The Wages of Fear (1953) Sinhala Subtitles | මරණය සමඟ ගමනක්... [සිංහල උපසිරසි]

ආයුබෝවන් යාලුවො හැමෝටම! අද මම අරගෙන ආවේ ලෝක සිනමාවේ ත්‍රාසජනක චිත්‍රපට අතර අමරණීය සලකුණක් වුණු, හුස්ම හිරකරගෙන බලන්න පුළුවන් පට්ටම ෆිල්ම් එකකට සිංහල උපසිරැසියක්.

කතාවේ නම තමයි The Wages of Fear (1953) (ප්‍රංශ බසින්: Le Salaire de la Peur). Henri-Georges Clouzot කියන විශිෂ්ට අධ්‍යක්ෂවරයාගේ නිර්මාණයක් වෙන මේක, Thriller / Adventure ගණයට අයත් වෙනවා. අදටත් මේ චිත්‍රපටය IMDb දර්ශකයේ 8.2/10 ක ඉහළ අගයක් ලබාගනිමින් ලෝකයේ හොඳම චිත්‍රපට 250 (Top 250) අතරේ රැඳිලා ඉන්නවා.

කතාව ගැන කිව්වොත්, කතාව සිද්ධ වෙන්නේ දකුණු ඇමරිකාවේ තියෙන දුෂ්කර, දූවිලි පිරුණු ගම්මානයක. මේ ගමේ අතරමං වෙලා ඉන්න විදේශිකයෝ පිරිසකට කොහොමහරි සල්ලි ටිකක් හොයාගෙන මේ අපායෙන් පැනගන්නයි ඕන වෙලා තියෙන්නේ. ඔය අතරේ අමෙරිකානු තෙල් සමාගමකට අයිති තෙල් ළිඳක මහා ගින්නක් හටගන්නවා. මේ ගින්න නිවන්න නම් නයිට්‍රොග්ලිසරින් (Nitroglycerin) කියන අතිශය පුපුරන සුලු රසායනික ද්‍රව්‍යය විශාල ප්‍රමාණයක් එතනට අරගෙන යන්න ඕන.

ප්‍රශ්නේ තියෙන්නේ මේ නයිට්‍රොග්ලිසරින් කියන්නේ පොඩි ගැස්සීමකින් වුණත් මහා විනාශයක් කරන්න පුළුවන් තරම් සංවේදී දෙයක්. ඒ වගේම මේවා ගෙනියන්න විශේෂ වාහන මුකුත් සමාගමට නැහැ. තියෙන්නේ සාමාන්‍ය ලොරි දෙකක් විතරයි. තෙල් සමාගම ලොකු මුදලක් ගෙවන්න පොරොන්දු වෙනවා මේ මරණයේ ගමන යන්න කැමති හතරදෙනෙකුට.

සල්ලි වෙනුවෙන් තමන්ගේ ජීවිතේ පරදුවට තියලා මේ අතිශය භයානක ගමන යන්න එකතු වෙන අසරණ මිනිස්සු හතරදෙනෙක්ගේ කතාවක් තමයි මේකෙන් දිගහැරෙන්නේ. ගල් පිරුණු, වළවල් තියෙන කඳුකර පාරවල් වල පොඩ්ඩක් හරි ගැස්සුණොත් වාහනේ විතරක් නෙවෙයි, එයාලත් කුඩුපට්ටම් වෙලා යනවා. මුල ඉඳන් අගටම දහඩිය දාන තරමට කුතුහලය උපරිමයෙන්ම තියෙන වෙනස්ම අත්දැකීමක් මේකෙන් ඔයාලට ගන්න පුළුවන්.

එහෙනම් මේ සුපිරිම චිත්‍රපටය අරගෙනම බලන්න. උපසිරැසිය ගැන ඔයාලගේ අදහස් යටින් කමෙන්ට් කරන්නත් අමතක කරන්න එපා. ජය වේවා!