Supernatural [S05 : E22] | යුගයක නිමාව… [සිංහල උපසිරැසි සමඟ]

අවසානය! ඉතින් පුරුදු විදිහට කතාව ගැන කියන්නේ නෑ. සීසන් පහක් තිස්සේ ගොඩ නැගුන කතාවේ කූටප්‍රාප්තිය අද බලාගන්න පුළුවන්. විකාශනය වී ඇති එපිසෝඩ් 195න් හොදම එපිසෝඩ් එක මේක කියලයි බොහෝ විචාරකයන් හා රසිකයන් පවසන්නේ.

ඉතින් මෙන්න ගැග් රීල් එක.

එරික් ක්‍රිප්කී (Eric Kripke)
මේ එපිසෝඩ් එකත් සමග, සීසන් පහක් පුරා වැඩසටහන මෙහෙයවපු, විධායක නිෂ්පාදක, වැඩසටහනේ නිර්මාතෘ එරික් ක්‍රිප්කී වැඩසටහන මෙහෙයවීමෙන් ඉවත් වුනා. වැඩසටහනේ නිර්මාතෘ වීමට අමතරව එපිසෝඩ් 18ක් සදහා (මගේ ගණන් කිරිල්ල හරිනං) ඔහු සිය සෘජු දායාත්වය ලබා දී තිබෙනවා.

1.01 Pilot – කතාව/ තිර රචනය
1.02 Wendigo – තිර රචනය
1.05 Bloody Mary – කතාව
1.09 Home – කතාව/ තිර රචනය
1.16 Shadow – කතාව/ තිර රචනය
1.22 Devil’s Trap – කතාව/ තිර රචනය
2.01 In My Time of Dying – කතාව/ තිර රචනය
2.20 What Is and What Should Never Be – අධ්‍යක්ෂණය
2.22 All Hell Breaks Loose: Part Two – කතාව/ තිර රචනය
3.01 The Magnificent Seven – කතාව/ තිර රචනය
3.16 No Rest for the Wicked – කතාව/ තිර රචනය
4.01 Lazarus Rising – කතාව/ තිර රචනය
4.10 Heaven and Hell – තිර රචනය
4.22 Lucifer Rising – කතාව/ තිර රචනය සහ අධ්‍යක්ෂණය
5.01 Sympathy for the Devil – කතාව/ තිර රචනය
5.09 The Real Ghostbusters – – තිර රචනය
5.22 Swan Song – තිර රචනය
සහ ඉදිරියට එන
6.22 The Man Who Knew Too Much‎ – කතාව/ තිර රචනය

ඒ අනුව හයවෙනි සීසන් එකේ සිට වැඩසටහන මෙහෙයවීම පැවරුනේ එපිසෝඩ් ගණනාවකට කතාවෙන් සහ තිර රචනයෙන් ආරම්භක කාලයේ සිටම සම්භන්ධ වී සිටි සේරා ගැම්බල්ටයි (Sera Gamble).

– – –
අද කතාවේ නම “Swan Song” යමක අවසානය, අවසන් රංගනය/ප්‍රසංගය හැදින්වීම සදහා මැතකදී භාවිතයට ආ යෙදුමක්
අධ්‍යක්ෂණය කලේ : ස්ටීව් බෝයම් (Steve Boyum)
කථාව : එරික් ගවර්ට්ස් (Eric Gerwirtz)
රුපවාහිනී තිර රචනය : එරික් ක්‍රිප්කී (Eric Kripke)
විකාශනය වුනේ : 2010 මැයි 13 වෙනිදා

මේ එපිසෝඩ් එක ඉවරවෙනකම් ෂෝ එක බලලා නැත්නං, බලන්න අදහසක් තියෙනවනං මෙතනින් පහලට කියවන්න බැලුවට පස්සේ! (spoiler alert)

