Carrie [S01 : E08] Sinhala Subtitles | අවසන් නැටුම… [සිංහල උපසිරැසි සමඟ]

හැමෝටම ආයුබෝවන්! ඔන්න එහෙනම් Carrie කතාමාලාවේ අටවැනි සහ අවසාන කොටසේ සිංහල උපසිරැසිත් අරගෙන ආවා. මුල් කොටසේ ඉඳන් කැරීගේ කතාවත් එක්ක එකතු වුණු ඔයාලට, දැන් ඇගේ ජීවිතයේ තීරණාත්මකම මොහොත දැකගන්න ලැබෙනවා. අද කොටසේ සිදුවීම් ගැන වැඩිය කියන්න බැරි නිසා, කුතුහලය ඒ විදිහටම තියාගෙන පොඩ්ඩක් කතාව ගැන කතා කරමු.

හොද මනුස්සයෙක් නරක කෙනෙක් බවට පත් කරන්න සමාජයකට පුළුවන් කියල කිව්වොත් මම වැරදි නැහැ,කැරි කියන්නෙත් එහෙම තත්වෙට වැටුණු කෙනෙක් කියල ඔයාලට මේ කොටස බැලුවම තේරෙයි

කැරීව මුලින්ම දැක්ක දවස මතක ඇතිනේ. අනිත් ළමයින්ට සාමාන්‍ය දෙයක් වුණු පාසල් ජීවිතය පවා ඇයට අලුත් අත්දැකීමක් වුණා. කාත් එක්ක හරි හිතවත් වෙන්න, තමන්ටත් යාළුවෝ ඉන්නවා කියලා දැනෙන්න, බයක් නැතුව දවසක් ගත කරන්න තමයි ඇයට ඕන වුණේ. ඒත් ඒ පුංචි බලාපොරොත්තු අතරට ආවේ සමච්චල්, අවිශ්වාසය සහ තමන්ට තනිවම දරාගන්න අමාරු දේවල්. ඒ හැමදේම අතරේ ඇය ටික ටික වෙනස් වුණු හැටි අපි පසුගිය කොටස්වලින් දැක්කා.

හත්වැනි කොටසෙන් පස්සේ මේ කොටස බලන්න එනකොට, ප්‍රොම් රාත්‍රිය ගැන ඔයාලගේ හිතේ ප්‍රශ්න ගොඩක් ඇති. අද කතාව ඉදිරියට යන්නේ ඒ රාත්‍රිය වටායි. සිදුවීම්වලට මුහුණ දුන් අයගේ මතකයන් සහ ඔවුන්ගෙන් අහන ප්‍රශ්න හරහා, එකම සිදුවීම එක එක්කෙනාට දැනෙන්නේ කොයිතරම් වෙනස් විදිහටද කියලා අපිට පේනවා. ඒ නිසා මෙතැනදී සිද්ධ වෙන්නේ මොකක්ද කියන එක වගේම, ඒ දේවල් තේරුම්ගන්නේ කොහොමද කියන එකත් වැදගත් වෙනවා.

විශේෂයෙන්ම සූගේ පැත්තෙන් කැරී ගැන කියවෙන දේවල් මේ කොටසට වෙනම හැඟීමක් එකතු කරනවා. කෙනෙක් ගැන අනිත් අය කියන කතා අහලා තීරණයකට එන එක කොච්චර ලේසිද? ඒත් ඒ කෙනා ඇත්තටම කවුද කියලා දැනගන්න අපි කොච්චර උත්සාහ කරනවද? මුල් කොටස්වල අපි දැකපු සමහර පුංචි මොහොතවල් ගැනත් ආයෙත් හිතන්න මේ කොටස ඉඩ දෙනවා.

කැරී සහ ඇගේ අම්මා අතර තියෙන සම්බන්ධයත් මෙහි වැදගත් තැනක් ගන්නවා. ආදරය, බය, තමන් හරි කියන විශ්වාසය සහ අනෙක් කෙනාව පාලනය කරන්න තියෙන අවශ්‍යතාව එකට පැටලුණාම ඒ බැඳීම කොයිතරම් අසීරු වෙනවද කියලා ඔවුන් දෙන්නා හරහා දැනෙනවා. කැරීට තමන්ගේ බලයන් තේරුම්ගන්න තියෙන අමාරුවට අමතරව, තමන්ට ළඟින් ඉන්න අයව තේරුම්ගන්නත් සිද්ධ වෙලා.

මේ අවසාන කොටසේ භීතියත් එක්කම දුක, කෝපය, වරදකාරී හැඟීම සහ පිළිගැනීමක් ලැබෙන්න තියෙන ආශාවත් කතාවේ ලොකු තැනක් ගන්නවා. කැරීගේ අසාමාන්‍ය හැකියාවන් දිහා බලන අතරේ, ඒ හැමදේම දරාගෙන ඉන්නේ තවමත් තරුණ ගැහැනු ළමයෙක් කියන දේත් අමතක කරන්න බැහැ. ඇයට ඇහුම්කන් දෙන්න කෙනෙක් හිටියා නම්, ඇයව තේරුම්ගන්න තව ටිකක් උත්සාහ කළා නම් කියලා හිතෙන තැන් මේ කතාව පුරාම තිබුණා.

ඉතින් කැරීගේ ගමන මෙතැනින් කොයි පැත්තකට හැරෙයිද? ඇය විශ්වාස කරපු අය ගැනත්, තමන් ගැනත් ඇයට ලැබෙන පිළිතුරු මොනවා වෙයිද? ඒ දේවල් ඔයාලටම බලලා දැනගන්න ඉඩ තියන්නම්.

සීසන් 2 එකක් එයි කියල පොඩි බලාපොරොත්තුවක් තියා ගන්න ගමන් මම සමු ගන්නවා,

පළවෙනි කොටසේ ඉඳන් අවසානය දක්වා උපසිරැසි එක්ක එකතු වුණු හැමෝටම බොහොම ස්තූතියි! කතාමාලාව ගැනත්,උපසිරසියේ ගුණ අගුනත් කොමෙන්ට් එකක් දාන් යමු

ජය වේවා!!