Alita: Battle Angel (2019) Sinhala Subtitles | මතකයන් සොයා යන රණශූරිය… [සිංහල උපසිරැසි සමඟ] *150

කොතැනින් කොහොම පටන්ගන්නද, කොහොම ලියන්නද කියල හිතාගන්නත් බැහැ. අද මගේ උපසිරැසිකරණ ජීවිතයේ තෙවන කඩයිම පහුකරන්නයි මේ සූදානම් වෙන්නෙ. 2016 වසරේ අගෝස්තු මාසෙ 16 වැනිදා හුදෙක් විනෝදාංශයක් විදිහට විතරක් සීමාවෙලා The Darkness (2016) චිත්‍රපටයට සිංහල උපසිරසි ලබාදීමෙන් අරඹපු මේ “සිංහල උපසිරැසිකරණ” දිවිය මේ වෙද්දි විනෝදාංශයකට එහා ගිහින් කොටින්ම කියනවා නම් ඇබ්බැහිවීමක් බවට පත්වෙලා හමාරයි. හැබැයි ඉතිං මේ වැඩේ කරල ලැබෙන තෘප්තිය නම් කියල නිම කරන්න බැහැ. ඉතින් ඔය විදිහට පටන්ගත්තු මගේ උපසිරසිකරණ ජීවිතේ මේ වෙද්දි කඩයිම් දෙකක් පහුකරල තියෙනවා ඒ තමයි,

පළමු කඩයිම – Prison Break අවසාන එපිය
දෙවන කඩයිම – Annihilation

ඉතින් ඒ පහුකරපු “පළමු සහ දෙවැනි” කඩයිම් තුළදී මම හිතුවටත් වඩා හොඳ ප්‍රතිචාර ලැබුණා. ඒ නිසා මේ පහුකරන්න සූදානම් වෙන තෙවන කඩයිමටත් එවැනිම ප්‍රතිචාර ලැබෙවී කියල මං හිතනවා. “අද” මේ විදිහට ලබාදෙන්න යන “තෙවන” කඩයිම ඇතුළත පුරා “අවුරුදු දෙකයි මාස මාස දහයක” කාලය තුළදී විවිධ රූපවාහිනී කතාමලාවන් වල කතාංග 100 සහ චිත්‍රපට 50 කට සිංහල උපසිරැස ලබාදී තියෙනවා. ඒ චිත්‍රපට වලිනුත් වැඩි හරියටක්ම ඉතින් නෙට්ෆ්ලික්ස් චිත්‍රපටි නොවැ😁

ඉතින් මේ විදිහට සිංහල උපසිරසිකරණයේ මහගෙදර, බයිස්කෝප් සිංහලෙන් වෙබ් අඩවිටට උපසිරසිකරුවෙක් විදිහට මම එකතු වුණාට පස්සෙ ගොඩක් කට්ටිය දැන හඳුනගන්න හැකියාවක් ලැබුණා. ඒවගේම තමයි මතක් කරන්න නම් ගොඩක් කට්ටිය ඉන්නවා. ඉතිං ඒ මතක් කරන්න ඕන කට්ටියගෙන එක්කෙනෙක් හැරි මඟ හැරුණොත් හරි නැහැනෙ. ඉතිං බයිස්කෝප් පවුලේ ඉන්න සෑම උපසිරැසකරුවෙක්ම මේ අවස්ථාවේ මම මතක් කරනවා. ඉතිං දැන් කියන්න යන කට්ටිය නම් මතක් කරන්නම ඕන. මොකද මේ උදවිය ඉතා නිහඬ සේවයක් ඉටු කරන කට්ටියක්. වැරැද්දක් දැක්කම කියල දෙන හසන්ත අයියා ඒවගේම වැඩිම උපසිරැස ප්‍රමාණයක් බයිස්සිකෝප් අඩවියට දායාද කරපු රොයිලි ප්‍රනාන්දු අයියා පොටෝ එකක් හදල ඉල්ලුවම බැහැ නොකියා උදව් කරන නවෝදනී අක්කි, අශාන් විමුක්ති(විමා) අයියා, සිසිල අයියා, චාමර අයියා, ආසිරි අයියා, අසංක ප්‍රදීප් රණතුංග අයියා, සුදීර අයියා, නිර්මාණි විජේසිංහ අක්කි, සමීර කරුණරන්ත අයියා, සමන් ප්‍රසාද් අයියා, නලීන් අයියා, ඉසිර ගුණතිලක අයියා, ප්‍රණීත් රණසිංහ අයියා, බයිස්කෝප් මංසලේ ඇඩ්මින් සාමාජික තිසර නියෝ අයියා වගෙම බයිස්කෝප් ඩවුන්ලෝඩ් එක වැඩ කටයුතු කරගෙන යන සඳුන් අයියත් වගේම බයිස්කෝප් අඩවියෙ නිර්මාතෘ වන “ඉසිර ගුණතිලක” අයියවත් මේ අවස්ථාවේ මතක් කරනවා. ඒවගේම තමයි හැමදාම වගේ කමෙන්ට් එකක් දාගෙන යන කට්ටියවත් මතක් කරනවා. හරි ඔන්න කියන්න තියෙන දේවල් ටික කිව්වා එහෙනම්. තවත් අටුවාටිකා අවශ්‍ය නැහැ. එහෙනම් ඉතින් අද ඔයාලට අරගෙන එන චිත්‍රපටයට දිහාවට හැරෙමු දැන්…