යුගයක නිමාව
ක්‍රිප්කිගේ සමුගැනීමත් අද කතාව අවසන් වෙන අයුරත් නිසා වෘතාන්තයේ එක යුගයක් නිම වුනා කියලා කියන්න පුළුවන්. ඇත්තටම බොහෝ දෙනා කතාවේ මුල් සීසන් පහ “ක්‍රිප්කී යුගය” කියලා හදුන්වනවා මම දැකලා තියෙනවා. ඒ වගේම පෞද්ගලිකව මම මේ වැඩසටහනේ කැමතිම යුගයත් මෙයින් අවසන් වෙනවා. 🙁 ඉතින්, ආපු ගමන් මග දිහා හැරිලා බලන්න වටිනවනේ, නේද? ලිපිය දීර්ඝ නොකර බොහොම කෙටියෙන් මම හිතන දේවල් කීපයක් කියලම යන්නම්. ඕගොල්ලෝ මෙතෙක් වැඩසටහන ගැන හිතන්නේ මොකද්ද කියලත් කියලා යන්න අමතක කරන්න එපා.

සාමන්‍යයෙන් ත්‍රාසය සහ හාස්‍ය එක් කරලා සාර්ථක වැඩසටහනක් හදන එක අභියෝගයක්. නමුත් තරමක් නාට්‍යමය ස්වභාවයකුත් සමග මේ අන්ත දෙක සාර්ථකව එක් කරන්න සුප(ර්)නැචුරල් රචකයන් සමත් වුනා කිව්වොත් නිවැරදියි. එයටම ගැලපෙන සාර්ථක රංගනයක් එකතු කරන්න මෙහි නළු නිලියන් සියල්ලන්ම වගේ සමත් වුනා. ඇත්තටම මේ කතාව පටන් අරන්නකොට කිසිම සැලැස්මක් නොතිබුන බව ඔයගොල්ලන්ටත් පෙනෙන්න ඇති. මුළු සීසන් පහ පුරාම මේ සැලැස්මක් නැති කමේ සලකුණු දකින්න ලැබුනත් උද්වේගකර කතාවත් සාර්ථක චරිතත් තුල එය සගවාලන්න මේ වැඩසටහනත් එක්ක එකතුවෙලා ඉන්න නළු නිලියන්, රචකයන්, අධ්‍යක්ෂකවරුන් ඇතුළු නිෂ්පාදක කණ්ඩායමට හැකි වුනා.

ඇත්තටම පයිලට් එක බලද්දී හීනෙකින්වත් නොහිතපු තැනකට අද වනවිට කතාව ඇවිත් තියෙනවා. පලවෙනි සීසන් එකේ මැද හරියේදී සිය මන්දගාමී ඇල් මරුන ගමන වෙනස් කර වේගවත් උද්වේගකර ගමනක් පටන් ගත්ත වැඩසටහන ක්‍රමක්‍රමයෙන් සිය වේගය තීව්‍ර කරලා මේ වනවිට උච්චතම අවස්ථාවට ඇවිත් තියෙනවා. දිනෙන් දින වෙනස් කතාවක් ගෙනාවත් ඊලග කතාව නොබලා ඉන්න බැරි කරලා නවත්වන්න මේ රචකයන් දක්වලා තිබුන දක්ෂකම විශිෂ්ඨයි. එපිසෝඩ් 104ක් බලලා ඉවරයි කියලා ඇත්තටම නොදැනෙන තරම් උද්වේගකර කුතුහලයෙන් පිරුන පසුබිම්/තේමා කතාවකුත් ඉදිරිපත් කරන්න මේ රචකයන් සමත්වෙලා තිබුනා. පලවෙනි, දෙවැනි සීසන් වගේම තුන්වෙනි සීසන් ඒකත් අවසන් වුන විධිහට එතනින් එහාට මේ කතාව සාර්ථකව ගොඩ නගන්න බැහැ කියලයි මුලින්ම බලද්දී මමනං හිතුවේ. ඒත් ඒ හැම අවස්ථාවකම රසිකයන්ගේ බලාපොරොත්තු ඉක්මවන නැවුම් තලයකට කතාව තල්ලු කරන්න රචකයන් සමත් වුනා. විශේෂයෙන්ම හතරවෙනි සීසන් එකේ දේව දුත සංකල්පය කතාවට එකතු කරද්දී මම අවංකවම හිතුවේ දැන් ඉතින් මේ කතාවත් ඉවරයි තමයි කියලයි. ඒත් ඒ අදහස කෙටි කලකින්ම නිෂ්ප්‍රභාකරමින් ඇත්තටම විශිෂ්ඨතම සීසන් දෙක හතර සහ පහ බවට පත් කරන්න ඔවුන් සමත්වුනා. 😎

