The Visitor (2007) | තමන්ගෙම ගෙදර කුලියට ඉමුද?

රිචඩ් ජෙන්කින්ස් කියන්නෙ හොඳ නළුවෙක් වුණාට එයා ප්‍රධාන චරිතය කරන චිත්‍රපටියකට මම බලල තියෙන්නෙ මේ චිත්‍රපටිය විතරයි. මේක මෑතකදි හොයාගත්තු එකක්. ඔය IMDb එක පැත්තෙ කරක් ගහද්දි තමයි හම්බ වුණේ. සෙල්ලම් නෑ IMDB 7.8/10 අරගෙන තියෙනවා වගේම ඔස්කාර් සම්මානයක් ඇතුළු සම්මාන 15 කට නිර්දේශ වී සම්මාන 13ක් දිනාගන්නට සමත් වූ චිත්‍රපටියක්.

මහාචාර්ය වෝල්ටර් වේල් ඉතාම කාර්ය බහුල බව පෙන්වන ඒත් ඒ තරම් වැඩක් නොකරන ඒකාකාරී ජීවිතයක් ගෙවන පුද්ගලයෙක්. හොඳ සංගීත රසිකයෙක් වෙන ඔහු දක්ෂ පියානෝ වාදන ශිල්පිනියක් වුණ තමන්ගෙ මියගිය බිරිඳ මතක් වෙන්න කියල පියානෝ වාදනය ඉගෙනගන්න උත්සාහ දරනවා. ඒ වුණත් ඒක ඔහුට හරියන දෙයක් නෙවෙයි. කියන දේ මූණටම කියන ඔහුගේ ලක්ෂණය නිසා ඔහු ටිකක් සීරියස්ද කියලත් හිතෙනවා.

වතාවක් සමුළුවකට සහභාගී වෙන්න ඔහු තමාගේ ගම් පලාතට එනවා. ඔහුගේම බද්ධ නිවාසයක් (apartment) ඔහුට තියෙනවා. නමුත් ගෙදර එද්දි ගෙදර කවුද පදිංචි වෙලා ඉන්නව. ඒ සිරියානු ජාතික ටරෙක් කියන තරුණයා සහ ඔහුගේ පෙම්වතිය වෙන සෙනගාල ජාතික සයිනෙබ් නම් තරුණියයි. ඔවුන් අනවසර සංක්‍රමණියන් විධියට ආපු අයයි. ඔවුන්ව රවටා වෝල්ටර්ගේ නිවස ඔවුන්ට දීල තියෙන බව තමයි ඔවුන් කියන්නෙ. අළුත් තැනක් හොයාගන්නකම් ඔවුන්ට තමාගෙ නිවසේම නවාතැන් දෙන්න වෝල්ටර් කැමති වෙනව.

ටික ටික වෝල්ටර් සහ මේ තරුණ යුවල හොඳ යාළුවො බවට පත් වෙනව. වෘත්තීය අප්‍රිකානු බෙර වාදකයෙක් වෙන ටරෙක් වෝල්ටර්ට බෙර වාදනය උගන්වනව. ඒ අතර අනවසර සංක්‍රමණය නිසා ටරෙක්ව අත්අඩංගුවට ගැනීම හින්දා ඔහුව බලන්න එන ඔහුගේ මව සහ වෝල්ටර් අතර කියාගන්න බැරි මොකක්දෝ එකක් ඇතිවෙනව. මේ කීපදෙනාගෙ ජීවිතය කොහොම ගෙවෙයිද? මහාචාර්යවරයා තමාගේ ඒකාකාරී ජීවිතයෙන් මිදෙයිද? ඔහුගේ ජීවිතයට අළුත් එලියක් වැටෙයිද?

මම නම් ගොඩක් ආසාවෙන් බැළුව. ඔයාලත් බාලම බලන්නකෝ.

ලිපිය – හරේ සොහොයුරා