Silo [S03 : E02] Sinhala Subtitles | විටමින් D+ පෙත්ත [සිංහල උපසිරසි]

3 වෙනි සීසන් එකේ පළවෙනි එපිසෝඩ් එක පටන් ගන්නේ කලින් සීසන් එකේ අන්තිමට වුණු කලබල අස්සේ මාස තුනකට විතර පස්සේ. ජුලියට් දැන් නගරාධිපතිනිය විදිහට තමන්ගේ වැඩ කටයුතු කරගෙන යන්නයි හදන්නේ. සීසන් 2 වුණු කැරැල්ලෙන් පස්සේ, කෙල්ල ආපහු ආපු නිසා සයිලෝ එක දැන් ටිකක් සන්සුන් වෙලා වගේ පේන්නේ.

ජුලියට් හැමදේම පාලනය කරගෙන ඉන්න උපරිම උත්සාහ කරනවා. කෙල්ල මුලින්ම යන්නේ ලොකු සභා රැස්වීමකට. එතනදී හැමෝම කෙල්ලට සලකන්නේ සුපිරි තරුවකට වගේ. මොකද සයිලෝ එකෙන් එළියට ගිහින් ආපහු පණපිටින් ආපු පළවෙනි කෙනා මෙයා විතරමනේ. හැබැයි ජුලියට්ට තාමත් බර්නාඩ් එක්ක වුණු අන්තිම මොහොත මතක් වෙලා හිතට හරි නෑ. ඒ වගේම ඇත්තටම එතන මොකද වුණේ කියලා කෙල්ලට හරියට මතකත් නෑ.

කැමිල් ජුලියට් දිහා සෙවිල්ලෙන් ඉන්න අතරේ, සිම්ස් මොනිටර් එකෙන් බලාගෙන ඉඳලා අන්තිමේදී මැදට පනිනවා. මිනිහා කියනවා ජුලියට් ඇඳන් හිටපු ඇඳුම ගින්නෙන් ආරක්ෂා වෙන විදිහට හදලා තිබුණු නිසා ඔයා බේරුණා කියලා. ඒත් බර්නාඩ්ට නම් ඒ වාසනාව තිබුණේ නෑ කියනවා.

බර්නාඩ්ගේ සිරුර පුච්චන තැනට ගෙනියන්න දොරටුපාලකයෝ හය දෙනෙකුට පැය හයක් විතර ගිහින් තියෙනවා. සිම්ස් ජුලියට්ට කියනවා තමන් බර්නාඩ් පිච්චෙනවා බලාගෙන හිටියා කියලා. මේ වුණු දරුණු සිද්ධි නිසා ජුලියට් දැන් ඉන්නේ අතීතය අමතක වීමේ රෝගයකින් පෙළෙමින්. කෙල්ලට තමන්ගේ වටේ ඉන්න කවුරුවත් අඳුරගන්න බෑ. කන්නාඩියෙන් තමන්ගේ මූණ දිහා බැලුවත් තමන් කවුද කියලා හිතාගන්න බැරි තරමට කෙල්ලට හැමදේම අමතක වෙලා.

ඇත්තම සීන් එක මේකයි, ගින්නෙන් පස්සෙත් බර්නාඩ් පණ පිටින් ඉඳලා තියෙනවා! මිනිහගේ බෙල්ල මිරිකලා මැරුවේ සිම්ස්. දැන් සිම්සුයි කැමිලුයි එකතු වෙලා බලය තමන්ගේ අතට අරන්. කැමිල් IT අංශයේ ප්‍රධානියා වගේ වැඩ කරනවා. සිම්ස් “ප්‍රජාතන්ත්‍රවාදය” ඉස්සරහට දාගෙන මුළු සයිලෝ එකම තමන්ගේ ග්‍රහණයට ගන්නයි හදන්නේ.

ඊළඟ රැස්වීමෙදී සිම්ස් කියනවා සයිලෝ එකේ තිබුණු කැමරා බොහොමයක් දැන් අයින් කරලා තියෙන්නේ කියලා (හැබැයි ඒක සම්පූර්ණ ඇත්තක් නෙවෙයි). බර්නාඩ්ගේ බොරු නිසා හැමෝම අමාරුවේ වැටුණු හැටිත් මිනිහා මතක් කරනවා.

