Stuart Fails to Save the Universe [S01 : E03] Sinhala Subtitles | බර්ට්ගේ මැජික් බලේ ! [සිංහල උපසිරසි]

පහුගිය කොටසේ වුනේ මොනවද බලමු,
දෙවෙනි කොටස පටන් ගන්නේ, කලින් කොටසේදී ස්ටුවර්ට් ඇතුළු පිරිස වෙනස් වුණු ඒ අලුත් "සතුටින් පිරි" විශ්වයෙන්.

ස්ටුවර්ට්, බර්ට් සහ ක්‍රිප්කි ඉන්නේ ස්ටුවර්ට්ගේ කොමික් පොත් කඩේ ඇතුළේ. ඒ වෙලාවේ කයිල් සහ ට්‍රෙවර් කඩේට එනවා. ඩෙනීස් ළඟ නැති එක ගැන ස්ටුවර්ට් ඉන්නේ හුඟක් කණගාටුවෙන්. රාජ්ත් මැරුණා නේද කියලා බර්ට් මතක් කරද්දී, ක්‍රිප්කි අමාරුවෙන් හරි රාජ්ගේ පැත්ත අරන් කතා කරන්න හදනවා. කයිල් සහ ට්‍රෙවර් කොමික් පොතක් ගද්දී පොඩි රණ්ඩුවක් දාගන්න හැදුවත්, අන්තිමේදී ඒක සාමකාමීව විසඳගන්නවා.

දැන් මේ කොමික් කඩේ ආචි සහ රිචි රිච් කොමික් පොතුත් තියෙනවා. ස්ටුවර්ට්ගේ හිතට මේ හැමදේම හරිම අමුතුයි කියලා හිතෙනවා. මැෂින් එක අලුත්වැඩියා කරන්න ගිහින් එක එක විකාර කළේ ස්ටුවර්ට් තමයි කියලා ක්‍රිප්කි එයාට බනින්න පටන් ගන්නවා. දෙන්නගේ රණ්ඩුව වැඩි වෙද්දී, එයාලගේ බෙල්ල පිටිපස්සේ තියෙන දිලිසෙන රිසෙප්ටර් වලින් එකපාරටම විදුලි සැර වදින්න පටන් ගන්නවා. බර්ට් ඒ රිසෙප්ටර් එක අතගාලා බලද්දී ක්‍රිප්කි ආයෙමත් කෑගහන්න ගිහින් ආයෙ සැරයක් විදුලි පාරක් කනවා.

මේ තුන්දෙනා එළියට බැහැලා බලද්දී තේරෙනවා බෙල්ලේ තියෙන මේ රිසෙප්ටර් නිසා හැමෝම අනිත් අයට හරිම කරුණාවෙන්, හොඳින් සලකන බව. එයාලා වෙනත් විශ්වයකට යන්න ඕනද කියලා කල්පනා කළත් ඒ අදහස ඉක්මනින්ම අතහැර දානවා. පාරට ආපුවාම, එයාලට පෙනෙනවා අහසේ පාවෙවී තියෙන මැද කොළ පාට තිතක් තියෙන, දිලිසෙන රිදී පාට, කෙළවර උල් වුණු කුළුණක්.

ආපහු කොමික් කඩේට ආවාට පස්සේ ක්‍රිප්කිට ඕන වෙනවා ලෙනාඩ් සහ ෂෙල්ඩන්ව හොයාගෙන යන්න. ඒත් ස්ටුවර්ට්ගේ එකම අරමුණ වෙන්නේ ඩෙනීස්ව හොයාගන්න එක.

ක්‍රිප්කි සහ බර්ට් කැල්ටෙක් විශ්වවිද්‍යාලයට ගියත්, ලෙනාඩ් හෝ ෂෙල්ඩන් එක්ක කලින් වෙලාවක් වෙන් කරගෙන නැති නිසා එයාලට ඇතුළට යන්න හම්බවෙන්නේ නැහැ. තමන්ගේ කේන්තිය පාලනය කරගන්න බැරි වෙන ක්‍රිප්කිට දිගින් දිගටම විදුලි සැර වදිනවා.

ස්ටුවර්ට් කොහොමහරි ඩෙනීස්ව හොයාගන්නවා. ඒත් එයා ඉන්නේ ගැරී එක්ක යාළු වෙලා. ස්ටුවර්ට් කෙළින්ම ගිහින් කියනවා එයාත් එක්ක එන්න කියලා. ඩෙනීස් ගැරීට වැඩිය කැමති නැති නිසා ඒ ගැන හිතලා බලන්න පෙළඹෙනවා. හැබැයි ඩෙනීස් ගැරීගෙන් වෙන් වුණොත් ගැරී දුකට පත් වෙනවා, එතකොට ගැරීගේ බෙල්ලටත් විදුලි සැර වදිනවා.

බර්ට් අභ්‍යන්තර පිළිගැනීමේ නිලධාරිනිය එක්ක කතා කරන්න හදනවා. ඒත් මේ විශ්වයේ භූගෝල විද්‍යා දෙපාර්තමේන්තුව තියෙන්නේ ගබඩා කාමරයක අන්තිම කෙළවරේ කියලා දැනගත්තාම එයාට කේන්ති යනවා.

