The Foreigner (2017) Sinhala Subtitles | මාරක බෝම්බ ප්‍රහාරයෙන් ඉස්මතු වූ, පිය සෙනෙහසේ වියරු පළිගැනීම! [සිංහල උපසිරැසි]

දෙමව්පියන්ට මේ ලෝකේ තියෙන වටිනාම සම්පත තමයි දරුවෝ කියන්නේ. කතාවක් තියෙනවා, උනහපුළු අම්මට උගේ පැටියා මැණිකක් කියලා. තමන්ගේ දරුවා කොච්චර කැත වුනත් අම්මා කෙනෙක්ට, තාත්තා කෙනෙක්ට පේන්නේ ලෝකේ ඉන්නේ ලස්සනම දරුවා තමන්ගේ දරුවා කියලයි. තමන්ගේ දරුවා මොන අන්දමේ ආබාධයකින් පෙළුනත්, අම්මා කෙනෙක්ට තාත්තා කෙනෙක්ට පේන්නේ, ලෝකේ ඉන්න හොඳම ළමයා තමන්ගේ ළමයා වගේ. තමන්ගේ දරුවා මිනීමරුවෙක් වුනත්, හොරෙක් වුනත්, මුළු ලෝකෙන්ම හංවඩු ගහපු අපරාධකාරයෙක් වුනත්, අම්මා කෙනෙක් තාත්තා කෙනෙක් තමන්ගේ දරුවට තමන්ගේ පණටත් වැඩිය ආදරෙයි. මේකට තමයි මාතෘ සෙනෙහස කියන්නේ. මේකට තමයි පීතෘ සෙනෙහස කියන්නේ. මේ සෙනෙහස නිසාම, කිසිම කෙනෙක් කිසිම දවසක කරන්න බැහැයි කියලා හිතපු දේවල් පවා කරලා තියෙනවා. තම දරුවන් වෙනුවෙන් ඕනෙම දෙයක් කරන්න තරම් දෙමව්පියන් පෙළඹිලා තියෙනවා. සමහරවිට නීතියට පිටින් යමින්, මුළු ලොවටම එරෙහි වෙන්න සිද්ධවුනත්!

කුඈන් කියන්නේ චීනයේ ඉඳලා එංගලන්තයට සංක්‍රමණය වෙච්ච මනුස්සයෙක්. යුධයෙන් බොහොම පීඩා විඳපු මේ මනුස්සයා, තමන්ගේ බිරිඳ සහ කුඩා දියණියන් දෙන්නත් එක්ක චීනෙන් පිටවෙලා එනකොට, බොහොම අවාසනාවන්ත විදියට තායි මුහුදු මංකොල්ලකාරයෝ මේ අහිංසක මනුස්සයගේ හයක් හතරක් නොතේරෙන දුවලා දෙන්නව අමානුෂික විදියට ඝාතනය කරලා දානවා. තාත්තා කෙනෙක් විදියට කුඈන්ට මේ වෙලාවේ කිසිම දෙයක් කරගන්න බැරිව අසරණ වෙලා හිටියෙ. අන්තිමේදී බොහොම දුක් කම්කටොලු වලට මුහුණ දීලා, කොහොමහරි එංගලන්තයට සංක්‍රමණය වෙන්න කුඈන් සහ ඔහුගේ බිරිඳ සමත් වුණා. නමුත්, කුඈන් කියන්නේ උපතින්ම අවාසනාව කැන්දගෙන ආපු මනුස්සයෙක්. මේ වගේ මිනිස්සු දිහා දෙවියන් වත් හැරිලා බලන්නේ නැත්තේ දෛවයේ සරදමකටද මන්දා. සමහරවිට දෙවියන් පවා සෙල්ලම් කරනවා ඇත්තේ, මේ වගේ අහිංසක, අසරණ ජීවිතත් එක්ක වෙන්න ඇති. දියණියන් දෙදෙනෙක්ගේ අහිමිවීමෙන් පමණක් නොසෑහුණු කුඈන්ගේ දෛවය, ඔහුගේ බිරිඳට තුන්වෙනි දරුවා බිහිවෙද්දි, බිරිඳගේ ජීවිතය වන්දියක් විදියට අරගෙන, කිරිකැටි දරුවත් එක්ක කුඈන්ව මේ ලෝකේ තනි කළා. පස් දෙනෙක් විදියට ඉන්න තිබිච්ච ලස්සන පවුලක්, අන්තිමට දෙන්නෙක් විතරක් ඉන්න තැනක් බවට පත්වුණා. මේ දියණිය තමයි කුඈන්ට මේ ලෝකේ තමන්ගේ කියල ඉතිරිවෙලා තිබිච්ච එකම වස්තුව. මේ මාහැඟි වස්තුවට කුඈන් තමන්ගේ ප්‍රාණය දෙවැනි කරලා ආදරය කළා.

