Drishyam 2 (2021) Sinhala Subtitles | මළගිය ඇත්තෝ හඹා එති…! [සිංහල උපසිරසි]

මට ඔයාලට පොඩි කතාවක් කියන්න තියෙනවා. පොඩියි කිව්වට මේක සිනමා ඉතිහාසය හොල්ලපු චිත්‍රපටයක් ගැන කතාවක්. ඉතිං, අපි යමු අවුරුදු 7ක් ආපස්සට. හරියටම කියනවා නම්, අවුරුදු 7යි මාස 2ක් අතීතයට යමු. හරියටම වර්ෂ 2013ක් වෙච්ච දෙසැම්බර් මාසෙ 19 වෙනිදා. ලෝකයේ ලොකුම රටක, පුංචිම පුංචි සිනමා කර්මාන්තයකින්, බොහොම පොඩි සිනමා නිර්මාණයක් එදා දවසේ එළි දැක්වුණා. හැබැයි, එදා ඒ විදියට නිකුත් වෙච්ච ඒ සිනමා නිර්මානය නිසා සමස්ත සිනමා කර්මාන්තයක් උඩු යටිකුරු වේවි කියලා කවුරුවත් නිකමටවත් හිතුවෙ නැතුව ඇති. මේ තමයි ඒ කතන්දරය!

ඉන්දියාව කියන රටේ, මලයාලම් කියන පුංචිම පුංචි සිනමා කර්මාන්තයෙන්, ද්‍රිෂ්‍යම් (2013) කියලා බොහොම පොඩි සිනමා නිර්මාණයක් එළි දැක්වුනා.
ප්‍රධාන රංගන දායකත්වය ලබාදුන්නෙ, එදාමෙදා තුර මලයාලම් සිනමාවෙන් බිහිවූ ජනප්‍රියතම සහ අද්විතීයම රංගන තාරකාව, මෝහන් ලාල්!
Memories (2013) ගහලා පිකප් එකේ හිටපු Jeethu Joseph මහත්මයව රියල් පොරක් කරපු සිනමා නිර්මාණය තමයි මේ ද්‍රිෂ්‍යම් චිත්‍රපටය.
ඉන්දියානු රුපියල් කෝටි 5කට අඩු බජට් එකකින් හදලා, ඉන්දියානු රුපියල් කෝටි 75 ඉක්මවපු ආදායමක් හොයපු සිනමා නිර්මාණය තමයි මේ ද්‍රිෂ්‍යම් චිත්‍රපටය.
මලයාලම් සිනමාවෙන් ඉන්දියානු රුපියල් කෝටි 50 ඉක්මවූ ආදායම් වාර්තාවක් තියපු පලවෙනි සිනමා නිර්මාණය තමයි මේ ද්‍රිෂ්‍යම් චිත්‍රපටය.
Ravichandran ගේ රංගන දායකත්වයෙන් කන්නාඩ භාෂාවෙන් 2014 වර්ෂයේදී Drishya යන නමින්ද,
එම වර්ෂයේදීම Venkatesh ගේ රංගන දායකත්වයෙන් තෙලිඟු භාෂාවෙන් Drushyam යන නමින්ද,
Kamal Haasan ගේ රංගන දායකත්වයෙන් 2015 වර්ෂයේදී දමිළ භාෂාවෙන් Papanasam යන නමින්ද,
එම වර්ෂයේදීම Ajay Devgn ගේ රංගන දායකත්වයෙන් හින්දි භාෂාවෙන් Drishyam යන නමින්ද,
ජැක්සන් ඇන්තනී මහත්මාගේ රංගන දායකත්වයෙන් සිංහල භාෂාවෙන් ධර්මයුද්ධය යන නමින්ද,
එතකින් නොනැවතී, ඉන්දීය සිනමා ඉතිහාසය තුල ප්‍රථම වතාවට ඉන්දීය සිනමා නිර්මාණයක් චීන භාෂාවට ප්‍රති නිර්මාණය වෙමින්,
2019 වර්ෂයේදී චීන භාෂාවෙන් Sheep Without a Shepherd යන නමින්ද ප්‍රති නිර්මාණය වූ සිනමා නිර්මාණය තමයි මේ ද්‍රිෂ්‍යම් චිත්‍රපටය.
Top Rated Indian Movies ලැයිස්තුවේ 33 වෙනි ස්ථානය වගේම,
Top Rated Malayalam Movies ලැයිස්තුවෙත් 17 වෙනි ස්ථානය තමන් සන්තක කරගෙන,
30, 000+ මනාප සංඛ්‍යාවකින් 8.3ක Imdb අගයක් සහිතව විරාජමානව වැජඹෙන සිනමා නිර්මාණය තමයි මේ ද්‍රිෂ්‍යම් චිත්‍රපටය.
ඒ වගේම, පුරා මාස 5කට ආසන්න කාලයක් මුළුල්ලේ ලොව වටා සිනමා ශාලා තුල තිරගත වෙමින්,
වර්තමාන මලයාලම් සිනමාවේ නැගී සිටීම කෙරෙහි සෘජුවම බලපෑ දැවැන්තම සාධකයක් තමයි මේ ද්‍රිෂ්‍යම් චිත්‍රපටය.