රැස්වීම පටන් ගත්තම හැමෝම තමන්ගේ අදහස් කියන්න ගන්නවා. සැපයුම් අංශයේ උප-ප්‍රධානියා වෙන ඕර්ලා කෙන්ට් තමන්ගේ පවුලේ අතීතය ගැන කතා කරද්දී, ජුලියට්ට මාර්තාගෙන් ලැබුණු පණිවිඩයක් යාන්තමට මතක් වෙනවා. ඒ තමයි “සැපයුම් අංශයේ හැමදේම හොඳින්” කියන එක. ඕර්ලා එතනදී එඩ් කියන මළ පැනපු පතල් කම්කරුවෙක් එක්ක වචන හුවමාරුවක් දාගන්නවා. මේ රණ්ඩුව ඉස්සරහට එන එපිසෝඩ් වලදී ලොකු ප්‍රශ්නයක් වෙයි වගේ.

ෂර්ලි තමයි දැන් සයිලෝ එකේ නැවත ඉදිකිරීම් කටයුතු බලාගන්නේ. හැබැයි කෙල්ලට ජුලියට්ගේ මේ අමතක වීමේ සීන් එක දිරවන්නේ නෑ. ජුලියට්ගේ තාත්තා තමන්ගේ ජීවිතය පූජා කරපු එක ගැනත් (ඒකටත් වැරදිකාරයා කරලා තියෙන්නේ බර්නාඩ්ව) ජුලියට් කිසිම ගාණක් නැතුව ඉන්න එක ෂර්ලිට ප්‍රහේලිකාවක්.

මේ අතරේ ඕර්ලා ජුලියට් එක්ක කතා කරලා කියනවා සයිලෝ එකේ බඩු බාහිරාදිය ගොඩක් අතුරුදන් වෙනවා කියලා. කෙල්ල හිතන්නේ මේවා ඉදිකිරීම් කටයුතු වලට හොරෙන් පන්නලා කියලා. හැබැයි මේ ගැන දිගටම කතා කරන්න කලින්, සයිලෝ එක ඇතුළේ පිටස්තරයෝ පිරිසක් කලබල ඇති කරනවා කියලා කට්ටියට ආරංචි වෙනවා.

පඩිපෙළක් උඩ බැනර් එකක් ගහලා තියෙනවා “මේකයි ඇත්ත, තිරයේ පේන්නේ බොරුවක්” කියලා. මේක දැක්කම ජුලියට්ට පරණ මතකයන් වගයක් ඇවිස්සෙනවා. කෙල්ලට තවත් සයිලෝ එකක් ගැන මතක් වෙන්න ගන්නවා. හැබැයි කැමිල් හැමතිස්සෙම උත්සාහ කරන්නේ ජුලියට්ට බොරු මතකයන් ඔළුවට දාන්නයි. ඒ කියන්නේ කෙල්ල සයිලෝ එකෙන් පිටත තිබුණු පොඩි කූඩාරමක ඉඳලා බේරුණා වගේ බොරු මතකයක්. ඒ විතරක් නෙවෙයි, විටමින් කියලා රවට්ටලා ජුලියට්ට මතකය නැති කරන බෙහෙත් බලෙන්ම පොවනවා. ජුලියට්ගේ මතකය ආපහු එන්න මෙච්චර කල් යන්නේ අන්න ඒ නිසයි.

මේ අතරේ කතාව වෙනස්ම පැත්තකට යනවා. වොෂින්ටන් ඩීසී වල, ෂාලට් කියලා ගැනු කෙනෙක් ඉන්නවා. මෙයා ඉන්නේ කවුරුහරි තමන් පස්සෙන් එනවා කියලා ලොකු බයකින්. නාවික හමුදාවේ වැඩ කරන මේ කෙල්ල, ඇඳුම් මාරු කරලා තමන්ගේ පස්සෙන් ආපු කෙනාව මඟඇරලා තමන්ගේ සහෝදරයා වෙන කොන්ග්‍රස් සභික ඩැනියෙල් කීන් හමුවෙන්න යනවා.

දෙන්නා අතරේ ඇතිවුණු පොඩි කතාබහකින් පස්සේ, ෂාලට් ඩැනියෙල්ට කියනවා තර්මන්ගේ ඉරාන කමිටුවට ඇතුළත් වෙන්න කියලා. ඩැනියෙල් තර්මන්ගේ අවධානය දිනාගෙන ඒ කමිටුවට එකතු වෙනවා. එතනදී තමයි මිනිහා දැනගන්නේ ෂාලට් ඇත්තටම යන්නේ බෝම්බ ප්‍රහාරයට ප්‍රතිප්‍රහාර එල්ල කරන්න ඉරානයට ඉහළින් පියාසර කරන මෙහෙයුමකට කියලා. හැබැයි මෙයාලගේ F-35 යානා බලඝනය එක එකපාරටම අමුතු වලාකුළක් ඇතුළට යනවා. ඒකෙන් හැම යානයක්ම කඩාගෙන වැටෙනවා.