බර්ට් සහ ක්‍රිප්කි කැල්ටෙක් එකෙන් එළියට එද්දී, එයාලව අත්අඩංගුවට ගන්න පොලිසිය ඇවිත්. එයාලා කරපු වරද තමයි නිතරම කේන්ති ගන්න එක. එයාලව තබාගන්නේ "නැවත අධ්‍යාපනය ලබාදෙන මධ්‍යස්ථානයකට."පොලිස් කාර් එක ඇතුළේ එයාලට කන්න ග්‍රැනෝලා බාර් සහ බොන්න වතුරත් තියෙනවා. ක්‍රිප්කි දිවීමට හැදුවත් ආයෙමත් විදුලි සැර වදිනවා. බලද්දී ස්ටුවර්ට් සෙට් එකත් ඒ කාර් එක ඇතුළේ ඉන්නවා.

මේ නැවත අධ්‍යාපනය දෙන මධ්‍යස්ථානයේදී, තිරයක් මත ක්‍රිස්ටීන් බරන්ස්කි (TBBT එකේ ලෙනාඩ්ගේ අම්මාට රඟපාන කෙනා) පෙනී සිටිමින් මේ ඒකාධිපති ලෝකය ඇතිවුණේ කොහොමද කියලා පැහැදිලි කරනවා. මිනිස් සංහතිය වඳවී යාමේ තර්ජනයට ලක්වෙලා තියෙද්දී, විද්‍යාඥයින් කිහිපදෙනෙක් එකතු වෙලා මිනිස්සුන්ගේ මනස යහපතට යොමු කරන්න කෘතිම බුද්ධියක් (AI) නිර්මාණය කරලා තියෙනවා. ඒත් පස්සේ කාලෙක මේ AI එක නරක අතට හැරිලා, ඒක හදපු විද්‍යාඥයින්වම මරලා දාලා. ඊටපස්සේ තමයි හැම මනුස්සයෙක්ගේම බෙල්ලට මේ දඬුවම් දෙන රිසෙප්ටර් සවි කරලා, අහසින් මුර සංචාරය කරන පද්ධතියකුත් හදලා තියෙන්නේ.

මේ නැවත අධ්‍යාපනය ලබාදීමේ වැඩසටහන මාස 30 කට දිවෙනවා. එයාලා එතැනින් පැනලා යන්න හදලා අසාර්ථක වුණාට පස්සේ, මාස 30 කට පස්සේ එයාලා එළියට එන හැටි පෙනෙනවා.

එතැනදී අඳුරන්නේ නැති පිරිසක් ඇවිත් එයාලව කළු පාට ලොකු වෑන් එකකට දාගන්නවා. ඒ වෑන් එක ඇතුළේ අර කැරලි කණ්ඩායමේ සාමාජිකයෙක් වෙන සැක් ඉන්නවා. එයාලගේ නායිකාව තමයි පෙනී. එයා එයාලව මේ සිහින ලෝකයෙන් මුදවාගන්න ("deprogram" කරන්න) හැමෝටම පට පට ගාලා කම්මුල් පාරවල් දෙන්න පටන් ගන්නවා. මෙයාලා දැන් ඉන්නේ අර AI එකේ තාක්ෂණයට අහුවෙන්නේ නැති ආරක්ෂිත ස්ථානයක.

එතකොටම ඩෙනීස් අර කාලය වෙනස් කරන මැෂින් එකත් අරන් එතැනට එනවා. කැරලිකරුවන්ගේ උදව් ඉල්ලලා තියෙන්නේ ඩෙනීස්. ඒත් ක්‍රිප්කි ආයෙමත් වැඩේ අනාගෙන, මැෂින් එකත් අරන් දුවන්න හදනවා. ඒ වෙලාවේ ඩ්‍රෝන පිරිසක් කඩා වැදිලා හැමෝටම විදුලි සැර අල්ලනවා.

මේ කෝලාහලය අස්සේ බර්ට්, ක්‍රිප්කි, ස්ටුවර්ට් සහ ඩෙනීස් ආයෙමත් පාරක් තවත් වෙනස්ම විශ්වයකට විසිවෙනවා.

මෙහෙදී අපිට කයිල් සහ ට්‍රෙවර්ව ආයෙත් කොමික් කඩේදී හම්බවෙනවා. එයාලා කතා කරන්නේ ගූඩ විද්‍යාව සහ මායා බලයන් ගැන. බර්ට්ව ගිනි තියලා මරන්න කණුවක බැඳලා තියෙද්දී ක්‍රිප්කිට ඒකට කිසිම දෙයක් කරගන්න බැරි වෙනවා.

විද්‍යාව කියන්නේ නරක, පාපකාරී දෙයක් විදිහටත්, මායාව ඇත්තක් විදිහටත් සැලකෙන මේ අලුත් විශ්වය ඇතුළේ දෙවැනි කථාංගය අවසන් වෙනවා.

එහෙනම් අද කොටස ඔයාලා බලන්න.
හෙට ඊළඟ කොටසින් හමුවෙමු