀

How to train your dragon (HTYD) මුල්ම සිනමා කෘතිය එළි දකින්නෙ 2010 වර්ෂයේ. IMDb මීටරය කරකවල පළමු වටයෙන්ම හොඳම 250 අතරට එන්න සමත් වුණු ත්‍රිමාණ සජීවීකරණ සිනමාවක් බවට HTYD සමත් වුණා. ඊට පස්සෙ නැවත අපිට මෙහි දෙවැනි දිගහැරුම ලැබෙන්නෙ How to train your dragon (2014) විදියට, අවුරුදු හතරකට පස්සෙ. ඊටත් පස්සෙ How to train your dragon : The Hidden World (2019) නිකුත් වෙන්නෙ ඉන් වසර 5කට ආසන්න කාලෙකට පස්සෙ. ලේසි පහසු නෑ මෙය 2019 පෙබරවාරි 22 විකාශය ඇරඹුණු සතියෙ සති අන්තයේ ඇ:ඩො:මි $55ක ආදායමක් ලබනව. ඇමරිකාව සහ කැනඩාව තුළ පමණක් ඇ:ඩො:මි $148 ක් මේ වෙද්දි ආදායම් ලබල තියෙනව. ඒ වගෙම ලෝකෙ වටේම ගත්තම ඇ:ඩො:මි $494ක ආදායමක් ලබල තියෙනව. එතකොට වියදම් කරල තියෙන්නෙ කීයද දන්නවද? ඇ:ඩො:මි $129 ක් විතරයි. පේනවනෙ මාසයක් වගේ ඇතුළෙ ලබල තියෙන ආදායම කොහොමද කියල. මේ වෙනකොට IMDb දර්ශකයේ 7.9ක ප්‍රේක්ෂක ප්‍රතිචාර ලබාගෙනත් අවසන්. අධ්‍යක්ෂණය Dean DeBlois විසින් සිදු කරල තියෙන්නෙ, Cressida Cowell තමයි මේ කතා මාලාවේ නියම හිමිකරු. දැන් ඉතිං කතාව පැත්තට හැරෙමු නේ.

