Dune: Part Two (2024) Sinhala Subtitles | නිරුදක කතරින් පාරාදීසය වෙත රැගෙන යන ගැලවුම්කරුවා? [සිංහල උපසිරැසි] 400*

Dune: Part Two (2024) Sinhala Subtitles

සුබ දවසක් වේවා හැම කෙනෙක්ටම! ඔන්න ආයෙත් ඔයාලව මුණගැහෙන්න ආවා. අද අරගෙන ආවේ එසේ මෙසේ භාණ්ඩයක් නෙමෙයි, මේ සිනමාපටයේ විශේෂත්වයන් කිහිපයක්ම තියෙනවා. මේ තමයි මං දැනට සිනමාශාලාවකින් නරඹපු හොඳම සිනමාපටය. ඒ වගේම 2010න් පසුව imdb වෙබ් අඩවියේ හොඳම සිනමාපට ලැයිස්තුවේ ඉහලම ස්ථානයකට පැමිණි සිනමාපටය තමයි මේක.

Dune: Part Two (2024) Sinhala Subtitles

ඒ වගේම මේ තමයි මගේ 400වැනි උපසිරසි පරිවර්තනය සහ පේන විධියට අවසාන කඩයිම. ඉතිං මේ වෙනකම් මේ වැඩේ කරගෙන යන්න සහය දුන්නු අපේ වෙබ් අඩවියේ ඇඩ්මින් මඩුල්ලත්, සහෝදර උපසිරැසිකරුවනුත් ඒ වගේම අපේ වෙබ් අඩවියට පිවිසිලා අපිට කමෙන්ට් එකක් දාල දිරිමත් කරන ඔයාලවත් බොහොම ආදරෙන් මතක් කරනවා මේ වෙලාවේ. 🙂

Dune: Part Two (2024) Sinhala Subtitles

විශේෂයෙන්ම කිසිම කෘතඥතාවක් පල කරන්නේ නැතුව ආව සබ් එක ගත්තා තමන්ගේ වැඩේ කරගත්තා ගියා කියන පන්නයේ දහස් සංඛ්‍යාත ශ්‍රී ලාංකිකයින් අතරින් අර කමෙන්ට් එකක් දාල අපිව දිරිමත් කරන තිහක් හතළිහක් වගේ පිරිසව නැවත වතාවක් මතක් කරන්න ඕනා. ඒ අය නොවෙන්න මේ තරම් දුරක් මේ විධියට මේ අමාරු වැඩේ කරගෙන එන්න හිතක් පහල වෙන්නේ නැහැ. එහෙනම් ඒ කතා ඇතිනේ ඉතිං. අද අරගෙන ආව ෆිල්ම් එක ගැන විස්තරයට යොමුවෙමු අපි එහෙනම්. 

Dune: Part Two (2024) Sinhala Subtitles

මේ සිනමාපටයේ වරදක් කියල කියන්න දෙයක් නැතිම තරම්. ඉතිං එහෙම සිනමාපට මේ ලෝකේ මිට කලින් බිහිවෙලා නැද්ද? අපොයි නැහැ. ඕන තරම් බිහිවෙලා තියෙනවා. හැබැයි මේක ඉතාම විශේෂිත වෙන්න හේතුවක් තියෙනවා. ඒ හේතුව තමයි, ලෝකේ බොහෝ විචාරකයින් මත පල කලේ මේ ඩුන් කියන විද්‍යා ප්‍රබන්ධ නවකතා මාලාව කොහෙත්ම, සාර්ථකව සිනමාවට නගන්න බැරි නවකතා මාලාවක් ලෙස. එහෙම කියන්න හේතු ඇති පදම් තියෙනව.