මං කලිනුත් කිව්වා, දෙවියන් සෙල්ලම් කරන්නේ අහිංසක, අසරණ මිනිස්සුන්ගේ ජීවිතත් එක්කමයි. නොහිතපු වෙලාවක, මේ අසරණ මනුස්සයාගේ දෑස් පනාපිටම, මේ අහිංසක අසරණ මනුස්සයට මෙලොව ඉතිරිවෙලා තිබ්බ එකම වස්තුවත් දෙවියන් උදුරගත්තා. බැංකුවක අටවලා තිබ්බ බෝම්බයකින් කුඈන්ගේ තුන්වෙනි දියණියත් ඝාතනය වෙනවා. හිතාගන්න පුලුවන්ද මේ අසරණ මනුස්සයට මොනවා හිතෙනවා ඇත්ද කියලා? තමන්ට හිමිවෙලා තිබිච්ච හැමදෙයක්ම හේතුවක් නොමැතිව උදුරගෙන. දුවගේ මරණයට හේතු වෙච්ච සාහසිකයෝ හොයලා දෙන්න කියල නීතිය ඉදිරියේ බැගෑපත් වුණා. නමුත්, පිළිසරණක් නොලැබුණා. ජීවිතය අවසන් කරගන්නත් විටෙක හිතෙන්න ඇති. ඒත් අන්තිමේ ජීවත් වෙන්න හේතුවක් ලැබුණා. වැරදිකාරයො හොයලා දඬුවම් දෙන්න. මුළු ලෝකෙටම විරුද්ධ වෙන්න සිද්ධවුනත් තමන්ගේ දුවගේ මරණයට සාධාරණයක් ඉෂ්ඨ වෙන්න, වැරදිකාරයො ටික මේ ලෝකෙන් තුරන් කරලා, මෙවැනි දෙයක් ආපහු සිදුනොවෙන්න කටයුතු සිද්ධ කරන්න තීරණය කළා. ඔහු ජීවත් වුනේ එක අරමුණක් වෙනුවෙන්! ඔහුගේ හදවත මොරගෑවේ එකම එක අරමුණක් වෙනුවෙන්! පළිගැනීම! නමුත්, සාමාන්‍ය මිනිහෙක් මොනවා කියලා කරන්නද? එහෙනම් වැරදිලා, මේ කුඈන් කියන්නේ කිසිසේත්ම සාමාන්‍ය මනුස්සයෙක් නම් නෙමෙයි!

ජැකී චෑන් කියන්නේ දශක ගණනාවක් තිස්සේ බාල, මහලු, වැඩිහිටි කොයි කාගේත් හිත දිනාගත්ත විශිෂ්ඨ නළුවෙක්. කාලයක් තිබ්බා, ජැකී චෑන්ගේ ෆිල්ම් එකක් කිව්වොත් ඊට වඩා දෙයක් නැහැ. හැබැයි, කාලයත් එක්ක මේ අදහස වෙනස් වෙන්න ගත්තා. මොකද කියනවා නම්, පහුගිය අවුරුදු කීපයටම මේ විශිෂ්ට රංගධරයගෙන්, ඔහුගේ හැකියාවට ගැලපෙන අන්දමේ විශිෂ්ඨ සිනමා නිර්මාණයක් දකින්න ලැබුනේ නැහැ. ඔන්න ඉතිං එහෙනම්, සමස්ත ලෝකවාසී ජැකී චෑන් ප්‍රේක්ෂකයන් හටම සතුටු වෙන්න පුළුවන්, මොකද කියනවා නම් අවුරුදු ගාණකට පස්සේ ජැකී චෑන්ගේ නැවත සම්ප්‍රාප්තියක් විදියට අවිවාදයෙන්ම මේ චිත්‍රපටිය හඳුන්වන්න පුළුවන්. මේ චිත්‍රපටියත් එක්ක, ආයෙත් අපිට පරණ හුරු පුරුදු, විශිෂ්ඨ ජැකී චෑන් නැවතත් දකින්න පුළුවන් වේවි කියලා පොඩි බලාපොරොත්තුවක් ඇති වුණා.