පුංචි ගමක, තමන්ගෙ බිරිඳ සහ දූවරුන් දෙදෙනා සමගින් කේබල් ටීවී බිස්නස් එකක් කරගෙන පාඩුවේ ජීවත් වෙච්ච ජෝර්ජ් කුට්ටිගෙ ජීවිතයට,
නොසිතූ මොහොතක චණ්ඩ කුණාටුවක් කඩා වදිනවා!
යළි කිසි ලෙසකින් හෝ ප්‍රති නිර්මාණය කල නොහැකි අයුරින් විනාශ වීමට යන සිය ආදරණීය පවුල වෙනුවෙන්,
කාලයක් තිස්සෙ උන්මාදයකින් මෙන් ඔහු නරඹන ලද සුවහසක් සිනමා නිර්මාණයන්හි අඩංගු අනේක විධි උපක්‍රමයන් භාවිතයෙන්,
දැවැන්ත බලවේගයකට එරෙහිව සටන් වදින මේ සාමාන්‍ය මිනිසා අවසානයේ සිය පවුල සුරක්ෂිත කරගනු ලබනවා!
එනමුත්, එම සුරක්ෂිත බාවය කෙතරක් කලකට වලංගු වේවිද?
චිත්‍රපටය අවසානයේ අප සියල්ලන්ගේම සිතෙහි ඇතිවූ ප්‍රශ්නාර්ථය එයයි!
වසර හතයි මාස දෙකකට පසුව අද තමයි ඔබෙත්, මගෙත් ඒ ප්‍රශ්නාර්ථයට පිළිතුරු ලැබෙන දිනය!

ඒ ගමමයි… ඒ ජෝර්ජ් කුට්ටිමයි… ඒ පවුලමයි…
හැබැයි, අළුත් පොලිස් ප්‍රධානියෙක්!
ඇට නැති දිවට බ්‍රේක් නෑ කියලා කතාවක් තියෙනවනෙ!
බෝම්බෙ පත්තු වෙනවා!
මලගිය ඇත්තො හඹාගෙන එන්න පටන් ගන්නවා!
අළුත් පොලිස් ප්‍රධානියා දුම්මල වරම අතට ගන්නවා!
කලින් වතාවෙ වගේම ජෝර්ජ් කුට්ටිට මේ වතාවෙත් තමන්ගෙ පවුල රැකගන්න පුළුවන් වේවිද?
එහෙමත් නැත්නම්…?

පොඩි අවවාදයක් දෙන්නම්. පලවෙනි චිත්‍රපටය හෝ, ඉහත කියපු ප්‍රති නිර්මාණ හයෙන් එකක් හෝ නොබලපු කෙනෙක් නම් වහාම මුල් චිත්‍රපටිය නරඹලා ඉන්න. එහෙම නැත්නම්, විඳින්න තියෙන සිනමා නිර්මාණයක්, විඳව විඳවා තමයි බලන්න වෙන්නෙ. (මං දැක්කා ලංකාවෙ සමහර යූටියුබ් සිනමා ඔස්තාර්ලා වගයක් රිවීව් කරලා තියෙනවා පලවෙනි ෆිල්ම් එක බලන්න ඕනෙ නෑ, මේක බලන්න පුළුවන් කියලා. උන්ට බම්බු ගහගන්න කියන්න. එකම කතා බීජය පදනම් වෙච්ච ෆිල්ම් දෙකක, දෙවනි ෆිල්ම් එක රිලීස් වෙන්නත් කලින්, පලවෙනි ෆිල්ම් එක නොබලා දෙවනි ෆිල්ම් එක බලලා තේරුම් ගන්න පුළුවන් කියලා කියන්න උන්දැලට අහවල් ඥානය පහලවෙලාද දන්නෑ)

