Fast & Furious Presents: Hobbs & Shaw (2019) AKA Hobbs & Shaw AKA Fast & Furious: Hobbs & Shaw Sinhala Subtitles | පළමු හෝබ්ස් සහ ශෝ මෙහෙයුම…. (300*) [සිංහල උපසිරැසි සමඟ]

සුබ දවසක් බයිස්කෝප් වාසින් හැමෝටම! තවත් සීමාවක් පහු කරන්න තමයි අද මේ සූදානම. අද මගේ උපසිරැසි ගමනේ 300 වෙනි කඩඉම  මේ සමගින් පහු කරනවා. 2012 ආරම්භ කල මේ විනෝදාංශය අවුරුදු 7ක් පුරාවට මේ ආකාරයෙන් කරගෙන එන්න ලැබීම එක අතකට ලොකු දෙයක්. හැම දෙයකටම සීමාවක්, එපා වීමක් ඇති වෙන එක සාමාන්‍යය දෙයක් උනත්  එදා පටන් අද දක්වා කරගෙන එන්න හේතුව විශේෂයෙන් අපිව දිරිමත් කරන ඔයාල කිව්වොත් වඩා නිවැරදියි. ඒ වගේම බයිස්කෝප් කිව්වම ඔයාලට මේ පෙනන වෙබ් අඩවිය විතරක් උනාට අපිට නම් ඒක ලොකු පවුලක්. ඒ පවුලේ සාමාජිකයෝ දවසින් දවස වැඩි උනා මිසක් අඩු උනේ නැහැ.   මම උපසිරසි කරණයට එකතු වෙනකොට සිටි  පිරිස එක්ක බලනකොට අද විශාල ප්‍රමාණයක් අපිත් එක්ක එකතු වෙලා ඉන්නවා. මේ වෙනකොට සාමාජික සාමාජිකාවෝ 973ක් කිව්වොත් වඩා නිවැරදියි. මෙහම පිරිස එන්න එන්න වැඩිවීම එක අතකින් අපිත් එක්ක එකතු වෙලා ඉන්න ඔයාලගේ වාසනාව. හැමදාම උපසිරසි 6-7 ඔයාලට ලැබෙන්න මූලික හේතුව තමයි ඒ පිරිස. ඒ වගේම ඒ එවන උපසිරැසි ඔයාලට මෙහෙම දකින්න සලස්වන්න හැමදාම තිරය පිටුපස ඉඳන් වෙසෙසෙන පිරිසත් අමතක නොකර බැහැ. ඒ තමයි බයිස්කෝප් සිංහලෙන් ඇඩ්මින් මණ්ඩලය.

මේ දවස් වල නම් තිසර සහෝ තමයි ලොකු බරක් ඇදගෙන යන්නේ. ඒ වගේම රොයිලි, චාමර, සමන්, නවෝදනී, සිසිල, අසංක, සුදීර, විමා මේ පිරිසත් වෙබ් අඩවියේ තිරය පිටුපස නිතර නිතර ක්‍රියත්මක වෙන පිරිසට අයත්. අනික් සහෝදර සහෝදරියෝ තරහ වෙන එකක් නැහැ කියල හිතනවා මොකද ඔයාලගේ නම් ලියන්න ගියොත් මේ උපසිරස ගන්න ත්‍රිවිල් එකක පහලට යන්න වෙනවා. හැමදාම කියනවා වගේ පොතේ නැති උනාට හැමෝම හිතේ ඉන්නවා. ඒ තරම් දිගයි අපේ උපසිරසිකරුවන්ගේ ලැයිස්තුව. ඒ හැම කෙනෙක්ම ආදරයෙන් මතක් කරනවා. වෙබ් අඩවියක් විදිහට එදා සහ අද බලනකොට අපි ගොඩක් ලොකු දේවල් අත් කරගෙන තියෙනවා. විශේෂයෙන් මේක උපසිරසිකරණයට පමණක් සීමා උනත් අපි එතනින් එහාට සුහද හමු, සමාජීය යහපත වෙනුවෙන් කරන සත්කාර හරහා අවුරුද්දකට කීප වතාවක් මුණ ගැහෙනවා. ඒ දේවල් හරහා මේ පවුල තව තවත් ශක්තිමත් වෙනවා වගේම මේ විනෝදාංශය අදටත් එපා නොවෙන්න මූලික හේතුව ඒ මිතුරු බැඳීම කියලයි මම විශ්වාස කරන්නේ. කමෙන්ට් එකකින් ස්තුතිය පල කරපු, අපේ උපසිරසි බාගත කරගෙන හැමදාම අපි එක්ක හිටපු ඔයාලටත් නැවත ස්තුතිවන්ත වෙනගමන් බයිස්කෝප් පවුලේ සෑම සාමාජිකයෙක්ම සාමාජිකාවක්ම ආදරෙයෙන් මතක් කරන ගමන් අදට සමුගන්නම්. පහලින් තියෙනවා  තිසර සහෝ විසින් මේ චිත්‍රපටය වෙනුවෙන් ලියු ලිපිය. 