කතාවේ චරිත ගොඩනැගීම ගැන කියනවනං, මේක මම පෞද්ගලිකව රුපවාහිනි වෘතාන්තයක දැකපු සාර්ථකම චරිත ගොඩ නැගීම කිව්වොත් නිවැරදියි. (කිසියම් ලේඛකයෙක් ඒ වනවීටත් ගොඩනගා තිබූ චරිත හෝ පොතක් පදනම් කරගෙන කරපු නැති වැඩසටහන් අතරෙන්) මේ වර්ගයේ වැඩසටහන්වලදී, කතාවට සහ ක්‍රියාදාමවලට වැඩි බරක් දෙන ඇමරිකානු රුපවාහිනී වෘතාන්තවල, මේ මට්ටමේ තාත්වික චරිත ගොඩනැගීමක් දකින්න ලැබෙන්නේ හරි කලාතුරකින්. මම හිතන්නේ, මේ කතාවත් එක්ක රසිකයන් මේ තරම් බැදෙන්න ප්‍රධාන හේතුව මේ තියෙන තාත්වික චරිත නිසායි. පලවෙනි එපිසෝඩ් එකේ සිටම පැහැදිලි අනන්‍යතාවක් කතාවේ සෑම චරිතයකටම ලබා දෙන්නත් එය ඒකාකාරිව පවත්වාගෙන යන්නත් කතා රචකයන් සැලකිලිමත් වෙලා තිබුනා. කතාවේ සිදුවීම් සමග චරිත වැඩි වර්ධනය වුනත් ඒ සෑම වෙනස්කමක්ම චරිතවල අනන්‍යතාවයන්ට ගැලපෙන ලෙස සියුම්ව සිදු කරන්නත් ආරම්භයේ හදුන්වා දුන් සැකිල්ල තුල රැදෙන්නත් කතා රචකයන් සමත්වෙලා තබුණා. ඒ වගේම මේ විධිහේ ඇමරිකානු වැඩසටහන් බොහොමයක දකින්න ලැබෙන්නේ එක්කෝ යොවුන් වියේ පාසල් ළමයි නැත්නම් එෆ් බී අයි හෝ පොලිසිය වගේ කිසියම් ආයතනයක වැඩකරන නිලධාරීන් පදනම් කරගෙන තැනුන චරිතයි (X-Files, Fringe, Grimm, Roswell, Buffy කවුරුත් බලලා තියෙන ඒවගේ ඒවායින් කීපයක්) එහෙම නැත්නං ප්‍රධාන චරිතවලට සුපිරි බලයවල් තියනවා. ඒත් නීතියට පිටින් වැඩ කරන්න, මත් පැන් බොන්න,කට කැඩිච්ච කතා කියන්න වගේම තවත් දේවල් කරන්න 😕 අවසර තියෙන, සාමාන්‍ය මිනිස්සුන්ට තියෙන අවශ්‍යතා, හිත් රිදීම් ඇති වෙන, “වැදගත් පැලැන්තිය”ට අයිති නැති, ස්වභාවික තරුණ චරිත දෙකක් ප්‍රධාන චරිත කිරීම මම දකින්නේ සාර්ථක පියවරක් හැටියටයි. එය මේ චරිත සාර්ථකව ගොඩ නගන්න රුකුලක් වෙන්න ඇති.

