Maharshi (2019) Sinhala Subtitles | සාර්ථකත්වය කියන්නේ අවසානයක් නෙවෙයි! [සිංහල උපසිරැසි සමග] *50

ආයුබෝවන් සියලු දෙනාටම, වෙනද වගේම අදත් ඔයාලට උපසිරැසියක් අරගෙන ආවෙ පොඩි විශේෂත්වයකුත් එක්ක. මොකද මේක මගේ පනස්වෙනි උපසිරැසිය වෙන නිසා. අනිත් උපසිරැසි දෙන සයිට් එක්ක බලද්දි බයිස්කෝප් එකේ මම දැකපු එක වෙනසක් තමයි උපසිරැසිකරුවාගෙ කඩයිම් වලට විශේෂත්වයක් ලබා දීම. ඉතින් ඒ වෙනුවෙන් බයිස්කෝප් අඩවියේ ඇඩ්මින් මණ්ඩලයට ස්තූති කරන්න කැමතියි. උපසිරැසි පනහක් කිව්වම ලොකු කාලයක් ගෙවිල ගියා වගේ. ඇත්තටම පනස් වෙනි උපසිරැසිය ගැන මට කිසි අදහසක් තිබුනෙ නැහැ. ඇඩ්මින් මණ්ඩලයේ සිසිල සහෝදරය තමයි මට මේක පනස්වෙනි උපසිරැසිය වෙනුවෙන් බාර ගන්න කිව්වෙ. මම ඉස්සෙල්ලම උපසිරැසියක් කරන්න මේල් එකක් එව්වම සිසිල ප්‍රසාද් සහෝදරයම තමයි ඒකට ප්‍රතිචාර දැක්වුවෙ. මගේ උපසිරැසි ගමනෙ මෙච්චර දුරක් එන්න ඔහු අධිෂ්ඨානයක් වුනා කිව්වොත් නිවැරදියි. ස්තූතියි සිසිල සහෝ.

ඒ වගේම මම එවන උපසිරැසි වල හරි වැරදි බලල ඉක්මනින්ම ඔයාල අතට පත් කරන්න මහන්සි වෙන තිසර නියෝ, හසන්ත වික්‍රමරත්න, අශාන් විමුක්ති, ආසිරි ප්‍රියන්ත වගේම ඇඩ්මින් මණ්ඩලයේ(තිරය පිටුපස ඉන්න) අනිත් සහෝදර සහෝදරියන්වත් මතක් කරන්න කැමතියි. අපි දෙන හැම උපසිරැසියකටම වගේ කමෙන්ටුවක් දාන්න අමතක නොකරන රොයිලි අයියටත් විශේෂ ස්තූතිය. ඒ වගේම උපසිරැසිකරනයේ නියැලෙද්දි මතක් නොකරම බැරි උපසිරැසිකරුවන් පිරිසක් ඉන්නව. ශසිත් සඳරුවන්(සඳේ අයියා), කවිෂල් රසින්ත, කවිනු වීරක්කොඩි, තරිඳු අයියා(MTR), තාරක නුවන්, දහරා මුතූ අමා(දහරා අක්ක), බේනුක නිම්හාන් සහෝදර සහෝදරියන්වත් මතක් කරන්න ඕන. තව ඉන්නව ඔක්කොම දාන්න නම් ඉඩ මදිවෙයි. උපසිරැසියකට වචනෙකින් හරි දිරි දුන්නු බයිස්කෝප් උපසිරැසිකරුවන් වගේම ප්‍රේක්ෂක ඔබලාවත් ආදරෙන් මතක්කරනව. ඇත්තටම ඔයාලගෙ කමෙන්ට් නිසා තමයි මෙච්චර දුරක් ආවෙ. වසරකට ආසන්න කාලයක් මගේ උපසිරැසි වල හරි වැරදි, හොද නරක ගැන කියමින් දිරි දීපු ප්‍රේක්ෂකයො හැමෝටම ස්තූතියි.