මේ චිත්‍රපටය සඳහා පදනම් වෙලා තියෙන්නේ, 1992 වර්ෂයේදී Stephen Leather මහත්මය විසින් රචනා කරන ලද The Chinaman කියන නව කතාව. චිත්‍රපටය නිළ වශයෙන් නිකුත් වෙන්නේ 2017 වර්ෂයේ සැප්තැම්බර් මස 24 වෙනිදා. චිත්‍රපටය නිෂ්පාදනය සඳහා ඇමරිකානු ඩොලර් මිලියන 35ක ධනස්කන්ධයක් යොදාගෙන තියෙනවා. ඒ වගේම, ඇමරිකානු ඩොලර් මිලියන 135.4ක බොක්ස් ඔෆිස් ආදායම් වාර්තාවක් පිහිටුවනත් මෙම සිනමා සිත්තමට හැකියාව ලැබිලා තියෙනවා. චිත්‍රපටය අධ්‍යක්ෂණය කරන්නේ, Green Lantern (2011), The Legend of Zorro (2005), The Mask of Zorro (1998) වගේ සුප්‍රකට සිනමා කෘති රැසක් අධ්‍යක්ෂණය කරන ලද Martin Campbell විසින්. ඒ වගේම, මේ වෙද්දී දොළොස්දහස ඉක්මවූ මනාප සංඛාවකින් IMDB දර්ශකය 7.2ක් වැනි ඉහළම අගයකට කරකවන්න මෙම සිනමා නිර්මාණයට හැකියාව ලැබිලා තියෙනවා. ඒ වගේම, ලේසියෙන් හොඳ අගයක් ලැබෙන්නේ නැති කුණු තක්කාලි දර්ශකයේ 60% ක මනාප ප්‍රතිශතයක් ලබාගන්නත් හැකියාව ලැබිලා තියෙනවා. ඒ වගේම, මේ චිත්‍රපටිය වෙන වෙනම ඉංග්‍රීසි සහ චීන යන භාෂා ද්විත්වයෙන්ම නිර්මාණය කරලා තියෙනවා.

එහෙනම්, ජැකී චෑන් රසිකයෙක් නම් නොවරදවාම අරගෙන බලන්න. පහුගිය කාලයට සාපේක්ෂව අනිවාර්‍යයෙන්ම වෙනසක් දැනේවි. ඉදිරිය ගැන ලොකු බලාපොරොත්තුවක් ඇතිවේවි, ඉස්සර වගේම හොඳ චිත්‍රපටි ටිකක් බලාගන්න ලැබේවි කියලා. දෙසැම්බර් 22 ජැකී චෑන්ගේ වෙනස්ම ආරක ක්‍රියාදාම සහිත විද්‍යා ප්‍රබන්ධ චිත්‍රපටියක් එළිදක්වෙන්න නියමිතයි. අපි බලමු, මොකකින් මොකක් වේවිද කියලා.

එහෙනම් ගිහිල්ලා එන්නම්. හැමෝටම ජය!

ප. ලි – චිත්‍රපටයේ HD පිටපතකට තමයි උපසිරැසි දීලා තියෙන්නේ. ඉතාමත් ඉහළ ප්‍රමිතියක් තියෙන පිටපතක් කියලා බය නැතුව කියන්න පුළුවන්. WEB පිටපතක ගුණාත්මක භාවයට ඉතාමත් ආසන්නයි. ඒ නිසා බැලුවා කියලා පාඩුවක් වෙන්නේ නැහැ. ගුණාත්මක භාවය කොහොමද කියලා මෙතනින් බලාගන්න පුළුවන්. කොහොමත් හොඳ පිටපතක් ආපු සැනින් වෙනදා වගේම අප්ඩේට් එක දෙනවා.

 

 

 

 

Due to copyright issues, we do not provide any torrent links.

ලබා දී ඇති උපසිරසිය BR පිටපත සඳහා අදාළ වේ.

26,165 downloadsDownload The-Foreigner-2017-BR.zip99 KB

https://d36zzuvfojr38z.cloudfront.net/wp_content/uploads/2016/05/SisilaPrasad.jpg මේ ලබා දී ඇති සිංහල උපසිරැසි පිළිබද “සිසිල ප්‍රසාද්” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

 

Subtitle Contributor Rank

ADMIN MEMBER
JOINING DATE – 2015-01-24
SUBMAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.