2001 දී සාමාන්‍ය සිනමාපටයක් හොලිවුඩයේ තිරගත වනවා. නීතිවිරෝදී වීදි ධාවන තරඟ වල නියැලෙන සහ මංකොල්ලකෑම් වල නියැලෙන කණ්ඩායමක් සමඟ ඇරඹෙන මේ සිනමාපටය අද වන විට හොලිවුඩය හොල්ලන සිනමා පෙළහරක් වී අවසන්. නීතිවිරෝදී ධාවන තරඟ සමඟ ඇරඹුණු මේ කතා පෙළ අද වන විට ජාත්‍යන්තර අපරාද දක්වා දුරදිග ගොස් තිබෙනවා. ඉතින් මේ තමයි ඔබ අප ආදරය කරන The Fast and the Furious සිනමාපට පෙළ.

1955 දී The Fast and the Furious නමින්ම B Grade සිනමාපටයක් තිරගත වී තිබුණු අතර මෙම නමෙහි අයිතිය පැවතියේ එම සිනමාපටයටයි. නමුත් පසුව යුනිවර්සල් සමාගම විසින් එම සිනමාපටය මිලදී ගෙන එම නමෙහි අයිතිය තමන් සතු කරගනු ලැබුවා. පසුව එම නමම මෙලෙස 2001 සිනමාපටය වෙනුවන් ඔවුන් යොදාගනු ලබනවා. අද වන විට ප්‍රධාන සිනමාපට 08 ක් සහ කෙටි සිනමාපට ද්විත්වයක් සහ Spin-off හෙවත් එයට ඈඳුණු අතුරු සිනමාපටයකින් සමන්විත වන්නේ හොලිවුඩයේ ඉහල ආදායම් ලබන සිනමාපට පෙළක් වෙමින්.

1. The Fast and the Furious
2. 2 Fast 2 Furious
3. The Fast and the Furious: Tokyo Drift
4. Fast & Furious
5. Fast Five
6. Fast & Furious 6
7. Furious 7
8. The Fate of the Furious

• Fast & Furious Presents: Hobbs & Shaw

1. The Turbo Charged Prelude for 2 Fast 2 Furious
2. Los Bandoleros

සිනමාපට පෙළ ඇරඹෙන්නේ වැඩිදියුණු කල කාර් සමඟ නීතිවිරෝදී මාර්ග ධාවන තරඟ වල යෙදෙන අතර විටින් විට මංකොල්ලකෑම් වල යෙදෙන කණ්ඩායමක් (ඩොමිනික් “ඩොම්” ටොරෙට්ටෝ, ලෙටී, වින්ස්, මියා) සහ ඔවුන්ව හසුකරගන්නට එන වෙස්වලාගත් පොලිස් නිලදාරියෙක් වටායි. දෙවෙනි වරට සිනමාපටය දිගහැරෙන්නේ පෙර සිනමාපටයේ පොලිස් නිලධාරියා වටායි. සිනමාපට ද්විත්වයම බ්‍රයන් ඕ’කෝනර් නම් පොලිස් නිලධාරියා සමඟ සම්බන්ද වුවත් තෙවන සිනමාපටය නවතම ආරකින් දිගහැරෙනවා. ඒ ජපානය මූලික කරගෙන. හැබැයි අවසාන මිනිත්තුවේ කතාව පළමු සිනමාපටය හා සම්බන්ද කරන්නේ ඩොම් නම් චරිතයේ කැමියෝ එකක් සමඟින්.