2019 වසරේ මුල් භාගයේදී බොහෝ දෙනා අතර කතිකාවක් ඇතිකරන්න සමත්වුණු සලරුවක් නිසාවෙන් Alita: Battle Angle(2019) කිව්ව ගමන් මේ චිත්‍රපටිය ගැන සිනමා රසිකයින් වන ඔයාලා දන්නවත් ඇති. මෙම සලරුව ප්‍රේක්ෂකයින් සහ සිනමා විචාරකයින්ගේ අවධානය දිනාගත් සිනමා නිර්මාණයක් වූ නිසාවෙන් “පළමු පූර්ව ප්‍රචාරක පටය” නිකුත් වූ දින පටන් චිත්‍රපටය නරඹන්නට දෑස් දල්වා බලා සිටි සලරුවක් බව අමුතුවෙන් කියන්න දෙයක් නැහැ. ඉතින් ඒ විදිහට ප්‍රේක්ෂක කුතුහලය උපරිමයකට අරගන්න Drama | Sci-Fi | Romance | Action | Adventure | Thriller යන සිනමා වර්ගීකරණයන්ට අයත්ව නිර්මාණය වූ මේ චිත්‍රපටය සමත්වීමට ප්‍රධානම හේතුව වුණේ මෙහි නිෂ්පාදනය කටයුතු සඳහා වගේම තිර රචනය වෙනුවෙන් දායක වූ අයවලුන් නිසාවෙනුයි. සිනමා ලෝකයේ ආදායම් වාර්තා අතරට එක්වූ වගේම ලොව පුරා සිනමාලෝලී ප්‍රේක්ෂකයින්ට කිසිදා අමතක නොවන අන්දමේ සිනමා අත්දැකීම් සමූහයක් තිළිණ කිරීමට සමත්වුණු චිත්‍රපටය කිහිපයක් වශයෙන් අවිවාදයෙන් හඳුන්වන්නට හැකි Avatar (2009), Titanic (1997) හා The Terminator (1984) යන චිත්‍රපට වල අධ්‍යක්ෂවරයා ලෙස කටයුතු කරපු James Cameron සහ Jon Landau විසින් තමයි මේ සලරුවේ නිෂ්පාදනය සහ තිර රචනය සිදුකරල තියෙන්නෙ. සිනමා දිවියේ වසර 10ක පමණ දිගු නිහැඩියාවකට පසුව James Cameron නැවතත් සිනමා ප්‍රේක්ෂයින්ගේ සිත් තුළට සමීපවීමට Alita සලරුවෙන් සමත්වී තිබෙනවා. ඒවගේම තමයි මේ සලරුවෙනුත් ප්‍රේක්ෂකයාට Avatar තුළින් හඳුවාදුන්නු ත්‍රිමාණ සජීවීකරණ අත්දැකීම හා සමානම අත්දැකීමක් නිසැකවම ලබාගන්න පුළුවන්. Cameron ගේ තිර පිටපත අනුව නිර්මාණය කරන මේ සලරුවේ අධ්‍යක්ෂකවරයා වශයෙන් කටයුතු කරන්නෙ Spy Kids ළමා චිත්‍රපට මාලාවේ සහ Sin City: A Dame to Kill For (2014) චිත්‍රපටයේ අධ්‍යක්ෂවරයා ලෙස කටයුතු කළ Robert Rodriguez විසිනුයි.