හැබැයි ෂාලට් බේරෙනවා. ටර්ක්මෙනිස්තානයේ බේරාගැනීමේ කණ්ඩායමකට කෙල්ලව හම්බවෙනවා. අවාසනාවකට මෙයාගේ මොළයට බරපතළ තුවාල වෙලා නිසා කෙල්ලව ෆෙයාර්ෆැක්ස් වල තියෙන සායනයකට එවනවා. ඩැනියෙල් තමන්ගේ නංගිව බලන්න ආවත්, මතකය නැති වෙලා ඉන්න ෂාලට්ට තමන්ගේ සහෝදරයාවවත් අඳුරගන්න බැහැ.

ආපහු සයිලෝ එක පැත්තට ආවොත්, කැමිල් ඇල්ගොරිතම් එකත් එක්ක කතා කරනවා. ඇල්ගොරිතම් එක ගෑනිට කියන්නේ ජුලියට්ට දෙන මතකය නැති කරන බෙහෙත් මාත්‍රාව ඩබල් කරන්න කියලා 😀

හැබැයි සයිලෝ එක ඇතුළේ ජුලියට්ට උදව් කරන්න හදන පිරිසකුත් ඉන්නවා. එදා රෑ කෙල්ලගේ සුප් එක අස්සේ හංගලා තිබුණු ලියුම් කෑල්ලක් මෙයාට හම්බවෙනවා. ඒකේ ලියලා තිබුණේ:

“ඇත්ත දැනගන්න ඕනෙද? ඔයාගේ සුප් කෝප්පය කනපිට හරවලා තියන්න. රෑ 2ට කඩවීදි දිහාට එන්න. මේ ලියුම පුච්චලා දාන්න.”

තමන්ගේ මතකය ආපහු ලබාගන්න බලාපොරොත්තුවෙන් ජුලියට් ඒ කියපු විදිහටම කරනවා.

ඉතින් මේ එපිසෝඩ් එක ගැන කතා කරොත්,

සයිලෝ කතාව ආයෙත් පටන් ගන්නේ අර සුපුරුදු “මතකය නැතිවීමේ” තේමාවත් එක්ක. මේක ලියන අයට ලේසියෙන් කතාව ඉස්සරහට ගෙනියන්න දාපු උපක්‍රමයක් වුණත්, මේ කතාවේ හැටියට ඒක ගැලපෙන විදිහට නිර්මාණය කරලා තියෙනවා.

මට හිතෙන විදිහට, මේ ඇල්ගොරිතම් එක කියන්නේ මුළු සයිලෝ එකම පාලනය කරන AI (කෘතිම බුද්ධියක්) හරි එහා ඇත්ත ලෝකයේ ඉන්න බලවත් මිනිස්සු පිරිසක් වෙන්න ඕනේ. මේකේ හඬ ඩැනියෙල් කීන්ගේ හඬට පුදුම විදිහට සමානයි. සයිලෝ එක තමන්ට ඕන විදිහට පාලනය කරන්න ඩැනියෙල්ම AI එකක් වගේ රඟපානවා කියලා පස්සේ හෙළි වුණොත් නම් මම පුදුම වෙන්නේ නෑ.

කොහොම වුණත්, සීසන් එකේ ආරම්භය නම් ටිකක් හොඳ මට්ටමක තියෙනවා. අලුත් නගරාධිපති කෙනෙක් පත්වෙලා ඉන්න අතරේ, යටින් ලොකු කැරැල්ලක සේයාවන් පේන්න තියෙනවා. කැමිල් සහ සිම්ස් බලයට පෙරේතකමේ ඉන්නේ, ඉතින් ලැබෙන හැම අවස්ථාවකින්ම ප්‍රයෝජන ගන්න මෙයාලා බලනවා. ජුලියට් ඉන්නේ ලොකු අනතුරක. කෙල්ල ගොඩක් පරිස්සම් වෙන්න ඕනේ, නැත්නම් මෙයාව මුළු සයිලෝ එකේම හතුරෙක් වෙන්න ඉඩ තියෙනවා. ඉස්සරහට එන්න තියෙන සුපිරි සහ කුතුහලයෙන් පිරුණු සීසන් එකකට මේ එපිසෝඩ් එකෙන් හොඳ අඩිතාලමක් දාලා තියෙනවා.

 

 

 

 

 

Due to copyright issues, we no longer provide any torrent links.

ලබා දී ඇති උපසිරැසි WEB පිටපත් සඳහා පමණක් අදාළ වේ.

1,717 downloadsDownload Silo-S03E02.zip30 KB

 

 

මේ ලබා දී ඇති සිංහල උපසිරැසි පිළිබද “ UD Shehan ” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

 

 

Subtitle Contributor Rank

GOLD MEMBER
JOINING DATE – 2016-12-05

SUBMAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.