මිට කලින් 1984 වර්ෂයේදී මේ සඳහා උත්සහ දැරුවා. Dune (1984) නමින් David Lynch විසින් තමයි මේ සිනමාපටය නිර්මාණය කරන්නේ. හැබැයි ඒක ඒ හැටි සාර්ථක වෙන්නේ නැහැ. ඊට පසුව ඔස්කා සම්මානය සඳහා තෙවරක්ම නිර්දේශ ලබාගත්, Denis Villeneuve නම්වූ විශිෂ්ඨතමයා මේ වගකීම බාරගන්නවා, ඒ අනුව 2021 වසරේදී Dune පළමු සිනමාපටය නිර්මාණය කරනවා. අතිශය සාර්ථකව ඔහු එම සිනමාපටය නිර්මාණය කිරීමට සමත් වෙනවා. ඒ ගැන ඉතිං පුදුමයට පත්වෙන්න කාරනාවකුත් නැහැ. මොකද ඔහු මින් පෙර  Prisoners (2013), Sicario (2015), Arrival (2015), Blade Runner 2049 (2017) වගේ සිනමාපට නිර්මාණය කළා. ඔයාල ඒ සිනමාපට නරඹල තියෙනව නම් ආයේ ඒ ගැන කියන්න දෙයක් නැහැනේ?

Dune: Part Two (2024) Sinhala Subtitles

ඉතිං කොහොමහරි මෙහි මුල්ම සිනමාපටයෙන් පසුව ඔහු අවුරුදු තුනක්ම අරගෙන එහි දෙවැන්න නිකුත් කරනවා. ඒ නිකුත් කිරීම සිනමා ලෝකය දෙදරුම් කැවීමට සමත් වෙනවා. මේ සිනමාපටය නරඹන ප්‍රේක්ෂකයා ඒ වෙත කෙතරම් ඇළුම් කරනවාද යන්න ඔප්පු වෙන්නේ imdb වෙබ් අඩවිය විසින් පවත්වාගෙන යන ලොව හොඳම සිනමාපට 250 ලයිස්තුවේ #15 වැනි ස්ථානය Dune දෙවැනි සිනමාපටය වෙනුවෙන් වෙන් වීමෙන්. මේ ඒ ලයිස්තුවේ මේ තරම් ඉහල රෑන්ක් එකකට එන්න අවසාන වතාවට සමත්කම් පෑවේ ක්‍රිස්ටෝෆර් නෝලන්ගේ Inception (2010) සිනමාපටය. ඒ එම ලැයිස්තුවේ #14වැනි ස්ථානය දිනාගනිමින්.

Dune: Part Two (2024) Sinhala Subtitles

මේ සිනමාපටය මේ තරම් විශිෂ්ඨතත්වයට පත්වෙන්න තවත් එක හේතුවක් ප්‍රධාන වශයෙන් බලපෑම් කළා කියල මම විශ්වාස කරනවා. ඒ තමයි වත්මන් ලෝක සිනමාවේ පසුබිම් සංගීත නිර්මාණකරුවන් අතර විශිෂ්ඨයෙකු වෙන හාන්ස් සිමර් තමයි මේ සිනමාපටයේ සංගීතය නිර්මාණය කරන්නෙ. මම දන්නේ නැහැ ලැප් එකකින් හෝ රුපවහිනියකින් මේක නරඹනකොට ඔයාට මේ දේවල් කොහොම දැනේවිද කියලා, හැබැයි මම මේ සිනමාපටය සිනමා ශාලාවකින් නරඹන වෙලාවේ, ඔහුගේ සංගීතය මාව වෙනම තලයකට අරගෙන ගියා කියල කතා දෙකක් නැතුව කියන්න පුළුවන්. ඔන්න ඔය කාරණේ නිසාමයි මේ වගේ සිනමාපට නරඹන්න අපි සිනමාශාලාවන් වෙතම යා යුතු වන්නේ! හැබැයි ඉතිං අපේ රටේ ආර්ථික තත්වයත් එක්ක ඒ දේවල් විඳින්න තරම් හැකියාවක් අපි කාටවත් නැහැ මම හිතන්නෙ. මම උනත් මේ වගේ තෝරා බේරාගත් සිනමාපටයක් බලන්න යනවා ඇරෙන්න හැම එකම බලන්න යන්නේ නැහැ. ඒවා ඉතිං දුක්ඛිත කතන්දර… 🙁