Robert Rodriguez සහ James Cameron චිත්‍රපටය
රූගත කරන අවස්ථාවේදී අරගත් ජයාරූපයක්

විශේෂයෙන්ම කියන්න ඕන මෙම චිත්‍රපටය සඳහා පාදක කරගෙන තියෙන්නෙ 1990 සිට 1995 වසර දක්වා “Shueisha’s Business Jump” ලෙස හඳුන්වන ජපන් සඟරාවක කොටස් වශයෙන් පළ වූ Yukito Kishiro නැමති කතුවරයාගෙ “Gunnm” නැමති මන්ගා කෘතියයි. ඒවගේම තමා මෙහි “කාණ්ඩ 09” ක් අඩංගු වෙනවා. (මෙම මන්ගා කෘතියෙන් Anime එකක් පවා නිකුත් වුණා 1993 වර්ෂයේදී. මාත් ඒක හැබැයි බලල නැහැ 🙂

Yukito Kishiro

Gunnm 1 සිට 9 වෙනි කාණ්ඩය දක්වා

Gunnm නැමති කෘතිය

Anime සිරීස් එක

හොඳයි එහෙනම් අපි දැන් මෙහි රංගනයෙන් දායක වෙන උදවිය කවුද කියල බලමු. සමහරවිට ඔයාලට නම් Rosa Slazar කියන නම අහල පුරුදු නැතිව ඇති. හැබැයි ඇය Maze Runner The Scorch Trail (2015), Insurgent (2015), CHIPS (2017), Maze Runner Death Cure (2018) සහ Bird Box (2018) නැමති චිත්‍රපට තුළදී නම් අපිට දකින්න ලැබුණා. හැබැයි ඉතිං මේ චිත්‍රපටයෙදී නම් ඇයව හඳුනාගන්න ලැබෙන එකක් නැතිවෙයි. මොකද ඇයගෙ මුහුණ සම්පූර්ණයෙන් “CGI තාක්ෂණය” යොදාගනිමින් වෙනස්ම ආකරයෙ රූපයක් ලබාදී තියෙන්නෙ. මෙලෙස CGI තාක්ෂණය නිර්මාණය කර ඇත්තෙත් ජේම්ස් කැමරන්ගේම ක්‍රමෝපායන් යටතෙයි. ඒ වගෙම “ඔස්කාර් සම්මාන ලාබී” Mahershali Ali සහ අනෙකුත් සෙසු චරිත වලට ප්‍රවීණ රංගන ශිල්පී Christoph Waltz, Jennifer Connelly, Ed Skrein සහ Keean Johnson දායක වෙනවා.

Rosa Slazer සහ චිත්‍රපටයේ Alita

මේ සලරුවේ රේටින් ගැන ගැන කියනවා නම් මේ වෙද්දි මනාප 51694 ක් ලබාගනිමින් IMDb දර්ශකයේ 7.6/10 ක අගයක් සහ කුණු තක්කාලි දර්ශකයේ 59% මනාප ප්‍රතිශතයක් ලබාගැනීමට Alita: Battle Angle සමත් වී තිබෙනවා. ඒවගේම තමයි ඇමෙරිකානු ඩොලර් මිලියන 200ක නිෂ්පාදන පිරිවැයක් දරා නිපදවූ මේ සලරුව මේ වන විට ඇමෙරිකානු ඩොලර් මිලියන 400ක වාර්තාගත ආදායමක් ලබාගනිමින් බොක්ස් ඔෆිස් වාර්තා අතරට එකතුවී හමාරයි.