ද්‍රිෂ්‍යම් කියන්නෙ ඉන්දියාවම හොල්ලපු නමක්!
මලයාලම කියන්නෙ මොකක්ද කියලා ලෝකෙටම කෑගහලා පෙන්නපු භාණ්ඩයක්!
මෝහන් ලාල් කියන්නෙ මලයාලමේ ටොප් බ්‍රෑන්ඩ් එකක්!
Jeethu Joseph කියන්නෙ වැටෙන සුනංගුවට නැගිටින එළකිරි ඩයල් එකක්!
මේ ඔක්කොමම් කලවම් වෙච්ච ද්‍රිෂ්‍යම් දෙවනි කොටස කියන්නෙ…
දෙවනි චිත්‍රපටියෙන් පලවෙනි චිත්‍රපටයෙ නම්බුවත් එක්කම ඉවර කරාවි කියලා හිතපු ෆෑන්ස්ලට කැරකිලා වැටෙන්නම හොඳවයින් කනේ පාරක් ගහපු…
රිලීස් වෙලා පැය කිහිපයක් යද්දිම,
Top Rated Malayalam Movies සහ Top Rated Indian Movies ලිස්ට් වලට පැනගන්න පුළුවන් වෙච්ච…
සරල…
ඒ වගේම සංකීර්ණ…
පලවෙනි හාෆ් එකේදි හරිම ආදරයෙන් හිමීට ඔළුව අතගගා ඉඳලා…
දෙවනි හාෆ් එක පටන්ගන්නවත් එක්කම හුස්ම ගන්නවත් ඉඩක් නොදී,
එක පිට එක යඳඩු මුෂ්ටි ප්‍රහාරයන්ගෙන් මුසපත් වන තෙක්ම පහරදෙන…
සිනමා රසිකයෙක් විදියට එදාමෙදා තුර මං දැකපු හොඳම සීක්වල් එකක්!

කමෙන්ට් වලින් දැක්ක කාරණා කීපයකට මේ වෙලාවෙ පිළිතුරක් දෙන්නම්. චෝදනාවක් තිබ්බා බයිස්කෝප් එකෙන් අළුත් ෆිල්ම් වලට දැන් සබ් දෙන්නෙ නැහැ කියලා. කොරෝනා වසංගතයත් එක්ක නිකුත් වෙන්න තිබ්බ බහුතරයක් චිත්‍රපට කල් ගියා. එහෙමත් එකක් තමයි OTT ෆ්ලැට්ෆෝම් හරහා නිකුත් වුණේ. ඔය අතරවාරයේ ගුණාත්මකභාවයෙන් ඉතාමත් අඩු මට්ටමේ චිත්‍රපට බොහෝමයක් අන්තර්ජාලයට නිකුත් වෙන්න ගත්තා. මේවයින් බොහොමයක් ඉන්දියන් ඒවා. කියන්න කණගාටුයි, මේ සමහර ඒවා චිත්‍රපටයක් කියලා නම් කරන්නවත් සුදුසුකම් නැති ඒවා විදියටයි මං නම් දැක්කෙ. හරියට නිකං ගෙදර ඉන්න ගමන් ආතල් එකට ගහපු ෆිල්ම්ද කියලත් වෙලාවකට හිතුණා. ඉතිං, ලංකාවෙ අපේ සමහරක් අයියලා මොකද කලේ, හිටු කියලා අර ජරාවල් වලට සබ් හදලා සයිට් වල දාගන්න පටන්ගත්තා. එහෙම දාලා නිකං හිටියෙත් නැහැ, ඔන්න අපි තමයි මුලින්ම දුන්නෙ, අපි විතරයි මේවට සබ් දුන්නෙ කියලා පම්පෝරි ගහන්නත් ගත්තා. මේවා දැකලා සමහර අය කියන්න ගත්තා, ඇයි බයිස්කෝප්ලා අර ෆිල්ම් වලට සබ් දෙන්නෙ නැත්තෙ, බයිස්කෝප්ලා දැන් අළුත් ෆිල්ම් වලට සබ් දෙන්නෙ නැහැ කියලා. ඒත්, බුද්ධිමත් ප්‍රේක්ෂකයෙක් නම් ඔබට දැන් උනත් සයිට් එකේ චෙක් කරලා බලන්න පුළුවන්, මේ වසංගත කාල සීමාවෙදි නිකුත් වෙච්ච ගුණාත්මක චිත්‍රපට අතරින් සැලකියයුතු ප්‍රමාණයක අලුත් චිත්‍රපට වලට අපි උපසිරැසි ලබාදීලා තියෙන්නෙ. ඒ වගේම, අළුත් චිත්‍රපටි අඩු නිසා ඒ වෙනුවට පැරණි, මගහැරුණු චිත්‍රපට වලටත් උපසිරැසි දීලා ඇති ඒ වෙනුවෙනුත් ප්‍රේක්ෂක පිරිසක් ඉන්න නිසා. චිත්‍රපටය අලුත් නම්, මොන ජරාවක් වුණත් කමක් නෑ දීලා දාලා සයිට් එක පුරවගන්න ඕනෙ කියන මතයේ නෙමෙයි පෞද්ගලිකව මම නම් ඉන්නෙ. ඇයි අපි කෙනෙක්ට රසවිඳින්න බැරි මට්ටමේ අඩු කොලිටියෙ සිනමා නිර්මාණ දෙන්නෙ? සයිට් එකේ ට්‍රැෆික් වැඩි කරගෙන ඇඩ් දාගන්නද? අපි හැම වෙලාවකම ගුණාත්මක සිනමා නිර්මාණයන් සඳහා ගුණාත්මක උපසිරැසි ලබාදීම පමණක්ම කල යුතුයි යන්න තමයි මගේ අදහස නම්.

