The Treasure of the Sierra Madre (1948) Sinhala Subtitles | තණ්හාවේ ඛේදවාචකය... [සිංහල උපසිරසි]

ආයුබෝවන් යාලුවො හැමෝටම! අද මම අරගෙන ආවේ ලෝක සිනමාවේ බිහිවුණු තවත් අග්‍රගණ්‍ය පැරණි චිත්‍රපටයකට (Classic) උපසිරැසියක්.

කතාවේ නම තමයි The Treasure of the Sierra Madre (1948). John Huston ගේ අධ්‍යක්ෂණයක් වෙන මේක, Adventure / Drama / Western ගණයට තමයි අයිති වෙන්නේ. සුප්‍රසිද්ධ නළු Humphrey Bogart තමයි මේකේ ප්‍රධාන චරිතයට රංගනයෙන් දායක වෙන්නේ. අදටත් මේ චිත්‍රපටය IMDb දර්ශකයේ 8.2/10 ක ඉහළ අගයක් ලබාගනිමින් ලෝකයේ හොඳම චිත්‍රපට 250 (Top 250) අතරේ රැඳිලා ඉන්න සමත් වෙලා තියෙනවා.

කතාව සිද්ධ වෙන්නේ මෙක්සිකෝවේ. කිසිම රස්සාවක්, සල්ලි බාගයක් නැතුව අසරණ වෙලා ඉන්න ඇමරිකානුවන් දෙන්නෙක්ට, දවසක් රත්තරන් හොයන වයසක මනුස්සයෙක්ව මුණගැහෙනවා. ඉතින් මේ තුන්දෙනා එකතු වෙලා සියෙරා මැඩ්‍රේ (Sierra Madre) කියන කඳුකරයට යනවා රත්තරන් හොයාගෙන. ගොඩක් කටු කාලා, මහන්සි වෙලා අන්තිමට එයාලට ඕන තරම් රත්තරන් හොයාගන්නත් පුළුවන් වෙනවා.

හැබැයි ඇත්තම ප්‍රශ්නේ පටන් ගන්නේ එතනින් පස්සේ. රත්තරන් ලැබුණාට පස්සේ සල්ලි වලට තියෙන කෑදරකම නිසා මේ තුන්දෙනාගේ යාළුකමයි, මනුස්සකමයි ටිකෙන් ටික සම්පූර්ණයෙන්ම වෙනස් වෙනවා. සල්ලි දැක්කාම මිනිස්සුන්ගේ හිතේ ඇතිවෙන සැකයයි, පෙරේතකමයි කොච්චර භයානකද කියලා මේ කතාවෙන් හරිම තාත්විකව පෙන්නුම් කරනවා. මනුස්ස ස්වභාවය ගැන හිතන්න යමක් ඉතුරු කරන ෆිල්ම් එකක්.

කිසිම කම්මැලිකමක් නැතුව අන්තිම වෙනකල් කුතුහලයෙන් බලන්න පුළුවන් පට්ටම කතාවක් විදිහට මේක හඳුන්වන්න පුළුවන්. එහෙනම් ෆිල්ම් එක අරගෙනම බලන්න. වෙනදා වගේම උපසිරැසිය ගැන ඔයාලගේ අදහස් යටින් දාගෙන යන්නත් අමතක කරන්න එපා. ජය වේවා!