මෙලෙස එකිනෙකට වෙනස් තනි සිනමාපට ත්‍රිත්වයකින් පසුව නැවත වරක් සිව්වන වරට සිනමාපටයක් නිර්මාණය කරන්නට තීරණය කරනවා. එහිදී නිෂ්පාදකයින් සැලසුම් කරන්නේ පෙර සිනමාපට වල මෙන් නීතිවිරෝදී ධාවන තරඟ මෙන් නොව අපරාධ සහ රහස් මෙහෙයුම් සම්බන්ද සිනමාපට කිහිපයක් නිර්මාණය කරන්නටයි. එබැවින් පළමු සිනමාපටයේ චරිත සහ තෙවන සිනමාපටයේ සිටි හන් නමැති චරිතය යොදාගනිමින් සිනමාපටය නිර්මාණය කරනවා. නිර්මාපකයින් සිතු පරිදිම සාර්ථක වන සිනමාපටය තවත් දැවැන්ත ලෙසින් පස්වන වරටද නිර්මාණය කෙරෙනවා. පස්වන සිනමාපටය තිරගත වන්නේ රිදී තිරයේ අපූර්වතම මංකොල්ලකෑමේ දර්ශනයක් මවාපාමින්. මේ සිනමාපටය උදෙසා එතෙක් පැමිණි සිනමාපට හතරේම සිටි චරිත ගණනාවක් එක්කරගන්නවා. එමන්ම එක් විශේෂ චරිතයක් හඳුන්වා දෙනවා. ඒ රාජ්‍යත්‍රාන්තික ආරක්ෂක ඒකකයේ නියෝජිතයෙක් ලෙස පැමිණෙන ලුක් හොබ්ස් නම් චරිතයයි. රෙස්ලින් තරුව Dwayne Johnson විසින් එම චරිතය රඟ දක්වනු ලබනවා..

පස්වන වතාව අති සාර්ථක වූ නිසා හයවන වරට දිගහැරෙන්නේ පෙරටත් වඩා දැවැන්ත සිනමාපටයක්. මෙලෙස හයවන වතාව අති සාර්ථක වූ නිසා හත්වන සිනමාපටය කෙරෙහි දැවැන්ත බලාපොරොත්තු තබා තිබුනා. එය සඵල කරමින් සිනමාපටය බිලියනයේ අදායම පවා පසුකර යන්නට සමත් වූවා. දුක්බර කාරණය වන්නේ සිනමාපටය අඩක් රූගත කරමින් සිටියදී සිනමාපට එකතුවේ ඩොම් සමඟ ජනප්‍රියතම තාරකාව වූ බ්‍රයන් ඕ’කෝනර් චරිතය රඟ දැක්වූ පෝල් වෝකර් මෝටර් රථ අනතුරකින් මියයාමයි. පෝල්ගේ සොහොයුරු කෝඩි වෝකර් සමඟ VFX තාක්ෂනය යොදාගනිමින් රූගතකිරීම් අවසන් කල අතර බ්‍රයන් ගේ චරිතය වෙනුවෙන් සංවේදී අවසානයක් සිනමාපටය තුල ලබාදෙනවා. ඉතින් මේ හත්වන සිනමාපටයේදී තවත් විශේෂ චරිතයක් හඳුන්වා දෙනවා. Jason Statham විසින් රංග දක්වන ඩෙකාර්ඩ් ෂෝ එම චරිතයයි. අතිශය දරුණු අපරාධකරුවෙක් වන හිටපු බ්‍රිතාන්‍ය විශේෂ කාර්ය බලකා සෙබලෙකුගේ චරිතය ඔහු රඟ දක්වනවා. 

පසුව ඩොම් ගේ චරිතය රඟදක්වන වින් ඩීසල් පවසා සිටියේ මෙම සිනමාපට මාලාව තවත් සිනමාපට ත්‍රිත්වයකින් අවසන් කරන බවයි. එහි පළමු සිනමාපටය ලෙස The Fate of the Furious සිනමාපටය තිරගත වූයේ නැවත වරක් බිලියනයේ කඩයිම පසුකර යමින් මේ සිනමාපට මාලාව ඉහලම ආදායම් ලද සිනමා මාලා අතර නමවන තැන හිමිකර ගනිමිනි. (MCU හෙවත් මාර්වල් සිනමා විශ්වය තමයි පළමු තැන ඉන්නේ)