Dune: Part Two (2024) Sinhala Subtitles

ඒ වගේම මෙහි රංගනයේ යෙදෙන නළු-නිළි කැලත් හරිම අපුරුවට තමන්ගේ කාර්‍යයන් 100%ක් ඉටුකරනවා. එහෙම නොවෙන්න ලෝක සිනමාවේ මේ වගේ විශිෂ්ඨ සිනමා කෘතියක් බිහිවෙන්නේ නැහැනේ නේද? ඒ අතරින් ප්‍රධාන වශයෙන් Timothée Chalamet සහ Zendaya දෙදෙනාත්, ඊට අමතරව Rebecca Ferguson, Javier Bardem, Josh Brolin, Florence Pugh, Dave Bautista ඒ වගේම විශේෂයෙන්ම දෙවැනි සිනමාපටයේ සුපිරිම දුෂ්ඨ චරිතයක් සිදුකරන Austin Butler කියන සුවිශේෂී තරුණ නළුවව අපට අමතක කරන්නම බැහැ. විචාරක අගයන්, ප්‍රේක්ෂක අගයන් විතරක් නෙමෙයි මේ සිනමාපටය 2024 මාර්තු පළමුවැනිදා සහ 2024 අප්‍රේල් 07 වැනිදා අතර කාලය අතරතුර සිනමාශාලාවන්හි ප්‍රදර්ශනය කරමින් ලබාගත් ආදායම ඩොලර්ක් මිලියන 650කට ආසන්න වෙනවා. මේ සිනමාපටය ගැටුනේ ඉතාම ප්‍රසිද්ධ සිනමාපට ද්විත්වයක් වෙන Kung Fu Panda 4 සහ Godzilla x Kong: The New Empire යන සිනමාපට ද්විත්වයත් එක්ක.

Dune: Part Two (2024) Sinhala Subtitles

පඳුර වටේ තැලුවා ඔය මදැයි නේද? ෆිල්ම් එකේ ස්ටොරිය වෙත යොමු වෙමු අපි එහෙනම්. ඔයාලට මේ සිනමාපටයේ සිදුවෙන සිදුවීම් හරියටම තේරුම් ගන්න ඕන නම්, මෙහි මුල් සිනමාපටය අනිවාර්යෙන්ම නරඹන්න වෙනවා.

Dune: Part Two (2024) Sinhala Subtitles

මුල් සිනමාපටයේදී අපිට දකින්න ලැබෙනව හදිසියේම අධිරාජ්‍යාගේ කීම අහලා අරාකීස් නමැති ග්‍රහලෝකයෙන් පිටවෙලා යන හාකොනෙන්වරුන්ව. හාකොනෙන්වරුන් ඉන් පිටවෙලා ගියාට පසුව අධිරාජ්‍යයා විසින් අරාකීස් ග්‍රහලෝකයේ භාරකාරීත්වය පවරන්නේ ඒ කාලය වෙනකොට ප්‍රභල වංශයක ප්‍රධානියා බවට පත්ව සිටි ඩියුක් ලේටෝ ඇට්‍රෙඩිස් වෙත. කැලඩන් නමැති ග්‍රහලෝකය පාලනය කලේ එම වංශය විසින්. අහ්හ් මේ කියන අධිරාජ්‍යයා තමයි මේ විශ්වයේ ඉහළතම පාලකයා වෙන්නෙ.

Dune: Part Two (2024) Sinhala Subtitles

ඔහු යටතේ තමයි කැලඩන් සහ අරාකීස් වැනි ග්‍රහලෝක පවතින්නේ. මේ අතරින් විශ්වයේ වැදගත්ම සහ වටිනාම ග්‍රහලෝකය බවට පත්වෙලා තියෙන්නේ අරාකීස් ග්‍රහලෝකය. ඒකට හේතුව තමයි අන්තර් ග්‍රහලෝක සහ අනෙකුත් අභ්‍යවකාශ ගමනාගමනයන් සඳහා මොවුන් යොදාගන්න ඉන්ධනය වෙන ස්පයිස් නමැති මුලද්‍රව්‍යය පවතින එකම ග්‍රහලෝකය තමයි මේ අරාකීස් කියන්නෙ. ඉතිං හදිසියේම අධිරාජ්‍යයාගේ සුරතලා බවට පත්වෙලා හිටිය බැරොන් හාකොනෙන් හට ඉන් පිටවෙලා යන්න කියන්න හේතුවක් ඇතිනේ මොකක් හරි. අන්න ඒ හේතුව අපිට පලවෙනි සිනමපටයේදී දකින්න ලැබෙනවා. ඉන් පසුව සිදුවන සිදුවීම් දාමයේ ඉතුරු කොටස් ටික තමයි මේ සිනමාපටයේදී ඔයාලට දකින්න ලැබෙන්නෙ…