ඉදිරි අනාගතය ගැන සිනමා සිත්තමක් අපි වෙත තිළිණ කිරීමෙදී බෙහෙවින්ම දක්නට ලැබෙන්නෙ එහි ඇති වාතාවරණය සහ තාක්ෂණය නිසාවෙන් මෙම ලෝකයට සිදුවන බලපෑමයි. එසේම පවතින සමාජ පංති ක්‍රමය ඔස්සේ මිනිස් ප්‍රජාව බලවතුන් සහ දුගීන් වශයෙන් කොටස් දෙකකට වෙන්කෙරෙනවා.වර්ෂ 2563, මහා සංග්‍රාමයක් නොහොත් චිත්‍රපටයේ දී නම් “බිඳවැටීම” සිදුවී වසර 300 ක් ගත වී හමාරයි. ලෝකයෙ හැම අතකම සිටින කිසිම පිළිසරණක් නැති මිනිසුන් “කම්හල් නගරය” වෙත පැමිණෙනවා. ඩොක්ටර් ඊඩෝ මෙම අසරණ වූ මිනිසුන් හට දීප්තිමත් පහනක් වැනි අයෙක්. ඒ මොකද කියනවා නම් ඔහු ඒ සෑම අයෙක්ටම වසර ගණනාවක් මුළුල්ලේ තමන් ලබාගත් දැනුම මඟින් ඔහුට හැකි උපරිම ආකාරයෙන් උපස්ථාන කරන නිසායි. දවසක් ඔහු මෙලෙස අසරණ වූ අයට උදව් කිරීමට අවශ්‍ය දෑ සෙවීම සඳහා කසළ ගොඩට ගිය අවස්ථාවේදී දකිනවා එක්තරා සයිබ්‍රෝග් ( සයිබ්‍රෝග් කෙනෙක් යනු අර්ධ මනුශ්‍ය අර්ධ යාන්ත්‍රික ලෙස හඳුන්වන අයයි) කෙනෙක්ගෙ හිසක්. නමුත් ඇයට ඒ මොහොත වෙද්දිත් පණ තියෙනවා. ඔහු ඇය මතින් බලාපොරොත්තුවක් දකිනවා. ඉතින් ඔහු මෙලෙස සුන්බුන් වූ සයිබ්‍රෝග් ව නැවත ක්‍රියාකාරී තත්වයට අරගත්තත් ඔහුට මැය කොහෙන් ආවාද, ඇයගෙ ඇත්තම නම මොකද්ද කියල කිසිම අදහසක් නැහැ. නමුත් ඔහු දන්නව ඇය හුගක් බලසම්පන්න කෙනෙක් බව. මොකද ඇයගෙ හදවතට පුළුවන් වෙනවා මුළු “කම්හල් නගරයටම” අවශ්‍ය කරන බලය ලබාදෙන්න. නමුත් ඊඩෝට ඇය දැකුමෙන් මෙම කුරිරු ලෝකයෙදී නපුර මඟින් මිය ගිය ඔහුගෙ දුවව මතක් වෙනවා. ඉතින් ඔහු නව බලාපොරොත්තුවක් සමඟ ඇයට ඇලීටා කියන නාමය ලබාදෙනවා. ඉතින් මේ ඇලීටාට ඒ කුරිරු ලෝකයෙදී ගොඩක් දේවල් වලට මුහුණ දීමට සිදුවෙනවා. ඇයට මෙලෙස මුහුණදීමට සිදුවන කටුක අත්දැකීම් සහ ඇයට කිරීමට සිදුවන කැපකිරීම් ගැන තව දුරටත් දැනගන්න නම් මේ සලරුව බලන්නම වෙනවා…

ඉතින් අවසාන වශයෙන් තව කාරණා කීපයක් කියන්න තියෙනවා.මේ චිත්‍රපටය උපසිරසිගැන්වීමේ අයිතිය ලැබිල තිබුණෙ අපේ හසන්ත අයියට. කඩයිමක් විදිහට මේ චිත්‍රපටියට උපසිරසි ගන්වන්න මට ඉඩ හසර වෙන්කරල දුන්නු එකට ඔහුට ස්තුතිවන්ත වෙනවා. අනික් කාරණේ තමයි මෙහි දෙවැන්නකුත් අනාගතයෙදී බලාපොරොත්තු වෙන්න පුළුවන් බව අධ්‍යක්ෂකවරයා විසින් ප්‍රකාශ කරල තියෙනවා. ඉතින් සිනමා රසික ප්‍රේක්ෂකයින් වන ඔබට කියන්න තියෙන්නෙ මෙයින් ඔබට අපූරු විද්‍යා ප්‍රබන්ද සිනමා පටයක වින්දනයක් ලබාදේවි කියලයි. එහෙනම් ඉතිං නැවතත් උපසිරැසයකින් හමුවෙන බලාපොරොත්තුවෙන් අදට සමුගන්නම්, ඔබට ජය..!!

“I Do Not Standby In The Presence Of Evil”
– ඇලීටා.

Due to copyright issues, we do not provide any torrent links.

මෙම ලබා දී ඇති උපසිරසිය HD / WEB / Blu-Ray පිටපත් සඳහා අදාළ වේ.

50,547 downloadsDownload Alita-Battle-Angel-2019-Blu-Ray-Update.zip265 KB

මේ ලබා දී ඇති සිංහල උපසිරැසි පිළිබද “රවිදු රුක්ෂාන්” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

Subtitle Contributor Rank

GOLD MEMBER
JOINING DATE – 2016-08-20
SUBMAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.