මුලින් මමත් ඔයාල වගේ බයිස්කෝප් රසිකයෙක්. ඒ ලෙවෙල් කරන කාලෙ (2012/2013) ෆිල්ම් එකක් බලන්න ඕන වුනාම ඉතින් බයිස්කෝප් තමයි. ඒ ලෙවෙල් වලින් පස්සෙ බයිස්කෝප් එකේ තිබුනු ලිපි කියෙව්වම මමත් සබ් එකක් කරල බැලුවොත් හොදයි කියල හිතුන. උපසිරැසි කිහිපයක් කරත් බයිස්කෝප් එකට දාගන්න වෙලාවක් ලැබුනෙ නැහැ. ඉතින් බයිස්කෝප් එකේ මගේ ගමන ආරම්භ වෙන්නෙ Jaya Janaki Nayaka (2017) චිත්‍රපටයෙ උපසිරැසි ලබා දීමත් එක්ක. මතක විදිහට 2018 අගෝස්තු මාසෙ. අවුරුද්දක් යන්නත් කලින් මෙච්චර දුරක් එන්න ලැබෙයි කියල හිතුවෙම නැහැ. වැඩිපුරම සබ් කරල තියෙන්නෙ ෆිල්ම් වලට(එතනිනුත් තෙලිඟු තමා අංක එකට තියෙන්නෙ😛). ඔය අතරෙ කතා මාලා දෙක තුනකටත් සබ් කරන්න අවස්ථාව ලැබුන. චිත්‍රපට තිස් අටකටත්, කතා මලා පහක කතාංග දහතුනකටත් දායකත්වය දක්වල තියනව. කණගාටුවෙන් වුනත් කියන්න වෙනව අධ්‍යාපන කටයුත්තක් පටන් ගත්තු නිසා කලින් වගේ උපසිරැසිකරනයෙ නියැලෙන්න වෙලාවක් නැති වෙයි. පුලුවන් වෙලාවක් ආවොත් සබ් එකක් අරගෙන මේ පැත්තෙ එන්න අමතක කරන්නෙ නැහැ. මොකද මේ වැඩේ ඉතින් නතර කරන්න පුලුවන් වැඩක් යැයි. හරි ඒ කතාව පැත්තකින් තියල ෆිලුම පැත්තට හැරෙන්නම්.

2018 අගෝස්තු 9 වෙනිද, තෙලිඟු රසික අපි කවුරුත් දන්න, Mahesh Babu ගෙ උපන්දිනය දවසට කලින් දවසෙ, Mahesh Babuගෙ ඊලඟ  ප්‍රයත්නය මොකක්ද කියල ඒත්තු ගන්වන ආකාරයේ ටීසර් පටයක් අන්තර්ජාලයට නිකුත් වෙනව. 2019 මැයි 1වෙනිද ඒ කුතුහලය අලුත් කරමින් පූර්ව ප්‍රචාරක පටයක් අන්තර්ජාලටයට නිකුත් වෙනව. තෙලිඟු රසිකයො වෙන අපි හැමෝම මේ පූර්ව ප්‍රචාරක පටය නිසා හොල්මන් වෙලා හිටියෙ. කවුරුත් ඇහුව ප්‍රශ්නෙ Mahesh Babu මේ කරන්න යන අලුත් වැඩේ මොකක්ද? කියන ප්‍රශ්නෙ.

ඉතින් 2019 මැයි 1වෙනිද මේ වැඩේට පූර්ව නිදහස් කිරීමේ උත්සවයකුත් සංවිධානය කරල තිබුන. මේ උත්සවය බොහොම උත්කර්ශවත් අන්දමින් සිදුවුනා කියල තමයි විචාරකයො අදහස් දක්වල තිබුනෙ. උත්සවේට පහල පින්තූරෙ ඉන්න දෙන්නත් ඇවිල්ල හිටිය. බලන්න දන්නවද කියල.

vijay deverakonda and venkatesh in pre-release event of Mahesh Babu’s Maharshi

අවසානෙ අපි කවුරුත් බලාගෙන හිටිය වගේ 2019 මැයි 9වෙනිද Maharshi (මහේශ් බාබුගේ 25වෙනි සිනමා පටය) නිකුත් වීම සිදු වෙනව. පලවෙනි දවසෙම වර්ථා කිහිපයක් බිඳහෙලන්න සමත් වෙනව.

– 2019 වසරේ තෙලිඟු සිනමාවක් ලද වැඩිම පලමු දින ආදායම.
– සති එක හමාරක් පමණ තුලදී Bharat Ane Nenu අදායම් වාර්ථා බිඳහෙලීමට සමත් වීම.