අනිත් චෝදනාව තමයි බයිස්කෝප්ලා දැන් හැමෝටම පරක්කු වෙලා සබ් දෙන්නෙ කියන එක. ඒකට මං මෙහෙම උත්තරයක් දෙන්නම්. සබ් එකක ලයින් 1000ක් පරිවර්තනය කරන්න කොච්චර වෙලාවක් යනවද කියලා ඇහුවොත් ගොඩක් දෙනා කියාවි දන්නෙ නැහැ කියලා. ඒ නිසා මං මෙහෙම කියන්නම්. එකේ ඉඳලා දාහට ගණන් කරන්න කොච්චර වෙලාවක් යනවද? අන්න ඊට සාපේක්ෂව හිතන්නෙකො චිත්‍රපටයක් බලන ගමන් දෙබස් 1000-2000 ක් පරිවර්තනය කරලා ටයිප් කරන්න කොච්චර වෙලාවක් යාවිද කියලා. එහෙම හිතුවා නම් ඔය පරක්කුයි කියන අය කවුරුවත් පරක්කුයි කියන එකක් නැහැ. එතකොට තව කෙනෙක් කියාවි, එහෙනම් ඔය අනිත් අය අච්චර ඉක්මණට දෙන්නෙ මොකද උන් අමුතු උන්ද කියලා. ඔව්, උන් අමුතු උන් තමයි. අපි තමයි සබ් එක මුලින්ම දුන්නෙ කියලා පට්ටම් ගහගන්න ගූගල් ට්‍රාන්ස්ලේට් සබ් එකක් උඩින් උඩින් හදලා දෙන එකත්, දහයක් විතර එකතු වෙලා එක සබ් එක බෙදාගෙන කරලා, දෙන්නම් වාලේ සබ් දෙන එකත්, මේවා අමුතු එකෙක්ට ඇරෙන්න වෙන එකෙක්ට කරන්න බැහැ නේන්නම්. කාලයක් තිබ්බා, ලංකාවටම උපසිරැසි ලබාදෙන ප්‍රධාන මට්ටමේ වෙබ් අඩවි දෙකයි තිබුණෙ. චිත්‍රපටයක හොඳ පිටපතක් නිකුත්වෙලා දවස් 4-5ක් යනකොට ඒ වෙබ් අඩවි වලින් උපසිරැසි ලබාදුන්නා. ඒකටත් එක්ක වර්තමානය වෙද්දි රෑ 12ට විතර හොඳ පිටපතක් නිකුත්වෙන චිත්‍රපටයට පාන්දර 2 වෙනකොට සබ් එක දෙන්න පුළුවන් ජාතියෙ සුපිරි සබ් මැෂින් ටිකක් බිහිවෙලා ඉන්නවා. [ලොකු මහන්සියක් දරලා හෝල් කොපියට සබ් එක හදලා, හොඳ පිටපතක් ආ සැණින් අප්ඩේට් කරලා දෙන උපසිරැසිකරුවන් ගැන නෙමෙයි මං මේ කියන්නෙ] පැය 2-3ට ලයින් 1500-2000ක් පරිවර්තනය කරලා ටයිප් කරන්නත් පුළුවන්නම් ඒ කෙනා කොහොමටවත් සාමාන්‍ය මනුස්සයෙක් වෙන්න නම් බැහැ. හැබැයි, අදාල පුද්ගලයො දන්නවා තමන් මේ කරන්නෙ වැරැද්දක් කියලා. මේවා මහ බාල වැඩ විදියටයි මං නම් දකින්නෙ. මේ අඳ-බාල වැඩ වලින් කිසිම විදියකින් ගුණාත්මක උපසිරැසියක් නම් බිහිවෙන්නෙ නැහැ. මේ නිසා තමයි සමහරු සිංහල සබ් කිව්වම “අපෝ! මොන ජරාවක්ද!” කියන මට්ටමට මේ කලාව වැටිලා තියෙන්නෙ. හැබැයි, ගුණාත්මකභාවය ගැන හැමදාමත් ඉහලින්ම හිතන අපි ඉස්සර වගේම කාලය අරගෙන, වඩාත් හොඳ උපසිරැසියක් අරගෙන එන්නයි මහන්සි වෙන්නෙ. හැමදාමත් අපිත් එක්ක ඉන්න බුද්ධිමත් ප්‍රේක්ෂකයා දන්නවා අරහෙන් මෙහෙන් දෙන සිප්පි කටු කෑලි වගේ නෙමෙයි අපි දෙන ඒවා කියලා. ඉතිං, මන්ද පමා කියලා අහන අයට කියන්න තියෙන්නෙ, පමාවක් නැහැ, හොඳම දේ දෙන්නයි මේ උත්සාහය කියලා.