Dune: Part Two (2024) Sinhala Subtitles

එහෙනම් අපි දවස් දෙක තුනක්, සමහරවිට ඊටත් වැඩි කාලයක් මහන්සි වෙලා ඔයාලට ලබා දෙන සබ් එක අරගෙන යනකොට විනාඩියක් වැය කරලා කමෙන්ට් එකක් දාන්න අමතක කරන්න එපා. කමෙන්ට් වැඩියෙන් වැටෙනකොට තමයි මගෙන් වගේම අපේ අනෙකුත් සහෝදර උපසිරසිකරුවන්ගෙන් ඔයාලට වැඩි වැඩියෙන් සබ් ලැබෙන්නේ. කවුරුත් අපිව දිරිමත් කරන්නේ නැත්නම්, අපේ අඩුපාවක් පෙන්නලා දෙන්නේ නැත්නම් කිසි කික් එකක් එන්නේ නැහැනේ සබක් කරන්න. එතකොට කාටද පාඩු? 😉

එහෙනම් යලිත් දවසක සුපිරි සබක් එක්ක හමුවෙමු. සැලකිල්ලට සැලකිල්ල, ජය! 🙂

Director: Denis Villeneuve

Writers: Denis Villeneuve, Jon Spaihts, Frank Herbert

IMDB Ratings : 8.8 

Release Date:  2024.03.01 (USA)

Tomatometer : 93% ( විචාර 408ක් සමගින්)

Audience Score :  95% (5000+ මනාප පළකිරීම් සමගින්)

Note : මෙම ලිපිය අවසන් වරට යාවත්කාලීන කල දිනය වන්නේ 2024.04.07 දින බව කරුණාවෙන් සලකන්න. මෙහි තිබෙන ඇතැම් සංඛ්‍යාත්මක දත්තයන් කාලයත් සමග වෙනස් විය හැක.

 

 

 

 

Due to copyright issues, we do not provide any torrent links.

මෙම ලබා දී ඇති උපසිරසිය Web iNTERNAL සහ Original Web පිටපත් සඳහා ලබා දි ඇත.

 

35,432 downloadsDownload Dune-Part-Two-2024-Web-Update.zip180 KB

 

මේ ලබා දී ඇති සිංහල උපසිරැසි පිළිබද “ශාන් විමුක්ති [විමා]” සොහොයුරාට අප සැමගේ ස්තූතිය හිමි විය යුතු අතර උපුටාගැනීම් සියල්ලම ඔහුගේ අවසරය මතම සිදුවිය යුතුය.

 

Subtitle Contributor Rank

ADMIN MEMBER
JOINING DATE – 2013-02-27
SUBMAKER RATING BY ADMINS

ඉහත තරු මගින් පෙන්නුම් කෙරෙන්නේ උපසිරසිකරුවා මෙම උපසිරැසිය ඔබ වෙත ගෙන ඒම සඳහා දැක්වූ කාර්යක්‍ෂමතාව මත ඇඩ්මින් මඩුල්ල ලබාදෙන ඇගයුම් මට්ටමයි. උපසිරැසියේ ගුණාත්මක බාවය උපසිරැසි නරඹන ඔබට මෙම ලිපියේ ඉහල ඇති ස්ථානයෙන් ඇගයුම් මට්ටම ලබාදිය හැක. මෙම නිර්ණායක දෙක මත මෙම උපසිරසි කරුවා හට ඉදිරි ජනප්‍රිය චිත්‍රපට සඳහා උපසිරසි සකස්කිරීමට අවස්ථාව හිමි වනු ඇත. මෙය වඩාත් ගුණාත්මක ලෙස උපසිරසි සකස් කිරීම සඳහාත් ඔබට වඩාත් හොඳ තත්වයේ උපසිරසි ඉතා ඉක්මනින් ලබාදීමටත් අප ගන්නා ලද තවත් එක උත්සාහයක ප්‍රතිපලයකි.

 

Dune: Part Two (2024) Sinhala Subtitles