ඉතින් මහේශ් බාබු තමන්ගෙම වාර්ථාවක් අලුත් කරගෙන තියනව. මෙහෙම වාර්ථා අලුත් කරපු පලමු දින අදායම සටහන් වුනේ ඉන්දියානු රුපියල් කෝටි 34ක් ලෙසයි. ඒ වගේම තමයි නිකුත් වෙලා දින හතරක් තුල ඉන්දියානු රුපියල් කෝටි 100 සීමාව පසු කරන්නත් මෙම සිනමාපටයට හැකියාව ලැබෙනව. ඒ වගේම තමයි මේ සලුරුව IMDb දර්ශකයේ 7.9ක (2,800+ votes) අගයක් ලබා ගන්න සමත්වෙලා තියනව. මේක මහේශ්ගෙ 25 වෙනි චිත්‍රපටය වීමත් තවත් එක් විශේෂත්වයක්. තව දෙයක් Bharat Ane Nenu සහ Rangasthalam අදායම් වාර්ථා පසු කරමින් හොදම අදායම් ලැබූ තෙලිඟු චිත්‍රපට අතර තුන්වන ස්ථානය ගැනීමටත් සමත් වෙනව, එබැවින් Maharshi චිත්‍රපටය දෙවැනි වන්නේ බාහුබලි චිත්‍රපට යුගලයට පමණි. චිත්‍රපටය Action/Drama ගනයට තමයි අයත් වෙන්නෙ. නිෂ්පාදනය Sri Venkateswara Creations, Vyjayanthi Movies, PVP Cinema යන නිෂ්පාදන ආයතන තුනෙන්. නිෂ්පාදන පිරිවැය ඉන්දියානු රුපියල් මිලියන 100ක්(ඇමෙරිකානු ඩොලර් මිලියන 14ක්) කියල තමයි සදහන් වෙන්නෙ.

Vamsi Paidipally අධ්‍යක්ෂනය කරන සිනමා පටයට Mahesh Babu සමගින් Pooja Hegde, Allari Naresh ප්‍රධාන චරිත වලට දායකත්වය ලබා දෙනව. මිනිත්තු 176ක් පුරාවට දිවෙන සිනමා පටය, Prakash Raj, Mukesh Rishi, Vidyullekha Raman, Jagapati Babu වැනි ක්ෂේත්‍රයේ දක්ෂ නලු නිලියන්ගේ රන්ගනයෙන් හැඩවෙලා තියනව.

ලිපිය දිග වැඩි වුනාද මන්දා, මම චිත්‍රපටයෙ කතාව ගැනත් පොඩි විස්තරයක් දෙන්නම්, රිශී කියන්නෙ හොදට ඉගෙන ගෙන ජීවිතේ සාර්ථක කරගන්න හිතන දක්ෂ කොල්ලෙක්. ඒත් රිශී තමන්ගෙ තාත්තත් එක්ක පොඩි වයසෙ ඉදන්ම එච්චර සුහදව නෙවෙයි ඉන්නෙ. වැඩිදුර අධ්‍යාපනයට රිශී කොලේජ් එකකට එකතු වෙනව. එතනදි තමයි රිශීට පූජා සහ රවී කියන අපූරු යාලුවො දෙන්නව මුන ගැහෙන්නෙ. හැඟීම්බරව ගලාගෙන යන සිනමා සිත්තම ඔයාලගෙ හදවත ස්පර්ශ කරනවා නොඅනුමානයි. මම වැඩිය කතාව විස්තර නොකර ඉන්නම්. රිශීගෙ සංචාරයට එකතුවෙන්න ආරධානා කරන ගමන්(Join the journey of RISHI) මම සමු ගන්නවා. පුරා වසරක් පමණ කාලයක් මගෙත් එක්ක රැඳිල හිටිය ප්‍රේක්ෂක ඔබ සැමට නැවතත් මගේ ප්‍රණාමය.

ජය ශ්‍රී!

සාර්ථකත්වයට නැවතීමේ තිත් නොමැත, ඇත්තේ කොමාවල් පමණි!
සාර්ථකත්වය කියන්නෙ එක් ගමනාන්තයක් නොවෙයි!
සාර්ථකත්වය කියන්නෙ සංචාරයක්!

 

 

Due to copyright issues, we do not provide any torrent link.

මෙම ලබා දී ඇති උපසිරසි Proper TRUE HDRip පිටපත් සඳහා අදාළ වේ.

43,615 downloadsDownload Maharshi-2019.zip85 KB

මේ ලබා දී ඇති සිංහල උපසිරැසි පිළිබද “ චානක ඉඳුනිල් ” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

 

Subtitle Contributor Rank
SILVER MEMBER
JOINING DATE – 2018-08-02
SUBMAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.