කිසිම කෙනෙක් එක්ක තරහක් වත්, තරඟයක් වත් නැහැ. කියන්න තියෙන්නෙ, කරන දේ කොලිටියට කරන්න. තරඟය තියෙන එක හොඳයි. ඕනෙම ක්ෂේත්‍රයක තරඟයක් තියෙනකොට තමයි ඒ ක්ෂේත්‍ර දියුණු වෙන්නෙ. හැබැයි, පලවෙනියා වෙන්න කියලා අදාල ක්ෂේත්‍රය විනාශ කරගෙන යනවානම් ඒ වගේ අයට වැඩි පැවැත්මක් නැහැ කියන එකයි මගේ නම් විශ්වාසය. මේ උපසිරැසි කලාව විනාස කරන්න එපා. අපේ වුනත් අඩුපාඩු තියෙන්න පුළුවන්. අපේ උපසිරැසි වල වුණත් වැරදි අඩුපාඩුවක් දකිනවානම්, නිවැරදි වියයුතු දෙයක් තියෙනවානම් [email protected] ලිපියනට පැහැදිලිව ඊමේල් පණිවිඩයක් එවන්න. ඒ පිලිබඳව හොයලා බලාලා, වැරද්දක්/අඩුපාඩුවක් තියෙනවා නම් අනිවාර්‍යයෙන්ම නිවැරදි කිරීමක් සිදුකරනවා. අපි කවුරුවත් 100% අංග සම්පූර්ණ මිනිස්සු නෙමෙයිනෙ. එහෙම නැතුව පොඩි දෙයක් අල්ලගෙන කීබෝඩ් වීරයො වෙන්න සමාජ ජාලා වල රැඟුවට නම් තමන්ට වෙන සෙතකුත් නැහැ, අනුන්ට වෙන සෙතකුත් නැහැ. අවුරුදු 12ක් පුරාවට මේ ගුණාත්මකබව රැකගෙන ආපු නිසයි බයිස්කෝප් කියන නාමය අදටත් ලංකාවෙ අංක එකේ විනෝදාත්මක වෙබ් අඩවිය විදියට ඔබතුමන්ලා කිරුළු පලන්දාගෙන ඉන්නෙ.