උපසිරැසි කරපු මට පුදුම විදිහට වදයක් වුන භාෂා ශෛලිය සහ ජනප්‍රිය සංස්කෘතියේ යෙදුම් ගැනත් නොකියා යන්න බැහැනේ. සාමාන්‍යයෙන් රෑපවාහිනී වැඩසටහන දකින්න නොලැබෙන ග්‍රාම්‍ය භාෂා ශෛලියක් තමයි මේ වැඩසටහනේ භාවිතා වෙන්නේ. ඒ වුනත් කතාව ගෙතෙන පරිසරයට එකේ භාෂා ශෛලිය ඉතාම හොදින් ගැලපුනා. ඒ වගේම තේරුම හොයන්න මට අන්තර්ජාලය පීරන්න සිද්ධ වුනත් ජනප්‍රිය සංකෘතියෙ යෙදුම් (Pop culture references) දෙබස්වලට තාත්වික බවත් වගේම රසවත්, ප්‍රාණවත් බවක් එකතු කළා. ඇත්තටම ඒවා දෙබස් වල විතරක් නෙමේ, සැලකිල්ලෙන් බැලුවොත් රුප රාමු තුලත් නිතරම දකින්න ලැබෙනවා. ඒ ගොඩක් දේවල් ගැන මම දැනගත්තෙත් මේ උපසිරැසි හැදිල්ලේදී කරපු සෙවුම්වලදියි. සියුම් කරුණු ගැන වැඩසටහනේ නිෂ්පාදකයක් දක්වලා තියෙන සැලකිල්ල පුදුම සහගතයි. ජනප්‍රිය සංකෘතියේ යෙදුම්නුත් මේ තරමට භාවිතා කරපු වැඩසටහනක් අවංකවම මම මීට කලින් බලලා නැහැ. කොහොම වුනත්, ඒක මම මේ වැඩසටහනේ කැමතිම අංගයක් කිව්වොත් නිවැරදියි. ඒ වගේම කතාවේ රිද්මයට හොදින් ගැලපෙන මුළු සීසන් පහ පුරාම නිතර ඇහෙන classic rock සහ heavy metal සංගීතයත් කතාවට එක්කළේ පුදුම අලංකාරයක් කිව්වොත් මම හිතන්නේ ඕගොල්ලොත් එකග වෙයි. ඒකත් මම දන්න තරමින් මේ වැඩසටහනට ආවේනික ලකුනක්.

ඇත්තටම මේ වැඩසටහන සාපේක්ෂව ඉතාම අඩු වියදමකින් හදපු වැඩසටහනක්. එකම පසුතල අවස්ථා ගනනාවකදී යොදා ගන්න අයුරුත් සරල අඩු වියදම් දෘශ්‍ය ප්‍රයෝග යොදා ගෙන තියෙන අයුරත් මම හිතන්නේ ඕගොල්ලොත් දකින්න ඇති. ඒත් සාර්ථක රංගනයකින් ඉදිරිපත් කරන සාර්ථක චරිතත්, උද්වේගකර කතාවකුත් ඉදිරියේ එකම අධිවේගී මාර්ගය, එකම ගොඩනැගිල්ල හෝ එකම නගරය යලි යලිත් වෙනත් නම්වලින් භාවිතා වෙන එක ඒ තරම් වැදගත් දේවල් හැටියට ප්‍රක්ෂකයාට දැනෙන්නේ නැහැ. මේ වැඩසටහන එක්ක රසිකයන් මොන තරමට බැදුනද කිව්වොත්, වැඩසටහනේ රසිකයවම වැඩසටහන තුලම දරුණු විදිහට උපහාසයට ලක් කරත්දීත්, ඒ එපිසෝඩ් පවා රසිකයන් ආදරයෙන් වැලද ගත්තා. වැඩසටහනක් සාර්ථක වෙන්න වඩා වැදගත් වන්නේ සාර්ථක කතා රචකයන්, දක්ෂ නළු නිලියන් සහ නිෂ්පාදන කණ්ඩායමකුත් මිස කොච්චර සල්ලි විසි කලාද කියන එක නොවන බවට මේ වැඩසටහන ඇත්තටම හොද උදාහරණයක්.