කලින් කතාව තුළදි අපි දැක්ක, බ්ලඩ්ෆිස්ට් නිසා දූෂිත වුණු ඇල්ෆාගෙ බලපෑම නිසා ටූත්ලස්, හිකප්ට එල්ල කරපු ප්‍රහාරය වලක්වන්න ගිහින් හිකප්ගෙ තාත්ත මැරුණ. ඒත් ඒ ඔක්කොම සටන් අවසානයේ ටූත්ලස් හැම මකරෙකුගේම ඇල්ෆා බවට පත් වුණා. හිකප් වයිකින්වරුන්ගේ නායකයා බවට පත් වුණා. ඒ ඔක්කොම එහෙම තියෙද්දි ඉතිං මේ වතාවෙ හිකප්, ටූත්ලස් ඇතුළු පිරිස මූණ දෙන්නෙ කලින් කතා දෙකටම වඩා ඉතාම දරුණු ඝාතකයෙක් එක්ක. හිතල බලන්න, අනිත් හැම ජාතියකම මකරු ඕන පදම් ඉද්දි ඇයි නයිට් ෆියුරිල විතරක් එක්කෙනෙක් ඉන්නෙ. ඔන්න ඔ‍ය ප්‍රශ්නෙට උත්තරය තමයි ග්‍රිමෙල් කියන්නෙ. ග්‍රිමෙල් කියල කියන්නෙ නයිට් ෆියුරි ඝාතකයෙක්. ඉතිං ඔහුගේ ඝාතන රැල්ල නිසා තමයි නයිට් ෆියුරිල වඳ වෙලා ගිහින් තියෙන්නෙ. කතාව ආරම්භ වෙන්නෙ හිකප්, ඇස්ට්‍රිඩ් ඇතුළු යාළුවො පිරිස යනව නැව් වගයක හිරකරගෙන ඉන්න මකරු ටිකක් බේර ගන්න. ඒක සාර්ථක කර ගන්න හැකි වුණත්, මේ මකරුන් නිදහස් කර ගැනීම ගැන මකරු අල්ලගත්ත පිරිස ඉන්නෙ ලොකු කේන්තියකින්. ඉතිං ඒ නිසා තමයි ඔවුන් ග්‍රිමෙල්ගෙ උපකාර ඉල්ලන්නෙ. ඒ අනුව තමයි ග්‍රිමෙල් ටූත්ලස් පස්සෙ පන්නන්නෙ. හෝව් හෝව්.. එතකොට කවුද අර ලස්සන සුදු කෑල්ල. ඔව් ඔව්.. අවසානෙ ටූත්ලස්ටත් හරියනව. නයිට් ෆියුරි වර්ගයාගෙ අවසන් ගැහැණු සත්වයා ඉන්නෙ මේ මකරු අල්ලන පිරිස එක්ක. ඇය ලයිට් ෆියුරි කෙනෙක්. කොහොමහරි ටූත්ලස් ඇය ගැන දැනගත්තට පස්සෙ ආලයෙන් මුසපත් වෙනව. කෑල්ල පට්ට ලස්සන වුණාට කට්ට කාල තමයි ටූත්ලස් මෙයාව යාළු කර ගන්නෙ. ඉතිං මේ ඔක්කොම මෙහෙමෙ වෙන අතරෙ ග්‍රිමෙල්, හිකප්ගෙ ගෙදරටම ඇවිල්ල තර්ජනය කරන්නෙ, ටූත්ලස්ව මරන්න ඉඩ නොදුන්නොත් මුළු ගමම විනාශ කරනව කියල. ඊට පස්සෙ තමයි හිකප් තීරණය කරන්නෙ එයාගෙ තාත්ත පුංචි කාලෙ එයාට කියල දුන්න කතාන්දරයක එන මකරුන්ගේ ක්ෂේම භූමිය වෙන සැඟවුණු ලෝකය හොයාගෙන ගමෙන් පිටත් වෙලා යන්න. එතනින් එහාට සම්පූර්ණයෙන්ම තියෙන්නෙ කලබැගෑනිම තමයි.

කතාව ලොකුවට විස්තර කළාම බලන්න දෙයක් නැති වෙනව නේ. ඉතිං හිකප්ට මේ සැඟවුණු ලෝකය හොයාගන්න හැකි වේවිද? ලයිට් ෆියුරි පේන තරම්ද හොඳද? ග්‍රිමෙල් අවතක්සේරුවට ගැනීම හිකප්ට ඇති කරන කරදර මොනවද? අවසානෙ මොකක් වෙන්න පුළුවන් ද? ඔය ඔක්කොටම උත්තර පැය 1 විනාඩි 40 කින් දැනගන්න පුළුවන්. අවසාන විනාඩි කීපයේ කාලය විශාල ලෙස හකුළුවා දැක්වීමක් වෙන නිසා ආයෙත් මේ තුළින් සිනමා නිර්මාණයක් බිහි වේවිද කියන්න නම් දන්නෙ නෑ. එහෙනම් ඉතිං හිකප්, ටූත්ලස් දෙන්න එක්ක සැඟවුණු ලෝකය හොයාගෙන යන්න ලෑස්ති වෙන්න.

තවත් උපසිරැසියකින් නැවත හමුවෙමු. ජය වේවා..!

 

 

 

Due to copyright issues, we no longer provide any torrent links.

මෙම ලබා දී ඇති උපසිරසි BR සහා HD පිටපත් සඳහා අදාළ වේ.

68,830 downloadsDownload How.to_.Train_.Your_.Dragon.The_.Hidden.World_.2019-_BR-Update.zip75 KB

මේ ලබා දී ඇති සිංහල උපසිරැසි පිළිබද “උදයංග සම්පත්” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

Subtitle Contributor Rank

GOLD MEMBER
JOINING DATE – 2017-07-03
SUBMAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.