අවසාන වශයෙන්, අලුත් සීරීස් පටන්ගන්නෙ නැත්තෙ ඇයි කියලා අහලා තිබ්බා. සරලම සහ කෙටිතම පිලිතුර, සීරීස් රීනිව් වෙද්දි ඒවා ඇදගෙන යන්න අපහසු වීම. එහෙම වෙන්න ආසන්නම හේතුව, එපිසෝඩ් එකක් පොඩ්ඩ පරක්කු වෙනකොට අම්මා-තාත්තගෙන් පටන් අරගෙන හත්මුතු පරම්පරාවටම පිං දෙන දායක සභාවෙ කල් ක්‍රියාව තමයි. ඒ නිසා, මින් ඉදිරියට අලුතින් සීරීස් ලබාදෙන්නෙ විකාශය වෙලා අවසන් වූ ඒවා හෝ, මිනි සීරීස් පමණයි. ඒ තීරණයේ කිසි වෙනසක් වෙන්නෙ නැහැ. ඈවරයි! දෑවරයි! තුන් ඈවරයි!

ඔන්න එහෙනම් දැවෙන ප්‍රශ්න කීපයකට පිලිතුරු දුන්නා. චාන්ස් එක ලැබිච්ච වෙලාවෙ ඔක්කොම ටික කියලා දැම්මා. වෙබ් අඩවියේ වගකීමක් දරණ කෙනෙක් විදියට, වැරදි අදහසක් සමාජගත වෙමින් යනවා දැක්ක නිසයි ඒ වෙනුවෙන් පිලිතුරු දෙන්න හිතුවෙ. ඇත්ත ඇති සැටියෙන් තේරුම් ගැනීම බුද්ධිමත් ඔබ සැමට බාරයි. එහෙනම්, ඔබ අප කෙරෙහි තැබූ ඒ විශ්වාසය ඉදිරියට රකින බවට පොරොන්දු වෙමින්, ආරාධනා කරනවා ජෝර්ජ් කුට්ටියේ වික්‍රමාන්විත දෙවන චාරිකාව හා අත්වැල් බැඳගැනීමට එක්වන මෙන්!

ප. ලි : විශේෂයෙන්ම ස්තුතිවන්ත වෙන්න තරිඳු රුක්ෂාන් සහෝදරයට. බාගයක් කරමුද කියලා අහපුගමන්, නෑ-බෑ කියන්නෙ නැතුව උදව්වට ආවට. පෙබරවාරි 18 වෙනිදා රෑ 10 පහුවෙලා ටොරන්ට් පිටපත් නිකුත් වෙච්ච, ලයින් 2800+ දැවැන්ත දෙබස් ප්‍රමාණයක් අන්තර්ගත වෙච්ච චිත්‍රපටයකට, ඊට පහුවෙනිදා හවස 7 විතර වෙනකොට උපසිරැසි ලබාදෙන්න අපි දෙන්නා කාපු කට්ට දන්නෙ අපි දෙන්නම විතරයි 😛 (මේ උපසිරැසිය නිර්මාණය කරන්නෙ රාජකාරි වැඩත් කරන අතරතුර) . ඒ වගේම, විශේෂයෙන්ම මතක් කරනවා පලවෙනි චිත්‍රපටයට උපසිරැසි ලබාදුන්න චලිඳු දේශාන් සහෝදරයවත්.

 

Form is Temporary
Class is Permanent
BaiscopeLK Forever !!!

 

ලිපි සැකසුම : සිසිල ප්‍රසාද්

Due to copyright issues, we do not provide any torrent links.

ලබා දී ඇති උපසිරසිය වෙබ් / එච්.ඩී. පිටපත් සඳහා අදාළ වේ.

44,279 downloadsDownload DSHYM-2-2021-2.zip94 KB

 

මේ ලබා දී ඇති සිංහල උපසිරැසි පිළිබද “ සිසිල ප්‍රසාද් ” සොහොයුරාට සහ “ M.T.R. තරිදු රුක්ෂාන් පෙරේරා ” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔවුන්ගේ අවසරය මතම සිදුවිය යුතුය.

 

Subtitle Contributor Rank

ADMIN MEMBER
JOINING DATE – 2015-01-24
SUBMAKER RATING BY ADMINS

 

Subtitle Contributor Rank

GOLD MEMBER
JOINING DATE – 2015/10/16
SUB-MAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.