මෙම අටවන සිනමාපටයේ දී ඔවුන් විශේෂ සිදුවීමක් එක් කරනවා. එනම් නාහෙට නාහන නියෝජිත ලුක් හොබ්ස් සමඟ පෙර සිනමාපටයේ දුෂ්ටයා වූ ඩෙකාර්ඩ් ෂෝ ගේ කිසිසේත් නොගැලපෙන කණ්ඩායම් එක්වීමක් ඉදිරිපත් කරමිනි. මෙම නොගැලපෙන දෙදෙනාගේ අපූර්ව ටීම්-අප් එක රසිකයන් හට නවතම විනෝදජනක අත්දැකීමක් වූවා. ඉතින් මේ නිසා Fast and Furious නිෂ්පාදකයින් තීරණය කරන්නේ නමවන සිනමාපටය මදක් පස්සට ගෙන ලුක් සහ ෂෝ ගේ Spin-off සිනමාපටයක් නිර්මාණය කරන්නටයි.

Hobbs & Shaw යනු එහි ප්‍රතිඵලයයි. ලුක් සහ ෂෝ ගේ මෙම ටීම්-අප් එක සැමවිටම රසිකයන් පිනවන අවස්ථා වූවා. දෙන්නට දෙන්නගේ නුරුස්නා බව, කටකැඩුනු වචන, දෙදෙනා අතර ගැටුම් ආදී එකී නොකී සිදිවීම් මේ එකතුව තුල සිදුවෙනවා. හොරා පොලිස් සෙල්ලමක හොරා සහ පොලිස්කාරයාගේ ගැටුම පැත්තකට කර පොදු අරමුණක් වෙනුවෙන් එක්වීම අපුර්ව ලෙස ගලපන්නට සමත් වෙනවා.

හොබ්ස් සහ ෂෝ සමඟ මෙවර ඩෙකාර්ඩ් ෂෝ ගේ සොයුරිය වන Hattie ලෙසින් වැනේසා කර්බි එක්වනවා. එමෙන්ම මේ හොරා පොලිස් කණ්ඩායමේ එදිරිවාදියා ලෙසින් සයිබනේටික් තාක්ෂණයෙන් වැඩිදියුණු කල මිනිසෙක් ලෙසින් Idris Elba විසින් බ්‍රික්ස්ටන් නැමති චරිතය එක්වනව. හැඩිදැඩි ලුක් සහ වැඩකරු ෂෝ වෙනුවෙන් මේ පාර එන්නේ එසේ මෙසේ සතුරෙක් නම් නෙවෙයි.. ඉතින් ෂෝ ගේ සහෝදරියත් එසේ මෙසේ කෙනෙක් නම් නෙවෙයි. කතාව ගැනනම් කියන්න යන්නේ නැහැ මම, මොකද මේ පාර තියෙන්නේ මුල ඉඳන් අගටම එක දිගට ක්‍රියාදාම පෙළක්.

ඒ වගේම මේ සිනමාපටය තුල හොලිවුඩයේ දැවැන්ත තාරකා කීපයකම කැමියෝ දර්ශන දකින්න පුළුවන්. ඉතින් මේ වසරේ ක්‍රියාදාම සිනමාවේ බලාපොරොත්තු කඩ නොකරපු මේ සිනමාපටය බලන්න කියලා කියන ගමන් මං නවතිනවා. ඒ වගේම අද මේ දෙන පිටපත කොරියානු උපසිරසි සහිත පිටපතක්. ලබාදෙන උපසිරසි ඊට ගැලපෙන්න සහ වෙනත් වර්ණයකින් දෙන්නේ පැහැදිලිව පෙනෙන විදිහට. තවත් කාරණයක් මේ චිත්‍රපටයේ පෝස්ට් ක්‍රෙඩිට් සීන් 2ක් තියෙනවා. HD /BR පිටපත් ආවම ඒ කොටසටත් උපසිරසි යාවත්කාලීන කරන්නම් කියන පොරොන්දුවත් පිට අදට සමු ගන්නම් හැමෝටම ජය!!

 

 

 

” Due to copyright issues, we do not provide any torrent links. “

මෙම උපසිරසි  Bluray / WEB පිටපත් සඳහා  අදාළ වේ.

102,782 downloadsDownload Hobbs-Shaw-2019-BR.zip134 KB

මේ ලබා දී ඇති සිංහල උපසිරැසි පිළිබද “හසන්ත වික්‍රමරත්න” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

Subtitle Contributor Rank

ADMIN MEMBER
JOINING DATE – 2012-12-29
SUB MAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.