කතාවේ අවසානය ගැන කියනවනං, යක්ෂයාටත්, දෙවියන්වහන්සේටත්, දෛවයටත් එරෙහි වෙලා නිදහස් චින්තනයත්, පවුලත් තෝරාගන්න කතාව, අවසන් වෙන ආකාරය හරිම සාර්ථකයි. ඒත් අන්තිම හරියේ වේගේ ටිකක් වැඩි වුනා කියලයි මටනං හිතෙන්නේ. අසරුවන්ටත්, ලුසිෆර්ටත් තව සීසන් එකක් දුන්නනං වැඩිය සාධාරණයි. කොහොම වුනත් මම පෞද්ගලිකව හිතන්නේ කතාව මෙතනින් නතර වුනානං හොදයි කියලයි! (හෝව්, හෝව්, ගල් ගහන්න එපා 😛 ) මම එහෙම කියන්නේ මේ කතාව තව ඉස්සරහට ගෙනියන්න බැරි නිසා නෙවෙයි. ක්‍රිප්කි සැලසුම් කරලා තිබුන ආකාරයෙන් කොල්ලෝ දෙන්නව මරලා ලෝකේ බේරගෙන කතාව අවසන් කලානං ඒකෙන් කතාවට වැඩි සාධාරණයක් ඉෂ්ඨ වෙනවා. මොකද මෙච්චර සාර්ථක අවසානයකට ආයේ අවස්තාවක් ලැබෙයි කියලා හිතන්න අමාරු නිසා. ඒ නිසා මමනං හිතන්නේ මේ කතාව මෙතනින් නතර වුනානං වැඩිය හොදයි කියලයි. 😉

ඉතින් ඕගොල්ලෝ මොකද හිතන්නේ. මෙතනින් නතර කරමුද? නැත්නං ඊලග සීසන් එකත් ඕනෙද? කොහොම වුනත් හයවෙනි සීසන් එක ඕනෙමනං, පොඩ්ඩ දවසක් ප්‍රමාද වෙන්න ඉඩ තියෙන බවනං කියල යන්න ඕනේ 🙁 (එහෙම නොකරන මම උතසහ කලත්) ඉතින්, කතාව ගැන ඕගොල්ලෝ හිතන දේත් කියල, ඊලග එක ඕනෙමද කියලත් කියලම යන්න.

ඊලග සීසන් එකේ ප්‍රවර්ධන වීඩියෝව
Promo
6.01 Sneak Peek

ප. ලි
සමාවෙන්න “කෙටි” කිව්වට හොදටම “දිග” වුනා. දැන් මකන්න කම්මැලියි. ඒ නිසා ඔන්න ඔහේ එහෙම්ම තියනවා. 😀

ත. ප. ලි
පහුවුන 100 කඩයිම් දෙකේදී (උපසිරැසි 100 සහ සුප(ර්)නැචුරල් 100) සුභ පතපු හැමෝටම බොහොම ස්තුතියි!

හැමෝටම ජය!

 

 

ටොරන්ට් එක තුල සියලුම කොටස් ඇතුලත් වෙනවා. එයින් අවැසි කොටස පමණක් ඔබට බාගත කරගන්න පුළුවන්. එයට උපදෙස් සිංහලෙන්ම මෙතන තියනවා.

145 MB (2.9 GB) කොපිය මෙතනින් බාගන්න e9642eca259bd7ced8a7442c51eb3c0b007b70d0 350 MB (7.7 GB) කොපිය මෙතනින් බාගන්න 57575672f1cf1425f18aea1cf7392dad4367492a ටොරන්ට් ලින්ක් ක්‍රියා නොකරයිනම් ඒ ලින්ක් එකට යටින් ඇති හෑෂ් (hash) එක google හි සෙවුමක් කරන්න. එවිට ලැබෙන ඕනෑම ටොරන්ට් අඩවියකින් එම ටොරන්ට් එක බාගත කරගන්න.

4,189 downloadsDownload Supernatural.S05E22.zip87 KB

https://d36zzuvfojr38z.cloudfront.net/wp_content/uploads/2012/10/Normal-.jpg මේ ලබා දී ඇති සිංහල උපසිරැසි පිළිබද “MDG” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

<< Previous Episode                       All Episodes                         6th Season >>